വിവാദമായ ബീഹാറിലെ പന്ത്രണ്ടാം ക്ലാസ് പരീക്ഷാ ക്രമക്കേടിന്റെ കൂടുതല്‍ വിശദാംശങ്ങള്‍ പുറത്ത്. ഒന്നാം റാങ്ക് ജേതാവായ റൂബി റായുടെ ഉത്തരക്കടലാസിലുണ്ടായിരുന്നത് സിനിമകളുടേയും കവികളുടെയും പേരുകള്‍. അതും പലതിന്റേയും അക്ഷരം തെറ്റിച്ചും. ഒരു പേപ്പറില്‍ ചലച്ചിത്രങ്ങളുടെ പേരും മറ്റൊരു ഉത്തരക്കടലാസില്‍ കവി തുളസീദാസിന്റെ പേര് നൂറിലധികം പ്രാവശ്യവും എഴുതിയിരുന്നതായും പൊലീസ് വ്യക്തമാക്കി. ഈ പേപ്പറുകള്‍ക്ക് പകരം പിന്നീട്, മറ്റാരോ എഴുതി തയ്യാറാക്കിയ ഉത്തരക്കടലാസുകള്‍ മാറ്റിവയ്ക്കുകയായിരുന്നെന്നും പൊലീസ് പറഞ്ഞു.
പന്ത്രണ്ടാം ക്ലാസ് പരീക്ഷയില്‍ ഒന്നാം റാങ്ക് നേടിയതുമായി ബന്ധപ്പെട്ടായിരുന്നു വിവാദങ്ങളുടെ തുടക്കം. പരീക്ഷാഫലം പുറത്തുവന്നതുമായി ബന്ധപ്പെട്ട് കഴിഞ്ഞ ജൂണിലാണ് റൂബി റായ് ഒരു ചാനലിനോട് പൊളിറ്റിക്കല്‍ സയന്‍സ് എന്നത് പിശകോടെ പ്രൊഡിക്കല്‍ സയന്‍സ് എന്ന് ഉച്ചരിക്കുകയും ഇത് പാചകം പഠിപ്പിക്കുന്ന വിഷയമാണെന്ന് പറയുകയും ചെയ്തത്. 
ബിഹാറിലെ പരീക്ഷകളുമായി ബന്ധപ്പെട്ട് പ്രവര്‍ത്തിക്കുന്ന വന്‍ റാക്കറ്റുകളെക്കുറിച്ചുള്ള വിവരങ്ങളും ഇതോടനുബന്ധിച്ച് പുറത്തുവന്നിരുന്നു. അന്വേഷണ ഫലമായി റൂബി റായുടേയും സയന്‍സിലെ ഒന്നാം സ്ഥാനക്കാരന്‍ സൗരഭ് കുമാറിന്റേയും പരീക്ഷാ ഫലം റദ്ദാക്കിയിരുന്നു. റാക്കറ്റിന്റെ ഭാഗമായി പ്രവര്‍ത്തിച്ചിരുന്ന മുന്‍ ബിഎസ്ഇബി ചെയര്‍മാന്‍ ലാല്‍കേശ്വര്‍ പ്രസാദ് സിംഗ്, മുന്‍ ഭാര്യ ഉഷ സിന്‍ഹ തുടങ്ങിയവരെ അറസ്റ്റുചെയ്തിരുന്നു
്