രാജ്യത്തെ സംസ്ഥാനങ്ങളുടെ മൊത്തം കടബാധ്യത ഈ വര്‍ഷം 36,01,300 കോടി രൂപയായി ഉയര്‍ന്നെന്ന് റിസര്‍വ് ബാങ്ക് ഓഫ് ഇന്ത്യയുടെ കണക്കുകള്‍ വ്യക്തമാക്കുന്നു. 1,82,310 കോടി രൂപയാണ് ഈ വര്‍ഷം മാര്‍ച്ചു വരെയുള്ള കണക്കനുസരിച്ച് കേരളത്തിന്റെ കടം.
സംസ്ഥാനങ്ങളുടെ സാമ്പത്തിക, സാമൂഹിക സ്ഥിതി വിശകലനം ചെയ്ത് ആര്‍.ബി.ഐ. ശനിയാഴ്ച പുറത്തിറക്കിയ കൈപ്പുസ്തകത്തിലാണ് കടബാധ്യത കുതിച്ചുയരുന്നതിന്റെ വിവരങ്ങളുള്ളത്. 1991ല്‍ 1.2 ലക്ഷം കോടി രൂപ മാത്രമായിരുന്ന സ്ഥാനത്താണ് മൊത്തം കടബാധ്യത 2017 മാര്‍ച്ചില്‍ 36 ലക്ഷം കോടിയായി ഉയര്‍ന്നതെന്ന് ഹാന്‍ഡ്ബുക്ക് ഓഫ് സ്റ്റാറ്റിസ്റ്റിക്‌സ് ഓണ്‍ ഇന്ത്യന്‍ സ്‌റ്റേറ്റ്‌സ് വ്യക്തമാക്കുന്നു. സംസ്ഥാനങ്ങളുടെ ധനക്കമ്മി 2016ല്‍ 4.93 ലക്ഷം കോടി രൂപയായി ഉയര്‍ന്നു. ഇത് 1991ല്‍ 18,790 കോടി രൂപയായിരുന്നു.
സംസ്ഥാനങ്ങളില്‍ ഉത്തര്‍പ്രദേശാണ് കടത്തിന്റെ കാര്യത്തില്‍ ഒന്നാമത്. 4.58 ലക്ഷം കോടിയിലേറെ രൂപയാണ് അവരുടെ മൊത്തം ബാധ്യത. മഹാരാഷ്ട്ര (3.93 ലക്ഷം കോടി), ബംഗാള്‍ (3.34 ലക്ഷം കോടി), രാജസ്ഥാന്‍ (2.32 ലക്ഷം കോടി) തമിഴ്‌നാട് (2.56 ലക്ഷം കോടി), ഗുജറാത്ത് (2.48 ലക്ഷം കോടി), കര്‍ണാടകം (1.98ലക്ഷം കോടി) എന്നിവയാണ് കടത്തിന്റെ കാര്യത്തില്‍ കേരളത്തിനു മുന്നിലുള്ള സംസ്ഥാനങ്ങള്‍.
കേരളത്തിന്റെ കടബാധ്യത 1991 മാര്‍ച്ചില്‍ 4,983 കോടി രൂപ മാത്രമായിരുന്നുവെന്ന് ആര്‍.ബി.ഐ.യുടെ പട്ടിക വ്യക്തമാക്കുന്നു. 2011 മാര്‍ച്ചില്‍ അത് 83,960 കോടി രൂപയായി. അഞ്ചു വര്‍ഷംകൊണ്ട് 2016 മാര്‍ച്ചോടെ കടബാധ്യത 1,59,960 കോടി രൂപയായി ഉയര്‍ന്നു. നിലവിലുള്ള ബാധ്യതയായ 1,82,310 കോടി രൂപയില്‍ 1,19,220 കോടി ആഭ്യന്തര കടമാണ്. 8,860 കോടി രൂപ കേന്ദ്ര വായ്പയും.
കേരളത്തിന്റെ ധനക്കമ്മി 1990-91 സാമ്പത്തിക വര്‍ഷം 800 കോടി രൂപ മാത്രമായിരുന്നു. 2010-11 വര്‍ഷം ഇത് 7730 കോടി രൂപയായി. 201516 വര്‍ഷം 17720 കോടി രൂപയായി. 2016-17 വര്‍ഷം ഇത് 23140 കോടി രൂപയായി ഉയരുമെന്നാണ് ബജറ്റില്‍ കണക്കാക്കിയിരിക്കുന്നത്.
സംസ്ഥാനങ്ങളിലെ വിവരങ്ങള്‍ ഉള്‍പ്പെടുത്തിക്കൊണ്ടുള്ള സമഗ്രമായ കൈപ്പുസ്തകം രണ്ടാം തവണയാണ് റിസര്‍വ് ബാങ്ക് പുറത്തിറക്കുന്നത്. കഴിഞ്ഞവര്‍ഷം ജൂണിലാണ് ആദ്യപതിപ്പ് ഇറക്കിയത്.