മുസഫര്‍ നഗറിലെ സ്‌കൂളില്‍ വനിതാ വാര്‍ഡന്‍ 70ഓളം കുട്ടികളുടെ വസ്ത്രം മാറ്റി പരിശോധിച്ചതായി പരാതി. കുളിമുറിയില്‍ രക്തം കണ്ടതിനെ തുടര്‍ന്നാണ് പരിശോധന നടത്തിയതെന്ന് കുട്ടികള്‍ പറയുന്നു. ഋതുമതിയായിരിക്കുന്ന കുട്ടിയാരാെണന്ന് കണ്ടെത്തുന്നതിനാണ് പരിശോധന നടത്തിയിരിക്കുന്നത്.

കസ്തൂര്‍ബ ഗാന്ധി ഗേള്‍സ് റെസിഡന്‍ഷ്യല്‍ സ്‌കൂളിലെ വിദ്യാര്‍ഥിനികളാണ് പരാതിയുമായി എത്തിയിരിക്കുന്നത്. അനുസരിച്ചില്ലെങ്കില്‍ ശിക്ഷിക്കുമെന്ന ഭീഷണിയുമായാണ് വാര്‍ഡന്‍ പരിശോധനക്കെത്തിയതെന്ന് വിദ്യാര്‍ഥിനികള്‍ പറയുന്നു.

പരാതിയെ തുടര്‍ന്ന് വാര്‍ഡനെ സസ്‌പെന്റ് ചെയ്തു. എന്നാല്‍ പ്രചരിക്കുന്ന തരത്തിലുള്ള സംഭവമൊന്നും നടന്നിട്ടില്ലെന്ന് വാര്‍ഡന്‍ പറയുന്നു. കുളിമുറിയുടെ നിലത്തും ചുമരിലും രക്തക്കറയുണ്ടായിരുന്നു. അതിനാല്‍ കുട്ടികളുടെ എല്ലാകാര്യങ്ങളും ശരിയായിത്തന്നെയാണോ  നടക്കുന്നതെന്ന് അറിയണമായിരുന്നു. വളരെ ചെറുപ്പം കുട്ടികളായതിനാല്‍ ചിലപ്പോള്‍ പറയാന്‍ മടിക്കും. അവര്‍ക്ക് എന്തെങ്കിലും പ്രശ്‌നങ്ങളുണ്ടോ എന്ന് അന്വേഷിക്കുക മാത്രമാണ് താന്‍ ചെയ്തതെന്നും വാര്‍ഡന്‍ പറഞ്ഞു.

പഠന കാരങ്ങളില്‍ താന്‍ കര്‍ക്കശ നിലപാടുകാരിയാണ്. അതുകൊണ്ട് കുട്ടികള്‍ക്ക് തന്നെ ഇഷ്ടമല്ല. തന്നെ ഇവിടെ നിന്ന് ഒഴിവാക്കണമെന്ന് ആഗ്രഹിക്കുന്ന മറ്റ് ജീവനക്കാരും അവരെ പ്രകോപിപ്പിച്ചുവെന്നും വാര്‍ഡന്‍ കൂട്ടിച്ചേര്‍ത്തു. പ്രാദേശിക വിദ്യാഭ്യാസ വകുപ്പ് അധികൃതര്‍ സംഭവത്തില്‍ അന്വേഷണം ആരംഭിച്ചിട്ടുണ്ട്.