മൂന്നാമതും പെണ്‍കുഞ്ഞു പിറക്കുമെന്ന ചിന്തയില്‍ ഭര്‍ത്താവ് മുത്തലാഖ് ചൊല്ലിയെന്നും വീട്ടില്‍നിന്നു പുറത്താക്കിയെന്നും പ്രധാനമന്ത്രി നരേന്ദ്ര മോഡിക്കു യുവതിയുടെ കത്ത്. മൂന്നു മാസമെത്തിയ ഗര്‍ഭം അലസിപ്പിക്കാനുള്ള നിര്‍ബന്ധത്തിനു വഴങ്ങാതിരുന്നതിനാല്‍ ഭര്‍ത്താവും കുടുംബവും ഉപദ്രവിച്ചെന്നു ഷഗുഫ്ത എന്ന യുവതി പരാതിപ്പെട്ടു. ഇത്തരം ക്രൂരതകള്‍ ഇല്ലാതാക്കാനായി മുത്തലാഖ് സമ്പ്രദായം അവസാനിപ്പിക്കാന്‍ നടപടിയെടുക്കണമെന്ന അഭ്യര്‍ഥനയും കത്തിലുണ്ട്.പരാതിയുടെ പകര്‍പ്പ് യു.പി. മുഖ്യമന്ത്രി യോഗി ആദിത്യനാഥിനും അയച്ചിരുന്നു. അദ്ദേഹത്തിന്റെ നിര്‍ദ്ദേശാനുസരണം പോലീസ് കേസെടുത്ത് അന്വേഷണം തുടങ്ങി.

അഞ്ചു വര്‍ഷം മുമ്പായിരുന്നു ബുന്ദഖേദ സ്വദേശിയായ ഷംസാദുമായുള്ള വിവാഹം. രണ്ടു പെണ്‍കുട്ടികളുണ്ട്. മൂന്നാമതും ഗര്‍ഭിണിയായതോടെ അതും പെണ്‍കുഞ്ഞാകാമെന്നാരോപിച്ചു വഴക്കു തുടങ്ങി. ഗര്‍ഭഛിദ്രത്തിനു വഴങ്ങാതിരുന്നതോടെ ഷംസാദും മാതാപിതാക്കളും സഹോദരന്മാരും ഉപദ്രവിച്ചു. ഗര്‍ഭസ്ഥ ശിശു മരിക്കാനായി ഷംസാദ് ഷഗുഫ്തയുടെ വയറില്‍ ഇടിച്ചു. തുടര്‍ന്നാണ് മുത്തലാഖ് ചൊല്ലി പുറത്താക്കിയത്.

തന്നെയും മക്കളെയും പൂര്‍ണമായും കൈയൊഴിയുമെന്ന ഭീതിയിലാണെന്നും പ്രധാനമന്ത്രിക്കയച്ച കത്തില്‍ പറയുന്നു. ഗര്‍ഭസ്ഥശിശുവിനെ പിറക്കാന്‍ അനുവദിക്കാതിരിക്കാന്‍ ശ്രമിച്ചെന്ന കുറ്റത്തിനാണ് ഷംസാദിനും സഹോദരന്മാരായ നൗഷാദ്, സഫര്‍ അലി, ഇല്യാസ് എന്നിവര്‍ക്കെയിരേ കേസെടുത്തത്. ഷഗുഫ്തയെ വൈദ്യപരിശോധനയക്ക് അയച്ചു.