എന്തുപ്രശ്നമുണ്ടായാലും ആരുടെയെങ്കിലും പേജില്‍ പോയി തുരുതുരാ കമന്റിടുക മലയാളികളുടെ ശീലമായി മാറിയിരിക്കുകയാണ്. കണ്ണൂരിനെ രക്ഷിക്കാനാണ് മലയാളികള്‍ കൂട്ടമായി കമന്റ് ചെയ്ത് ആവശ്യപ്പെട്ടിരിക്കുന്നത്. മറ്റെവിടെയുമല്ല രാഷ്ട്രപതി പ്രണബ് മുഖര്‍ജിയുടെ ഫെയ്സ്ബുക്ക് പേജിലാണ് മലയാളികളുടെ ഈ കൂട്ടക്കമന്റിംഗ് നടന്നിരിക്കുന്നത്.

ആര്‍എസ്എസിന്റെ നേതൃത്വത്തിലെന്ന് തോന്നിക്കുന്ന രീതിയിലാണ് കമന്റിംഗ് നടന്നിരിക്കുന്നത്. കേരളത്തിന് പുറത്തുനിന്നുള്ള ബിജെപി ഐഡികളും ഈ കമന്റിംഗില്‍ ഭാഗമായിട്ടുണ്ടെന്നതും ശ്രദ്ധേയമാണ്.
കണ്ണൂരിനെയും കേരളത്തേയും രക്ഷിക്കണമെന്നും രാഷ്ട്രപതി ഭരിക്കണമെന്നു വരെ നീളുന്നു കമന്റുകള്‍.
ഈ ആവശ്യവുമായി ബന്ധപ്പെട്ട സമാനമായ മുദ്രാവാക്യങ്ങളുയര്‍ത്തിയത് ബിജെപിയായിരുന്നു.
കണ്ണൂരില്‍ സമാധാനം പുലരുന്നതിനായി, ഇനിയൊരു അക്രമവാര്‍ത്ത കണ്ണൂരില്‍ നിന്ന് കേള്‍ക്കാതിരിക്കാനായി പുതിയൊരു ഹാഷ് ടാഗ് ട്വിറ്ററിലും ഫെയ്സ്ബുക്കിലും പ്രചരിക്കുന്നുണ്ട്.
മോഹന്‍ലാല്‍ ചിത്രമായ കിരീടത്തിലെ സംഭാഷണത്തില്‍ നിന്ന് കടമെടുത്ത #കത്തിതാഴെഇടടാ എന്ന ഹാഷ് ടാഗോടു കൂടിയ പോസ്റ്റുകളാണ് ഇപ്പോള്‍ നവമാധ്യമങ്ങളിലെങ്ങും തരംഗമായിരിക്കുന്നത്.
കേരളത്തിലെ എല്ലായിടങ്ങളില്‍ നിന്നുള്ളവരും കണ്ണൂരിനായി കൈകോര്‍ക്കുന്നുണ്ട്.'നമ്മള്‍ പോസ്റ്റു ചെയ്യുന്നത്: കത്തി താഴെ ഇടെടാ, പാര്‍ട്ടി ഗുണ്ടകള്‍ വായിക്കുന്നത്: കുത്തി താഴെ ഇടടാ' എന്നിങ്ങനെ പോകുന്നു പോസ്റ്റുകള്‍.
അക്രമരാഷ്ട്രീയത്തെ എത്രത്തോളം വെറുപ്പോടെയാണ് ജനങ്ങള്‍ നോക്കിക്കാണുന്നത് എന്നതിന്റെ തെളിവാണ് സോഷ്യല്‍ മീഡിയയുടെ ഹാഷ്ടാഗ് പ്രതിഷേധം.
കൊലപാതകങ്ങളും അക്രമങ്ങളും ഇല്ലാത്ത കണ്ണൂരിനായി വരും ദിവസങ്ങളില്‍ നവ മാധ്യമങ്ങളിലെ ക്യാംപെയിന്‍ ശക്തമാകുമെന്നാണ് സൂചന നല്‍കിയാണ് രാഷ്ട്രപതിയുടെ പേജിലും മലയാളികളുടെ കമന്റുകള്‍ പ്രത്യക്ഷപ്പെടുന്നത്.