തടവുകാരെ മര്ദ്ദിക്കരുതെന്ന ഡിജിപിയുടെ ഉത്തരവ് വീണ്ടും കര്ശനമാക്കി ജയില്വകുപ്പ്: അടിപിടി കണ്ടാലും മിണ്ടാതെ ജീവനക്കാര്
തടവുകാരെ മര്ദ്ദിക്കരുതെന്ന ഡിജിപിയുടെ ഉത്തരവ് ജയില്വകുപ്പ് വീണ്ടും കര്ശനമാക്കി. തടവുകാരോട് മാന്യമായി പെരുമാറണമെന്നും വാടാ, പോടാ വിളികള് വേണ്ടെന്നുമാണ് സൂപ്രണ്ടുമാര്ക്കും കീഴ് ജീവനക്കാര്ക്കുമുള്ള നിര്ദ്ദേശം.
മനോദൗര്ബല്യമുള്ള തടവുകാരനെ മര്ദ്ദിച്ചതിനു വിയ്യൂര് സെന്ട്രല് ജയിലിലെ ഹെഡ് വാര്ഡര്ക്ക് അടുത്തിടെ സസ്പെന്ഷന് ലഭിച്ചിരുന്നു. തടവുകാരുടെ തമ്മിലടിയും സമാന്തര ജയില് ഭരണവും മുറയ്ക്കു നടക്കുന്നുണ്ടെങ്കിലും സസ്പെഷന് ഭയന്നു റിപ്പോര്ട്ട് ചെയ്യാതെ തലയൂരുകയാണ് ജീവനക്കാര്. ജയിലില് മര്ദനമേറ്റാല് തടവുകാര്ക്കു പരാതിപ്പെടാന് വരാന്തകളില് കോടതിയുടെ മേല്നോട്ടത്തില് സീല് ചെയ്ത പരാതിപ്പെട്ടികള് സ്ഥാപിച്ചിട്ടുണ്ട്. തടവുകാരെ മര്ദ്ദിച്ചാല് ജീവനക്കാര്ക്കൊപ്പം സൂപ്രണ്ടിനെതിരെയും കര്ശന നടപടി സ്വീകരിക്കുമെന്ന ഡിജിപിയുടെ ഉത്തരവു കൂടിയെത്തിയതോടെ ജീവനക്കാര് ഭീതിയിലായി.
തടവുകാരോടു മാന്യമായേ പെരുമാറാവൂ എന്നും പ്രകോപനപരമായി പെരുമാറരുതെന്നുമാണ് നിര്ദേശം. വിയ്യൂര് ജയിലില് മനോദൗര്ബല്യമുള്ള തടവുകാരിലൊരാള് തനിക്കു മര്ദ്ദനമേറ്റതായി പരാതിപ്പെട്ടിയിലിട്ട കത്താണ് ഹെഡ് വാര്ഡറുടെ തൊപ്പിതെറിപ്പിച്ചത്. മാസങ്ങള്ക്കു മുന്പു പത്തനംതിട്ട ജയിലിലും തടവുകാരനെ മര്ദിച്ചതിനു ജീവനക്കാരനെ സസ്പെന്ഡ് ചെയ്തിരുന്നു.
മര്ദ്ദിച്ചതായി പരാതി ലഭിച്ചാല് സസ്പെന്ഷന് ഉറപ്പാണെന്നു വന്നതോടെ ജയിലുകളില് തടവുകാരുടെ സമാന്തരഭരണമാണിപ്പോള്. 'എടാ' എന്നു വിളിച്ച വാര്ഡര്ക്കു നേരെ ടിപി കേസ് പ്രതികളിലൊരാള് അസഭ്യവര്ഷം നടത്തുകയും കയ്യേറ്റത്തിനു ശ്രമിക്കുകയും ചെയ്തിട്ട് അധികനാളായിട്ടില്ല.
തടവുകാര് തമ്മിലടിച്ചാലും ജീവനക്കാര് ഇടപെടുന്നതു കുറവാണ്. ഇതോടെ സ്ഥിരം കുറ്റവാളികള് വീണ്ടും സടകുടഞ്ഞെഴുന്നേറ്റിട്ടുണ്ട്. ഇടപെടാന് ശ്രമിക്കുന്ന ജീവനക്കാര്ക്കു നേരെ വെല്ലുവിളിയും പതിവായി.
https://www.facebook.com/Malayalivartha
