ഹിസ്ബുല്‍ മുജാഹിദീന്‍ കമാന്‍ഡറും കശ്മീരില്‍ കൊല്ലപ്പെട്ട ബുര്‍ഹാന്‍ വാനിയുടെ പിന്‍ഗാമിയുമായ സബ്‌സര്‍ അഹമ്മദ് ഭട്ട് ഇന്ത്യന്‍ സൈന്യവുമായുള്ള ഏറ്റുമുട്ടലില്‍ കൊല്ലപ്പെട്ടതായി റിപ്പോര്‍ട്ട്. ദക്ഷിണ കശ്മിരിലെ ത്രാല്‍ പ്രദേശത്ത് ഇന്നു രാവിലെ നടന്ന ഏറ്റുമുട്ടലിലാണു ഭട്ട് കൊല്ലപ്പെട്ടതെന്നാണു വിവരം. ഒരു മണിക്കൂറിലധികം നീണ്ടുനിന്ന പോരാട്ടത്തില്‍ രണ്ടു ഭീകരരെ സൈന്യം കൊലപ്പെടുത്തിയിരുന്നു. ഇതിലൊരാള്‍ സബ്‌സര്‍ അഹമ്മദ് ഭട്ടാണെന്നാണു വിവരം. സൈനികവൃത്തങ്ങളെ ഉദ്ധരിച്ചു ദേശീയ മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്.

വെള്ളിയാഴ്ച രാത്രി ഇവിടെ പട്രോളിങ് നടത്തുകയായിരുന്ന സൈനികര്‍ക്കു നേരെ ഭീകരര്‍ വെടിയുതിര്‍ത്തതോടെയാണ് ഏറ്റുമുട്ടല്‍ ആരംഭിച്ചത്. വെടിവയ്പിന്റെ പശ്ചാത്തലത്തില്‍ സൈന്യം നടത്തിയ പരിശോധനയില്‍ ഇവിടെ ഭീകരര്‍ ഒളിച്ചിരിക്കുന്നതായി കണ്ടെത്തി. തുടര്‍ന്ന് ഭീകരരുടെ ഒളിസങ്കേതം സൈന്യം വളയുകയായിരുന്നു. അതേസമയം, സബ്‌സര്‍ ഭട്ട് കൊല്ലപ്പെട്ടതായി വാര്‍ത്ത പരന്നതോടെ സൈന്യത്തിനു നേരെ കശ്മീരില്‍ കല്ലേറു വര്‍ധിച്ചതായി റിപ്പോര്‍ട്ടുണ്ട്. ഭീകരര്‍ക്കു പ്രദേശവാസികളുടെ സഹായം ലഭിക്കുന്ന സ്ഥലങ്ങള്‍ കശ്മീരില്‍ ഒട്ടേറെയുണ്ട്. നേരത്തെ, ബുര്‍ഹാന്‍ വാനി കൊല്ലപ്പെട്ടതിനു പിന്നാലെ കശ്മീര്‍ താഴ്‌വരയില്‍ ഉടലെടുത്ത സംഘര്‍ഷം ഏറെ നാള്‍ നീണ്ടുനില്‍ക്കുകയും അക്രമങ്ങളില്‍ ഒട്ടേറെപ്പേര്‍ കൊല്ലപ്പെടുകയും ചെയ്തിരുന്നു.

അതിനിടെ, ജമ്മു കശ്മീരിലെ ബാരാമുല്ലയിലെ റാംപൂര്‍ സെക്ടറില്‍ നുഴ!ഞ്ഞുകയറ്റശ്രമം തകര്‍ത്ത സൈന്യം ഇതുവരെ നാലു ഭീകരരെ വധിച്ചതായാണു റിപ്പോര്‍ട്ട്. വെള്ളിയാഴ്ച രാത്രി ആരംഭിച്ച വെടിവയ്പ്പ് രാവിലെയും തുടര്‍ന്നു. ഇന്നലെ നാലു ഭീകരരെയും ഇന്ന് രണ്ടുപേരെയും സൈന്യം വധിച്ചു. രാവിലെ തിരച്ചില്‍ നടത്തുന്നതിനിടെ വീണ്ടും വെടിവയ്പ് ഉണ്ടാകുകയായിരുന്നു. രഹസ്യവിവരത്തെത്തുടര്‍ന്ന് റാംപുരിന് 10 കിലോമീറ്റര്‍ മാറി തെക്കന്‍ ഭാഗത്ത് ഇന്നലെ രാത്രി ഏഴരയോടെയാണ് സൈന്യം ഇറങ്ങിയത്. 8.20 വരെ ഏറ്റുമുട്ടല്‍ തുടര്‍ന്നു.

ഇരുപത്തിനാലു മണിക്കൂറിനിടെ നടക്കുന്ന രണ്ടാമത്തെ നുഴഞ്ഞുകയറ്റ ശ്രമമാണിത്. വെള്ളിയാഴ്ച പാക്കിസ്ഥാന്‍ ബോര്‍ഡര്‍ ആക്ഷന്‍ ടീം ഉറിയില്‍ നുഴഞ്ഞുകയറാന്‍ ശ്രമിച്ചിരുന്നു. ആയുധധാരികളായ ഇവര്‍ക്കെതിരെ നടത്തിയ വെടിവയ്പ്പില്‍ രണ്ടു ഭീകരരാണ് കൊല്ലപ്പെട്ടത്. ഇന്ത്യന്‍ സൈനിക സംഘത്തിനു നേരെ ഇവര്‍ വെടിയുതിര്‍ത്തപ്പോള്‍ പ്രത്യാക്രമണം നടത്തുകയായിരുന്നു. ഇന്ത്യയില്‍ ആക്രമണം നടത്തുക എന്ന ഉദ്ദേശ്യത്തോടെ എത്തിയ സംഘത്തില്‍നിന്ന് എ കെ47 തോക്ക് ഉള്‍പ്പെടെയുള്ള ആയുധങ്ങള്‍ പിടിച്ചെടുത്തു.

കൊടുംഭീകരരെ ഉള്‍പ്പെടുത്തി പാക്ക് സൈന്യം രൂപീകരിച്ചിട്ടുള്ള പ്രത്യേക സംഘമാണു ബാറ്റ്. ഈ മാസമാദ്യം കൃഷ്ണഘാട്ടിയില്‍ രണ്ട് ഇന്ത്യന്‍ സൈനികരെ വധിച്ചു തലയറുത്തത് ബാറ്റ് സംഘമായിരുന്നു.