അഞ്ചുദിവസത്തിനിടെ രണ്ടു തവണ എവറസ്റ്റ് കീഴടക്കിയ അരുണാചല്‍പ്രദേശ് സ്വദേശിനി അന്‍ഷു ജംസെന്‍പയ്ക്കു റെക്കോഡ്. ഇത്രയും ചുരുങ്ങിയ ദിവസങ്ങള്‍ക്കിടെ രണ്ടുതവണ എവറസ്റ്റില്‍ കയറിയ ലോകത്തിലെ ആദ്യ വനിതയെന്ന റെക്കോഡാണ് അന്‍ഷു സ്വന്തമാക്കിയത്.

ഇത് അഞ്ചാംതവണയാണു അന്‍ഷു എവറസ്റ്റ് കീഴടക്കുന്നത്, മേയ് 16നു ശേഷം രണ്ടാംതവണയും. കഴിഞ്ഞ ശനിയാഴ്ച രാവിലെയാണു 17,500 അടി ഉയരത്തിലുള്ള ബേസ് ക്യാമ്പില്‍നിന്നു റെക്കോഡ് ലക്ഷ്യംവച്ചുള്ള അന്‍ഷുവിന്റെ മലകയറ്റം ആരംഭിച്ചത്. ഇന്നലെ രാവിലെ 7.45ന് അന്‍ഷു ലക്ഷ്യത്തിലെത്തി.

ഓള്‍ അരുണാചല്‍പ്രദേശ് മൗണ്ടനീയറിങ് ആന്‍ഡ് അഡ്വഞ്ചര്‍ സ്‌പോര്‍ട്‌സ് അസോസിയേഷന്‍ പ്രസിഡന്റ് സെറിങ് വാങ്ങെയാണു അന്‍ഷുവിന്റെ ഭര്‍ത്താവ്. അരുണാചലിലെ വെസ്റ്റ് കാമെങ് ജില്ലയിലെ ബോംദിലയില്‍ താമസിക്കുന്ന ദമ്പതികള്‍ക്ക് രണ്ടു കുട്ടികളുണ്ട്.

ഇതാദ്യമായല്ല തുടര്‍ച്ചയായി രണ്ടു തവണ അന്‍ഷു ജംസെന്‍പ എവറസ്റ്റിനു മുകളിലെത്തുന്നത്. 2011ലും അവര്‍ ഈ നേട്ടം കൈവരിച്ചിരുന്നു. എന്നാല്‍, 2011 മേയ് 12 മുതല്‍ 21 വരെയുള്ള പത്തു ദിവസത്തിനിടയിലായിരുന്നു അത്. തുടര്‍ന്ന് 2013 മേയ് 18ന് വീണ്ടും അന്‍ഷു എവറസ്റ്റ് കീഴടക്കി. അന്‍ഷുവിനെ അരുണാചല്‍പ്രദേശ് മുഖ്യമന്ത്രി പേമ ഖണ്ഡു അഭിനന്ദനം അറിയിച്ചു.