ഇന്ത്യ-ചൈന അതിര്ത്തിയില് യുദ്ധം മണക്കുന്നു;ചൈന തുടര്ച്ചയായി പ്രകോപനം സൃഷ്ടിക്കുന്നു
ചൈനീസ് സൈന്യം ഇന്ത്യയുടെ ഡോങ്ലാങ് പ്രദേശത്ത് അതിക്രമിച്ചു കടന്നുവെന്ന് വിദേശകാര്യ മന്ത്രാലയം സ്ഥിരീകരിച്ചു. ഇത് അതിര്ത്തിയില് നിലവിലുള്ള അവസ്ഥയെ മാറ്റുന്നതും ഗൗരവതരമായ സുരക്ഷാ പ്രത്യാഘാതങ്ങള് ഉണ്ടാക്കുന്നതുമാണ്. സിക്കിമിലെ ഡോങ്ലാങ് പ്രദേശത്ത് റോഡ് നിര്മിക്കാനുള്ള ചൈനയുടെ നീക്കം തികച്ചും ഉത്കണ്ഠാജനകമാണ്. സംയമനം പാലിക്കാനും തല്സ്ഥിതി നിലനിര്ത്താനും ചൈനയോട് ഇന്ത്യ അഭ്യര്ത്ഥിച്ചു. ഡോങ്ലാങ് പ്രദേശത്ത് നിയന്ത്രണരേഖയോടു ചേര്ന്ന് റോഡു നിര്മിക്കാനുള്ള നീക്കവുമായി മുന്നോട്ടുപോയാല് ഗുരുതരമായ പ്രത്യാഘാതങ്ങളുണ്ടാക്കുമെന്നും ഇന്ത്യ മുന്നറിയിപ്പു നല്കി.
2012-ല് ഇരുരാജ്യങ്ങളുമായുണ്ടാക്കിയ ഉഭയകക്ഷി കരാറിന് വിരുദ്ധമാണ് ഈ റോഡു നിര്മാണമെന്ന് ഇന്ത്യ ചൂണ്ടിക്കാട്ടി. മേഖലയില് ഗുരുതരമായ സുരക്ഷാ പ്രശ്നങ്ങള്ക്ക് ഇതു വഴിതെളിക്കും. ഇപ്പോഴത്തെ അവസ്ഥ മാറി കൂടുതല് സംഘര്ഷഭരിതമായ അന്തരീക്ഷം രൂപംകൊള്ളുന്നതിന് ഇതു കാരണമാകുമെന്നും ഇന്ത്യന് വിദേശകാര്യ മന്ത്രാലയം പ്രസ്താവനയില് വ്യക്തമാക്കി. സിക്കിമില് ഇക്കഴിഞ്ഞ ജൂണ് 26-ന് ഇന്ത്യന് സൈനികര് ചൈനീസ് അതിര്ത്തി കടന്നകയറാന് ശ്രമിച്ചെന്ന ചൈനയുടെ ആരോപണത്തെ തള്ളിക്കൊണ്ടാണ് ഇന്ത്യന് വിദേശകാര്യ മന്ത്രാലയം നിലപാട് വ്യക്തമാക്കിയത്. ചൈന നടത്തുന്ന റോഡു നിര്മാണം നിയമവിരുദ്ധമാണെന്നു വ്യക്തമാക്കി ഭൂട്ടാന് അധികൃതരും രംഗത്തെത്തിയിരുന്നു.
അതിര്ത്തിയില് അടുത്തിടെയായി ചൈന സൃഷ്ടിക്കുന്ന പ്രകോപനങ്ങള് ഇന്ത്യ ഗൗരവമായാണ് കാണുന്നതെന്നു പ്രസ്താവനയിലുണ്ട്. അതിര്ത്തിയിലെ റോഡു നിര്മാണവുമായി ചൈന മുന്നോട്ടുപോകുന്നത് നിലവിലെ സമാധാനാന്തരീക്ഷം തകര്ക്കുമെന്നും ഇന്ത്യയെ സംബന്ധിച്ചിടത്തോളം ഗുരുതരമായ സുരക്ഷാ പ്രശ്നങ്ങള് സൃഷ്ടിക്കുമെന്നും ചൈനീസ് സര്ക്കാരിനെ അറിയിച്ചിട്ടുണ്ടെന്ന് വിദേശകാര്യ മന്ത്രാലയം വ്യക്തമാക്കി.
അതിനിടെ, നാഥുലാ ചുരം വഴിയുള്ള മാനസസരോവര് തീര്ഥയാത്ര ഉപേക്ഷിക്കുന്നതായി ഇന്ത്യ പ്രഖ്യാപിച്ചു. സിക്കിമിലെ അതിര്ത്തി മേഖലയില് ഇരുരാജ്യങ്ങളും തമ്മിലുള്ള സംഘര്ഷം വര്ധിച്ച സാഹചര്യത്തിലാണിത്. മാനസസരോവറിലേക്കുള്ള 47 അംഗ തീര്ഥാടക സംഘത്തെ ചൈന നേരത്തേ മടക്കിയിരുന്നു. ജൂണ് ആദ്യവാരം ഡോങ്ലാങ് മേഖലയില് നിയന്ത്രണരേഖയ്ക്കു സമീപം ചൈന റോഡ് നിര്മിക്കുന്നത് ഇന്ത്യന് സൈനികര് തടഞ്ഞതിനെ തുടര്ന്നാണ് അതിര്ത്തിയില് സംഘര്ഷം ഉടലെടുത്തത്. ഇതിന്റെ പ്രതികരണമായി രണ്ടു താല്ക്കാലിക ഇന്ത്യന് ബങ്കറുകള്ക്കു നാശനഷ്ടമുണ്ടാക്കിയ ചൈന, മാനസസരോവര് തീര്ഥാടക സംഘത്തെ മടക്കി അയയ്ക്കുകയും ചെയ്തിരുന്നു. സുരക്ഷാകാരണങ്ങള് കൊണ്ടാണു തീര്ഥാടകരെ തടഞ്ഞതെന്നാണു ചൈനീസ് വിശദീകരണം.
https://www.facebook.com/Malayalivartha
