ജിഎസ്ടി നടപ്പാക്കുന്നതോടെ ജൂലൈ ഒന്നു മുതല്‍ മൊബൈല്‍ ഫോണുകളും ലാപ്‌ടോപ്പുകളും ഉള്‍പ്പെടെയുള്ള ഗാഡ്ജറ്റുകള്‍ക്ക് വിലകൂടും. നികുതി വര്‍ധിച്ചതിനാല്‍ അടുത്ത മാസം മുതല്‍ ഫോണ്‍ ബില്‍ തുകയും ഉയരും.
ഇന്ത്യയില്‍ നിര്‍മ്മിക്കുന്ന ഫോണുകള്‍ക്ക് 45 ശതമാനം വരെ വില വര്‍ധിക്കുമെന്നാണ് റിപ്പോര്‍ട്ടുകള്‍. 12 ശതമാനമാണ് മൊബൈല്‍ ഫോണുകളുടെ ജിഎസ്ടി. അതേസമയം ഇറക്കുമതി ചെയ്യുന്ന ഫോണുകളുടെ വില കുറയും.

എന്നാല്‍ ഈ വര്‍ഷം ആദ്യപാദത്തിലെ കണക്കനുസരിച്ച് രാജ്യത്ത് വിറ്റ 80% ഫോണുകളും തദ്ദേശീയമായി നിര്‍മ്മിച്ചവയാണ്.

ഫോണുകള്‍ക്കൊപ്പം ലാപ്‌ടോപ്പുകള്‍ക്കും ഡെസ്‌ക്‌ടോപ്പുകള്‍ക്കും വില വര്‍ധിക്കും. 14-15 ശതമാനം ലെവി ഉണ്ടായിരുന്ന ഇവയ്ക്ക് 18 ശതമാനം ജിഎസ്ടിയാണ് ചുമത്തിയിരിക്കുന്നത്. 28 ശതമാനം ജിഎസ്ടി വിഭാഗത്തില്‍ വരുന്ന കംപ്യൂട്ടര്‍ മോണിറ്ററുകളുടെയും പ്രിന്ററുകളുടെയും വില മേലോട്ട് തന്നെയാകും.

ഡിജിറ്റല്‍ ക്യാമറയും ക്യാംകോഡറുകളും ഉള്‍പ്പെടെയുള്ളവയും 28 ശതമാനം കാറ്റഗറിയിലാണ്. ഇവയ്ക്കും 45 ശതമാനം വിലവര്‍ധന പ്രതീക്ഷിക്കാം.

ജിഎസ്ടി മൊബൈല്‍ ചാര്‍ജുകളെയും ബാധിക്കും. മൊബൈല്‍ ബില്ലുകളുടെ ജിഎസ്ടി 15 ശതമാനത്തില്‍ നിന്ന് 18 ശതമാനത്തിലേക്ക് വര്‍ദ്ധിച്ചിട്ടുണ്ട്. പ്രീപെയ്ഡ് ഉപയോക്താക്കള്‍ക്ക് ടോക്ക് ടൈമില്‍ കുറവുണ്ടാകും. 100 രൂപയ്ക്ക് 85 രൂപ ടോക്ക് ടൈം എന്നത് ജിഎസ്ടി വരുന്നതോടെ 82 രൂപ ടോക്ക് ടൈം ആയി കുറയുമെന്നാണ് റിപ്പോര്‍ട്ടുകള്‍.