ലാഭവിഹിതം വര്‍ധിപ്പിക്കണമെന്ന പമ്പുടമകളുടെ ആവശ്യം എണ്ണക്കമ്പനികള്‍ പരിഗണിക്കാത്തതില്‍ പ്രതിഷേധിച്ച് പെട്രോള്‍ പമ്പുകള്‍ ഞായറാഴ്ചകളില്‍ അടച്ചിടാന്‍ തീരുമാനം. ഇന്ത്യന്‍ പെട്രോള്‍ ഡീലേഴ്‌സ് കണ്‍സോര്‍ഷ്യത്തിന്റെതാണ് തീരുമാനം. ഇതിനൊപ്പം തിങ്കള്‍ മുതല്‍ ശനി വരെയുള്ള ദിവസങ്ങളില്‍ രാവിലെ ഒന്‍പത് മുതല്‍ വൈകിട്ട് ആറുവരെയായി പമ്പുകളുടെ പ്രവര്‍ത്തനസമയം ക്രമീകരിക്കാനും തീരുമാനിച്ചിട്ടുണ്ട്.

50,000 ത്തോളം പെട്രോളിയം ഡീലേഴ്‌സ് അടങ്ങുന്ന അസോസിയേഷനാണ് ഇന്ത്യന്‍ പെട്രോള്‍ ഡീലേഴ്‌സ് കണ്‍സോര്‍ഷ്യം. പെട്രോള്‍ പമ്പുകളുടെ പ്രവര്‍ത്തന ചെലവ് കുറക്കുന്നതിനാണ് ഇത്തരമൊരു തീരുമാനമെന്നും അഖിലേന്ത്യാ തലത്തില്‍ ഇത് നടപ്പാക്കുമെന്നും കണ്‍സോര്‍ഷ്യം ഓഫ് ഇന്ത്യന്‍ പെട്രോളിയം ഡീലര്‍ ജനറല്‍ സെക്രട്ടറി രവി ഷിന്‍ഡെ അറിയിച്ചു. മെയ് 10 ന് പെട്രോള്‍ ഡീലേഴ്‌സിന് നോ പഴ്‌ച്ചേസ് ഡേ ആയിരിക്കും. തങ്ങളുടെ തീരുമാനം ജനങ്ങളെ ബുദ്ധിമുട്ടിക്കാനല്ലെന്നും എണ്ണ കമ്പനികളോടുള്ള പ്രതിഷേധ സൂചനകമാണെന്നും അദ്ദേഹം പറഞ്ഞു.

ഓയില്‍ മാര്‍ക്കറ്റിംഗ് കമ്പനികള്‍ കമ്മീഷന്‍ നിരക്കില്‍ മാറ്റംവരുത്തുമെന്ന് പ്രഖ്യാപിച്ചതിനാലാണ് ജനുവരി മുതല്‍ നടത്താനിരുന്ന സമരം പിന്‍വലിച്ചത്. എന്നാല്‍ നാലു മാസമായിട്ടും ഒന്നും സംഭവിച്ചില്ലെന്ന് ഷിന്‍ഡെ പറഞ്ഞു. കമ്മിഷന്‍ ഉള്‍പ്പെടെയുള്ള കാര്യങ്ങളില്‍ അനുകൂല തീരുമാനം എടുക്കണമെന്ന് പമ്പുടമകളുടെ നിരന്തരമായ ആവശ്യം എണ്ണകമ്പനികള്‍ അവഗണിക്കുകയാണ്. വില്‍പനയുമായി ബന്ധപ്പെട്ട് അപൂര്‍വ ചന്ദ്ര കമ്മിറ്റി നിശ്ചയിച്ചപ്രകാരമുള്ള വിഹിതം നല്‍കാമെന്ന് എണ്ണക്കമ്പനികള്‍ നേരത്തെ പമ്പുടമകള്‍ക്ക് ഉറപ്പ് നല്‍കിയിരുന്നു. എന്നാല്‍ ഇത് ഇതുവരെ നടപ്പായിട്ടില്ല.

കമ്മിറ്റി റിപ്പോര്‍ട്ട് പ്രകാരം പെട്രോള്‍ കിലോ ലിറ്ററിന് 3,333 രൂപയും ഡീസല്‍ കിലോ ലിറ്ററിന് 2,126 രൂപയും പമ്പുടമകള്‍ക്ക് നല്‍കണം. നിലവില്‍ പെട്രോളിന് 2,570 രൂപയും ഡീസലിന് 1,620 രൂപയുമാണ് ലഭിക്കുന്നത്.