വീണ്ടും രാജ്യം സിക വൈറസ് ഭീതിയില്‍. ബ്രസീല്‍ ഉള്‍പ്പെടെയുള്ള ലാറ്റിനമേരിക്കന്‍ രാജ്യങ്ങളില്‍ വ്യാപകമായി റിപ്പോര്‍ട്ട് ചെയ്യപ്പെട്ട സിക വൈറസ് ബാധ ഇന്ത്യയിലും. അഹമ്മദാബാദില്‍നിന്നാണ് ഇന്ത്യയില്‍ ആദ്യമായി സിക വൈറസ് ബാധ റിപ്പോര്‍ട്ട് ചെയ്തിരിക്കുന്നത്. മൂന്ന് പേരിലാണ് സിക വൈറസ് സ്ഥിരീകരിച്ചിരിക്കുന്നതെന്ന് ലോകാരോഗ്യ സംഘടന അറിയിച്ചു. മൂന്നു പേരില്‍ ഒരാള്‍ ഗര്‍ഭിണിയാണെന്നതും ആശങ്ക വര്‍ധിപ്പിക്കുന്നു. അഹമ്മദാബാദിലെ ബാപുനഗറില്‍നിന്നാണ് മൂന്നു കേസുകളും റിപ്പോര്‍ട്ട് ചെയ്തിരിക്കുന്നത്.
സാധാരണഗതിയില്‍ അപകടകാരിയല്ലെങ്കിലും ഗര്‍ഭസ്ഥ ശിശുക്കളെ ബാധിച്ചാല്‍ ഗുരുതര പ്രത്യാഘാതങ്ങളുണ്ടാക്കുമെന്നതാണ് സിക ഭീതി വിതയ്ക്കാന്‍ കാരണം. നാഡീവ്യൂഹത്തെ ഗുരുതരമായി ബാധിക്കുന്ന വൈറസാണ് സിക. ബ്രസീലില്‍ 2400 നവജാതശിശുക്കളിലാണ് വൈറസ് ബാധ കണ്ടെത്തിയത്. ബ്രസീലില്‍ അമ്മമാരില്‍ സിക കാര്യമായ പ്രശ്‌നങ്ങളുണ്ടാക്കിയില്ലെങ്കിലും കുട്ടികളില്‍ ഗുരുതര പ്രശ്‌നങ്ങള്‍ക്ക് കാരണമായി. രോഗം ബാധിച്ചാല്‍ പിറക്കുന്ന ശിശുക്കളുടെ ശിരസ് ചുരുങ്ങിയ അവസ്ഥയിലായിരിക്കും. മൈക്രോ സാഫാലി എന്നാണ് ഈ അവസ്ഥയ്ക്ക് പറയുന്നത്. ഇങ്ങനെ ജനിക്കുന്ന കുട്ടികള്‍ വളരെ പെട്ടെന്ന് തന്നെ മരണത്തിന് കീഴടങ്ങും. ഗര്‍ഭസ്ഥ ശിശുക്കളുടെ തലച്ചോര്‍ വികാസം തടയുകയാണ് വൈറസ് ചെയ്യുന്നത്.
ഡെങ്കിപ്പനി, ചിക്കുന്‍ഗുനിയ എന്നീ രോഗങ്ങള്‍ പരത്തുന്ന ഈഡിസ് കൊതുകുകള്‍ തന്നെയാണ് സിക രോഗവും പകര്‍ത്തുന്നത്. രോഗിയുമായുള്ള ലൈംഗികബന്ധത്തിലൂടെയും രക്തദാനത്തിലൂടെയും രോഗം പകരാന്‍ സാധ്യതയുണ്ട്. വൈറസ് ബാധിച്ച അമ്മയില്‍നിന്നും കുഞ്ഞിലേക്ക് രോഗം പകരാം. ഡെങ്കിക്ക് സമാനമായ ലക്ഷണങ്ങളാണ് സികയ്ക്കും കാണപ്പെടുക.