ഗംഗാ നദി മലിനമാക്കുന്നവര്‍ക്കെതിരെ ഏഴു വര്‍ഷം വരെ തടവും 100 കോടി രൂപ വരെ പിഴയും. കേന്ദ്ര സര്‍ക്കാര്‍ നിയോഗിച്ച പ്രത്യേക സംഘമാണ് നിര്‍ദേശം മുന്നോട്ട് വച്ചത്. ഗംഗാ സംരക്ഷണ ബില്‍ 2017 എന്നപേരില്‍ പ്രത്യേക ബില്ലും പിന്നീട് നിയമവും രൂപീകരിക്കാനാണ് സംഘത്തിന്റെ നീക്കം.

ഗംഗയുടെ സ്വാഭാവിക ഒഴുക്കിനെ തടസപ്പെടുത്തുന്നതും, അനധികൃതമായി ഗംഗയുടെ തീരങ്ങള്‍ കയ്യേറുന്നതും, നദിയില്‍ മാലിന്യം തള്ളുന്നതുമെല്ലാം നിയമത്തിനുള്ളില്‍ വരും. റിട്ടയേര്‍ഡ് ജസ്റ്റിസ് ഗിരിധര്‍ മാളവ്യയുടെ നേതൃത്വത്തിലുള്ള സംഘമാണ് നിര്‍ദേശം നല്‍കിയത്. ഗംഗയ്ക്ക് ചുറ്റുമുള്ള ഒരു കിലോമീറ്ററില്‍ 'ജലസംരക്ഷണ' മേഖലയായി പ്രഖ്യാപിക്കണമെന്നാണ്അദ്ദേഹം നിര്‍ദേശിക്കുന്നത്.

വിശദപഠനത്തിനായി സര്‍ക്കാര്‍ ഇക്കാര്യങ്ങള്‍ കഴിഞ്ഞ ഏപ്രില്‍ മാസത്തില്‍ കേന്ദ്ര ജലമന്ത്രാലയത്തിനു സമര്‍പ്പിച്ചിരുന്നു. അവസാന ഉത്തരവിനു മുന്‍പ് ഉത്തരാഖണ്ഡ്, ഉത്തര്‍പ്രദേശ്, ജാര്‍ഖണ്ഡ്, ബിഹാര്‍ തുടങ്ങിയ സംസ്ഥാനങ്ങളുടെ നിര്‍ദേശവും പരിഗണിക്കുന്നുണ്ട്. ഉടന്‍ തന്നെ സംസ്ഥാനങ്ങളെ ഉള്‍പ്പെടുത്തി യോഗവും വിളിക്കുമെന്നു മന്ത്രാലയം അറിയിച്ചു.

ഇപ്പോള്‍ കോടിക്കണക്കിനു രൂപയാണ് ഗംഗാ ശുചീകരണത്തിനായി ഉപയോഗിക്കുന്നത്. ഇതുകൊണ്ടൊന്നും പൂര്‍ണ പരിഹാരം ലഭിക്കുന്നില്ല ഇതിനൊരു അറുതിയുണ്ടാകണമെങ്കില്‍ രാജ്യത്ത് കര്‍ശനമായ നിയമങ്ങള്‍ അത്യാവശ്യമാണ്.എങ്കില്‍ മാത്രമേ ജനങ്ങള്‍ തെറ്റുചെയ്യാതിരിക്കുകയുള്ളു. എന്ന് അഡ്വ. അരുണ്‍ കുമാര്‍ ഗുപ്ത പറഞ്ഞു.

സമിതി മുന്നോട്ടു വയ്ക്കുന്ന പ്രധാന നിര്‍ദേശങ്ങള്‍;

ഗംഗാ നദിയില്‍ നിന്നുള്ള മണല്‍വാരല്‍, മല്‍സ്യബന്ധനം തുടങ്ങിയവ കര്‍ശനമായും നിരോധിക്കും. ഇത് പാലിക്കാത്തവര്‍ക്ക് അഞ്ചു വര്‍ഷം വരെ ജയില്‍ ശിക്ഷയോ 50,000 രൂപ വരെ പിഴയോ നല്‍കും.

നദിയുടെ ഒഴുക്കിനെ തടസപ്പെടുത്തുന്ന രീതിയിലുള്ള അനധികൃത നിര്‍മാണങ്ങള്‍ രണ്ടുവര്‍ഷം തടവും 100 കോടി രൂപവരെ പിഴയും ശിക്ഷയായി നല്‍കേണ്ടിവരും.

ഗംഗാ നദിയിലോ അതിനോട് ചേര്‍ന്നുള്ള സ്ഥലങ്ങളിലോ ചെറിയ ജെട്ടികളോ, തുറമുഖങ്ങളോ, സ്ഥിരം കേന്ദ്രങ്ങളോ, നിര്‍മാണങ്ങളോ നടത്താന്‍ പാടില്ല. ഈ നിയമം തെറ്റിക്കുന്നവര്‍ക്ക് ഒരു വര്‍ഷം തടവും 50 കോടി രൂപവരെ പിഴയടക്കേണ്ടിവരും.