തമിഴ്‌നാട്ടിലെ ആര്‍കെ നഗര്‍ ഉപതിരഞ്ഞെടുപ്പ് റദ്ദാക്കിയ കേന്ദ്ര തിരഞ്ഞെടുപ്പ് കമ്മിഷന്റെ നടപടിയെ ജനാധിപത്യ വിരുദ്ധം' എന്നു വിശേഷിപ്പിച്ച് അണ്ണാ ഡിഎംകെയിലെ ശശികല പക്ഷം രംഗത്ത്.
താന്‍ ജയിക്കരുതെന്നുള്ള തിരഞ്ഞെടുപ്പ് കമ്മിഷന്റെ ആഗ്രഹമാണ് തിരഞ്ഞെടുപ്പ് റദ്ദാക്കാന്‍ കാരണമെന്ന് ശശികല പക്ഷത്തിന്റെ സ്ഥാനാര്‍ഥിയായ ടി.ടി.വി. ദിനകരന്‍ ആരോപിച്ചു. വോട്ടര്‍മാരെ സ്വാധീനിക്കാന്‍ വന്‍തോതില്‍ പണമൊഴുക്കിയെന്ന ആരോപണത്തിന്റെ പശ്ചാത്തലത്തിലാണ് ആര്‍കെ നഗറിലെ ഉപതിരഞ്ഞെടുപ്പ് കേന്ദ്ര തിരഞ്ഞെടുപ്പു കമ്മിഷന്‍ റദ്ദാക്കിയത്.

തിരഞ്ഞെടുപ്പ് മാറ്റിവച്ച തിരഞ്ഞെടുപ്പ് കമ്മിഷന്റെ നടപടി തെറ്റാണ്. എന്തുകൊണ്ടാണ് അവര്‍ ഇങ്ങനെ ചെയ്തതെന്ന് അറിയില്ല. ഞാന്‍ തിരഞ്ഞെടുക്കപ്പെടുന്നതില്‍ താല്‍പര്യക്കുറവ് ഉള്ളതുകൊണ്ടാകാം അവര്‍ തിരഞ്ഞെടുപ്പ് നീട്ടിവച്ചത്. ഇത് ജനാധിപത്യ വിരുദ്ധമാണ് ദിനകരന്‍ പറഞ്ഞു. തങ്ങള്‍ പണം വിതരണം ചെയ്തിട്ടില്ലെന്നും പുറത്തുവന്ന രേഖകള്‍ക്ക് ആധികാരികതയില്ലെന്നും ദിനകരന്‍ നേരത്തെ പ്രതികരിച്ചിരുന്നു. അതേസമയം, അണ്ണാ ഡിഎംകെയിലെ തന്നെ ഒ.പനീര്‍സെല്‍വം വിഭാഗവും തമിഴ്‌നാട്ടിലെ ബിജെപി നേതൃത്വവും തിരഞ്ഞെടുപ്പ് നീട്ടിവച്ച നടപടിയെ സ്വാഗതം ചെയ്തു.

മന്ത്രിമാരും എംപിയും വഴി 89 കോടി രൂപ ശശികല പക്ഷമായ അണ്ണാ ഡിഎംകെ (അമ്മ) വിതരണം ചെയ്തതായുള്ള രേഖകള്‍ ആദായനികുതി വകുപ്പിന്റെ പരിശോധനയില്‍ കണ്ടെത്തിയതാണു വഴിത്തിരിവായത്. സംസ്ഥാന ആരോഗ്യമന്ത്രി വിജയഭാസ്‌കറുമായി ബന്ധപ്പെട്ട അന്‍പതോളം കേന്ദ്രങ്ങളില്‍ നടന്ന റെയ്ഡിന്റെ വിശദാംശങ്ങള്‍ സെന്‍ട്രല്‍ ബോര്‍ഡ് ഓഫ് ഡയറക്ട് ടാക്‌സസ് (സിബിഡിടി) തിരഞ്ഞെടുപ്പു കമ്മിഷനെ അറിയിച്ചിരുന്നു. ഇതിന്റെ പശ്ചാത്തലത്തിലാണ് കേന്ദ്ര തിരഞ്ഞെടുപ്പു കമ്മിഷന്‍ യോഗം ചേര്‍ന്നു സ്ഥിതി വിലയിരുത്തിയത്. ഡപ്യൂട്ടി തിരഞ്ഞെടുപ്പു കമ്മിഷണര്‍ ഉമേഷ് സിന്‍ഹ, തമിഴ്‌നാട് മുഖ്യ തിരഞ്ഞെടുപ്പ് ഓഫിസര്‍ രാജേഷ് ലഖോനി, സ്‌പെഷല്‍ ചീഫ് തിരഞ്ഞെടുപ്പു കമ്മിഷണര്‍ വിക്രം ബത്ര എന്നിവരും യോഗത്തില്‍ പങ്കെടുത്തു.

മുഖ്യമന്ത്രി എടപ്പാടി കെ. പളനിസാമി ഉള്‍പ്പെടെ അഞ്ചു മന്ത്രിമാരും ഒരു എംപിയും മുഖേന വോട്ടര്‍മാര്‍ക്കു വിതരണം ചെയ്യാന്‍ പണം കൈമാറിയെന്നു വ്യക്തമാക്കുന്നതാണു പുറത്തായ രേഖകള്‍. 2.24 ലക്ഷം വോട്ടര്‍മാര്‍ക്ക് 4,000 രൂപവീതം നല്‍കാനായിരുന്നു പദ്ധതി. അതേസമയം, രേഖകളിലെ വിവരങ്ങള്‍ ആദായനികുതി വകുപ്പ് ഔദ്യോഗികമായി സ്ഥിരീകരിച്ചിട്ടില്ല.

'വോട്ടിനു നോട്ട്' ആരോപണത്തെ തുടര്‍ന്നു കഴിഞ്ഞ നിയമസഭാ തിരഞ്ഞെടുപ്പില്‍ അരവാക്കുറിച്ചി, തഞ്ചാവൂര്‍ മണ്ഡലങ്ങളിലെ വോട്ടെടുപ്പ് മാറ്റിവച്ചിരുന്നു. ആര്‍കെ നഗറിലെ സ്ഥിതി ഇതിനേക്കാള്‍ ഗുരുതരമാണെന്നാണു റിപ്പോര്‍ട്ടുകള്‍.

ഡല്‍ഹിയില്‍ ചേര്‍ന്ന അടിയന്തര യോഗത്തിനു ശേഷം ഇന്നലെ രാത്രി വൈകിയാണ് തിരഞ്ഞെടുപ്പ് നീട്ടിവച്ച് തിരഞ്ഞെടുപ്പ് കമ്മിഷന്‍ ഉത്തരവ് ഇറക്കിയത്. ബുധനാഴ്ച വോട്ടെടുപ്പ് നിശ്ചയിച്ചിരുന്ന മണ്ഡലത്തില്‍ ഇന്നാണ് പ്രചാരണം അവസാനിക്കേണ്ടിയിരുന്നത്. പുതിയ തീയതി പ്രഖ്യാപിച്ചിട്ടില്ല.