6 കാളിദാസ് മാര്ഗില് ആരും താമസിക്കാന് ധൈര്യപ്പെടാത്തതിന് കാരണം
ഉത്തര്പ്രദേശ് മുഖ്യമന്ത്രി യോഗി ആദിത്യനാഥിന്റെ ഔദ്യോഗിക വസതിക്ക് സമീപം താമസിക്കാന് ആര്ക്കും ധൈര്യമില്ല. 5 കാളിദാസ് മാര്ഗ് ആണ് യു.പി മുഖ്യമന്ത്രിയുടെ ഔദ്യോഗിക വസതി. ഇതിനോട് തൊട്ട് ചേര്ന്നുള്ള 6 കാളിദാസ് മാര്ഗിലാണ് ആരും താമസിക്കാന് ധൈര്യപ്പെടാത്തത്. ഐ.എ.എസ് ഉദ്യോഗസ്ഥര്ക്കോ മന്ത്രിമാര്ക്കോ പോലും ഇവിടെ താമസിക്കാന് ധൈര്യമില്ല. 6 കാളിദാസ് മാര്ഗില് താമസിച്ചാല് രാഷ്ട്രീയ ഭാവി അവസാനിക്കുമെന്ന വിശ്വാസം നിലനില്ക്കുന്നുണ്ട്. ഇതാണ് ഈ വീട്ടില് താമസിക്കാന് ആരും തയ്യാറാകാത്തത്.
6 കാളിദാസ് മാര്ഗിലെ താമസക്കാരന് ജയിലിലാകുമെന്നോ മാരകമായ രോഗം ബാധിക്കുമെന്നോ ആണ് മറ്റൊരു വിശ്വാസം. 6 കാളിദാസ് മാര്ഗില് താമസിക്കാന് ആരും തയ്യാറാകുന്നില്ലെന്ന് യു.പി സര്ക്കാരിന്റെ എസ്റ്റേറ്റ് ഡിപ്പാര്ട്ട്മെന്റിലെ മുതിര്ന്ന ഉദ്യോഗസ്ഥന് സ്ഥിരീകരിച്ചു. നിര്ഭാഗ്യത്തിന്റെ പ്രതീകമായാണ് ഈ വീട് കണക്കാക്കപ്പെടുന്നത്. ആരും താമസിക്കാന് ധൈര്യപ്പെടാന് തയ്യാറാകാത്തതിനാല് 6 കാളിദാസ് മാര്ഗ് പൊളിച്ചു മാറ്റാനോ 7 കാളിദാസ് മാര്ഗുമായി കൂട്ടിയോജിപ്പിക്കാനോ അധികൃതര് ആലോചിക്കുന്നുണ്ട്.
ഉപമുഖ്യമന്ത്രി കേശവ പ്രസാദ് മൗര്യയുടെ ഔദ്യോഗിക വസതിയാണ് 7 കാളിദാസ് മാര്ഗ്. മുഖ്യമന്ത്രി യോഗി ആദിത്യനാഥിന്റെ സുരക്ഷാ ക്യാംപ് ആയി വീടിനെ മാറ്റാനും ആലോചനയുണ്ട്. സമാജ്വാദി പാര്ട്ടി നേതാവ് അമര് സിംഗ്, ബാബു സിംഗ് കശ്വാസ്, വഖാര് അഹമ്മദ് ഷാ തുടങ്ങിയവര് 6 കാളിദാസ് മാര്ഗിലെ താമസക്കാരായിരുന്നു. എല്ലാവര്ക്കും അശുഭകരമായ കാര്യങ്ങള് സംഭവിച്ചിട്ടുണ്ട്. ഏറ്റവും ഒടുവില് ഇവിടെ താമസിച്ച ജാവേദ് അബ്ദിക്ക് അഖിലേഷ് യാദവ് മന്ത്രി പദവി നല്കിയെങ്കിലും മാസങ്ങള്ക്കകം അദ്ദേഹം പുറത്തായി.
ഇതിന് മുന്പ് ഈ വീട്ടില് താമസിച്ച ബാബു സിംഗ് കശ്വാസ് അന്നത്തെ യു.പി മുഖ്യമന്ത്രി മായാവതിയുടെ വലംകൈ ആയിരുന്നു. എന്നാല് അഴിമതിക്കേസില് ഉള്പ്പെട്ട് ബാബു സിംഗിന് പിന്നീട് ജയിലില് പോകേണ്ടി വന്നു. ഈ വസതിയിലെ താമസക്കാരനായിരിക്കെയാണ് വോട്ടിന് നോട്ട് കേസില് അമര് സിംഗ് ജയിലിലായത്. അതിന് ശേഷം അമര് സിംഗിന്റെ രാഷ്ട്രീയ ജീവിതം തന്നെ ഏതാണ്ട് അവസാനിച്ച മട്ടാണ്. 6 കാളിദാസ് മാര്ഗിലെ താമസക്കാരായിരുന്ന ഉദ്യോഗസ്ഥരായ നീര യാദവ്, പ്രദീപ് ശുക്ല എന്നിവരും അഴിമതി കേസില് ജയിലില് പോയിട്ടുണ്ട്.
https://www.facebook.com/Malayalivartha
