ജമ്മു കശ്മീരില്‍ ഭീകരവിരുദ്ധ പോരാട്ടങ്ങള്‍ക്കെതിരെ ഒളിഞ്ഞിരിക്കുന്ന ഭീകരരെ കണ്ടെത്താന്‍ സൈന്യത്തിന്റെ പുതിയ തന്ത്രം. വാള്‍ റഡാറുകളാണ് ഇന്ത്യന്‍ സൈന്യം ഉപയോഗിക്കാന്‍ പദ്ധതിയിടുന്നത്. അമേരിക്കയില്‍ നിന്നും ഇസ്രായേലില്‍ നിന്നും ഇത്തരത്തിലുള്ള റഡാറുകള്‍ ഇന്ത്യ ഇറക്കുമതി ചെയ്തിട്ടുണ്ട്.ഭീകരവിരുദ്ധ ഓപ്പറേഷനിടെ കെട്ടിടങ്ങള്‍ക്കും വീടുകള്‍ക്കും ഉള്ളില്‍ ഒളിഞ്ഞിരിക്കുന്ന ഭീകരരെ എളുപ്പം കണ്ടെത്തി പിടികൂടാനാണ് ഇത്തരം ഹൈടെക് റഡാറുകള്‍ ഉപയോഗിക്കുക.

ചില സൈനിക വിഭാഗങ്ങള്‍ ഇതിനകം തന്നെ ഇത്തരം റഡാറുകള്‍ ഓപ്പറേഷന് വേണ്ടി ഉപയോഗിക്കുന്നുണ്ടെന്നും ചില സൈനിക വൃത്തങ്ങള്‍ വ്യക്തമാക്കുന്നു. ഇന്റലിജന്‍സ് റിപ്പോര്‍ട്ടിന്റെ അടിസ്ഥാനത്തില്‍ ഒളിഞ്ഞിരിക്കുന്ന ഭീകരരെ കണ്ടെത്തുന്നതില്‍ സൈന്യം പരാജയപ്പെടുന്നത് ഒഴിവാക്കാനാണ് സൈന്യത്തിന്റെ നിര്‍ണ്ണായ നീക്കം. ജനസാന്ദ്രതയേറിയ പ്രദേശങ്ങളില്‍ നിന്ന് ഭീകരരെ കണ്ടെത്താനുള്ള ബുദ്ധിമുട്ടുകള്‍ ഇല്ലാതാക്കുകയാണ് ലക്ഷ്യം.

റ!ഡാറുകളില്‍ ഘടിപ്പിച്ചിട്ടുള്ള മൈക്രോവേവ് റേഡിയേഷനാണ് ചവരുകള്‍ക്കപ്പുറത്ത് ഒളിഞ്ഞിരിക്കുന്ന ഭീകരരുടെ സാന്നിധ്യം തിരിച്ചറിഞ്ഞ് വിവരം നല്‍കുക. ചുവരുകള്‍, കോണ്‍ക്രീറ്റ് ചുവരുകള്‍ എന്നിവയ്ക്കുള്ളിലുള്ള ഭീകരരുടെ സാന്നിധ്യവും റഡാറിന് നല്‍കാന്‍ കഴിയും. ബെംഗളൂരു കേന്ദ്രമാക്കി പ്രവര്‍ത്തിയ്ക്കുന്ന ഡിഫന്‍സ് റിസര്‍ച്ച് ആന്‍ഡ് ഡെവലപ്പ്‌മെന്റ് ഓര്‍ഗനൈസേഷന്റെ ഇലക്ട്രോണിക്‌സ് ആന്‍ഡ് റഡാര്‍ ഡെവലപ്പ്‌മെന്റ് എസ്റ്റാബ്ലിഷ്‌മെന്റും ഇത്തരത്തിലുള്ള റഡാറുകള്‍ വികസിപ്പിച്ചെടുക്കാനുള്ള ശ്രമം നടത്തിവരികയാണ്. 2016 ജൂലൈ എട്ടിന് ഹിസ്ബുള്‍ മുജാഹിദ്ദീന്‍ ഭീകരന്‍ ബര്‍ഹാന്‍ വാനിയെ കണ്ടെത്തി വധിക്കുന്നത് മൂന്ന് റൗണ്ട് തിരച്ചില്‍ നടത്തിയ ശേഷമാണ് ഇത്തരം സാഹചര്യങ്ങള്‍ ഒഴിവാക്കുകയെന്ന ഉദ്ദേശ്യവും ഇതിന് പിന്നിലുണ്ട്.