ജമ്മു കശ്മീരിലെ ശ്രീനഗറില്‍ ഉപതിരഞ്ഞെടുപ്പിനിടെ ജവാന്‍മാരെ നാട്ടുകാരില്‍ ചിലര്‍ മര്‍ദ്ദിച്ച സംഭവത്തില്‍ അഞ്ചുപേരെ പൊലീസ് പിടികൂടി അറസ്റ്റു ചെയ്തു. ജവാനെ ജനക്കൂട്ടം മര്‍ദ്ദിക്കുന്നതിന്റെ വിഡിയോ കഴിഞ്ഞ ദിവസം പുറത്തുവന്നിരുന്നു. ഇതിനു പിന്നാലെയാണ് സംഭവത്തില്‍ പങ്കുണ്ടെന്ന് കണ്ടെത്തിയ അഞ്ചു പേരെ അറസ്റ്റു ചെയ്തത്. ബുദ്ഗാം ജില്ലയിലെ ചഡൂറാ പ്രദേശത്തുനിന്നുള്ളവരാണ് ഇവര്‍. ശ്രീനഗര്‍ ഉപതിരഞ്ഞെടുപ്പിന്റെ വോട്ടെടുപ്പ് അവസാനിച്ചശേഷം ചില യുവാക്കള്‍ ചേര്‍ന്ന് ഡ്യൂട്ടിയിലുണ്ടായിരുന്ന സിആര്‍പിഎഫ് സംഘാംഗത്തെ മര്‍ദ്ദിക്കുന്ന വിഡിയോയാണ് പുറത്തുവന്നത്.

ഏപ്രില്‍ ഒന്‍പതിനായിരുന്നു സംഭവം. എത്രത്തോളം വിഷമകരമായ സാഹചര്യത്തിലാണ് കശ്മീരില്‍ സൈന്യം സേവനമനുഷ്ഠിക്കുന്നത് എന്നതിന്റെ ഉദാഹരണമാണ് ഈ വിഡിയോയെന്ന് സിആര്‍പിഎഫ് ചൂണ്ടിക്കാട്ടി. മര്‍ദ്ദനമേറ്റിട്ടും സമചിത്തതയോടെ പെരുമാറിയ ജവാന്റെ പ്രവര്‍ത്തിയെയും അവര്‍ പുകഴ്ത്തി.

അതിനിടെ, സൈന്യത്തിനെതിരെ കല്ലെറിഞ്ഞ പ്രതിഷേധക്കാരിലൊരാളെ ശിരസില്‍ നിറയൊഴിച്ചു കൊലപ്പെടുത്തിയ ജവാനെതിരെ എഫ്‌ഐആര്‍ റജിസ്റ്റര്‍ ചെയ്തതായി സംസ്ഥാന പൊലീസ് മേധാവി എസ്.പി. വയീദ് അറിയിച്ചു. ഈ സംഭവത്തിന്റെ വിഡിയോയും പുറത്തുവന്നിരുന്നു. സംഭവം വലിയ പ്രതിഷേധങ്ങള്‍ക്ക് ഇടയാക്കിയതിനു പിന്നാലെയാണ് ജവാനെതിരെ കേസ് റജിസ്റ്റര്‍ ചെയ്തത്. ഉപതിരഞ്ഞെടുപ്പിനിടെ സൈന്യവും നാട്ടുകാരും തമ്മിലുണ്ടായ ഏറ്റുമുട്ടലില്‍ എട്ടുപേര്‍ കൊല്ലപ്പെട്ടിരുന്നു.