ബംഗളൂരുവില്‍ വിനായക നഗറില്‍ നാലുനില കെട്ടിടത്തില്‍ തീപിടിച്ച് രണ്ടുപേര്‍ വെന്തുമരിച്ചു. താഴത്തെ നിലയിലെ ഫര്‍ണിച്ചര്‍ നിര്‍മാണ കേന്ദ്രത്തിലാണ് ആദ്യം തീ പടര്‍ന്നത്. പിന്നാലെ കെട്ടിടത്തിലെ മറ്റു നിലകളിലേക്കും തീ പടര്‍ന്നുപിടിക്കുകയായിരുന്നു. വെള്ളിയാഴ്ച ഉച്ചക്ക് ഒന്നോടെയാണ് അപകടം.

രണ്ടാമത്തെയും നാലാമത്തെയും നിലയില്‍ മദ്‌റസയാണ്. കെട്ടിട ഉടമ ഇബ്രാഹിം ഖലീമുള്ളയും കുടുംബവുമാണ് മൂന്നാമത്തെ നിലയില്‍ താമസിക്കുന്നത്. കെട്ടിടത്തില്‍ പ്രവര്‍ത്തിക്കുന്ന അറേബ്യ സിയാഉല്‍ ഖുര്‍ആന്‍ എന്ന സ്ഥാപനത്തിലെ അധ്യാപകന്‍ അബ്ദുല്‍ ഹഫീസ് (35), ഫര്‍ണിച്ചര്‍ നിര്‍മാണ തൊഴിലാളിയും ഡല്‍ഹി സ്വദേശിയുമായ മെഹ്താബ് (27) എന്നിവരാണ് മരിച്ചത്.

ഇവരുടെ മൃതദേഹങ്ങള്‍ കത്തിക്കരിഞ്ഞ നിലയിലായിരുന്നു. നൂറോളം വിദ്യാര്‍ഥികള്‍ ഇവിടത്തെ മദ്‌റസയില്‍ പഠിക്കുന്നുണ്ട്. വെള്ളിയാഴ്ച കുട്ടികള്‍ ജുമുഅ നമസ്‌കാരത്തിന് പോയതിനാല്‍ വന്‍ദുരന്തം ഒഴിവായി. അഗ്‌നിശമന സേനയുടെ 13 യൂനിറ്റ് വാഹനങ്ങളെത്തി മണിക്കൂറുകള്‍ എടുത്താണ് തീ പൂര്‍ണമായും അണച്ചത്.

പ്രദേശവാസികളും പൊലീസും ചേര്‍ന്ന് വിദ്യാര്‍ഥികളും സ്ത്രീകളും ഉള്‍പ്പെടെ പത്തുപേരെ കെട്ടിടത്തില്‍നിന്ന് പുറത്തെത്തിച്ചു. ഈ സമയം ഇബ്രാഹിം ഖലീമുള്ളയും കുടുംബവും കെട്ടിടത്തിലുണ്ടായിരുന്നു. പുകയില്‍ മുങ്ങിയതോടെ രക്ഷാപ്രവര്‍ത്തനവും ദുഷ്‌കരമായി. ഫര്‍ണിച്ചര്‍ കടയിലുണ്ടായ ഷോര്‍ട്ട് സര്‍ക്യൂട്ടാണ് അപകടകാരണമെന്ന് സംശയിക്കുന്നതായി ഡി.സി.പി അനുചേത് പറഞ്ഞു. കടയുടമക്കെതിരെ ജെ.ജെ നഗര്‍ പൊലീസ് കേസെടുത്തിട്ടുണ്ട്. ഫര്‍ണിച്ചര്‍ നിര്‍മാണത്തിനുള്ള വസ്തുക്കള്‍ അശ്രദ്ധമായി സൂക്ഷിച്ചതാണ് വന്‍ ദുരന്തത്തിനു കാരണം.

വേഗം തീപിടിക്കുന്ന വസ്തുക്കളില്‍ തീപടര്‍ന്നതോടെ മറ്റു നിലകളിലേക്കും ആളിപ്പടര്‍ന്നു. ഇതുവഴി കടന്നുപോയ ഓട്ടോറിക്ഷ െ്രെഡവര്‍ മുഹമ്മദ് സുബൈറാണ് കെട്ടിടത്തില്‍നിന്ന് പുക ഉയരുന്നത് കണ്ടത്. പിന്നാലെ സമീപത്തുണ്ടായിരുന്നവരെയും പൊലീസിലും വിവരം അറിയിച്ചു. കെട്ടിടത്തിെന്റ പുറകുവശത്തെ ചുമര്‍ പൊളിച്ചാണ് അഗ്‌നിശമന സേന അകത്തുകടന്നത്. താഴത്തെ നില പൂര്‍ണമായും കത്തിനശിച്ചു. ലക്ഷങ്ങളുടെ നഷ്ടം കണക്കാക്കുന്നു. മരിച്ചവരുടെ മൃതദേഹങ്ങള്‍ വിക്ടോറിയ ആശുപത്രിയിലേക്ക് മാറ്റി. രക്ഷാപ്രവര്‍ത്തനത്തിനിടെ ഒരു പൊലീസുകാരനും പരിക്കേറ്റു.