കശാപ്പ് നിരോധിച്ചുള്ള കേന്ദ്രസര്‍ക്കാര്‍ ഉത്തരവിനെതിരെ വന്‍ പ്രതിഷേധം.  ഉത്തരവ് വലിച്ച് കീറി ചവറ്റുകൊട്ടയിലെറിയണമെന്ന് കോണ്‍ഗ്രസ് എ.ഐ.സി.സി അംഗം എ.കെ ആന്റണി. ആര്‍.എസ്.എസ് അജണ്ടയാണ് കേന്ദ്രസര്‍ക്കാര്‍ നടപ്പിലാക്കുന്നതെന്നും ആന്റണി കുറ്റപ്പെടുത്തി. മോദിക്കെതിരായ പോരാട്ടത്തിന്റ ആദ്യ പടിയാണ് സോണിയയുടെ നേതൃത്വത്തില്‍ വെള്ളിയാഴ്ച നടന്ന പ്രതിപക്ഷ പാര്‍ട്ടികളുടെ യോഗം. സംസ്ഥാന തലത്തില്‍ പാര്‍ട്ടികള്‍ തമ്മില്‍ അഭിപ്രായ ഭിന്നതകളുണ്ടെങ്കിലും ജനതാല്‍പര്യവും മതനിരപേക്ഷതയും സംരക്ഷിക്കാന്‍ എല്ലാ പാര്‍ട്ടികളും ഒരുമിച്ച് നില്‍ക്കണമെന്നും ആന്റണി പറഞ്ഞു. എല്ലാ നിയമങ്ങളും ലംഘിച്ചാണ് മോദി സര്‍ക്കാറിെന്റ പ്രവര്‍ത്തനമെന്നും അദ്ദേഹം കൂട്ടിച്ചേര്‍ത്തു.

നേരത്തെ സി.പി.എം അടക്കമുള്ള പ്രതിപക്ഷ പാര്‍ട്ടികളുമായി സഖ്യത്തിലത്താന്‍ തയാറാണെന്ന് എ.കെ ആന്റണി നിലപാടെടുത്തിരുന്നു. എന്നാല്‍ സഖ്യത്തോട് പ്രതികൂലമായാണ് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പ്രതികരിച്ചത്. ഇതിന് പിന്നാലെയാണ് നിലപാട് എ.കെ ആന്റണി ആവര്‍ത്തിച്ചിരിക്കുന്നത്. ബീഫ് നിരോധനം ജനങ്ങളുടെ ഭക്ഷണ സ്വാതന്ത്രത്തിലേക്കുള്ള കടന്നു കയറ്റമാണെന്നും പ്രമുഖര്‍ കൂട്ടി ചേര്‍ക്കുന്നു.