അതിര്‍ത്തി പ്രശ്‌നത്തില്‍ പ്രശ്‌ന പരിഹാരത്തിനുള്ള സാധ്യത തള്ളി ചൈന, മറ്റൊരു രാജ്യത്തിന്റെ പ്രദേശത്ത് അതിക്രമിച്ചു കയറുന്നത് ശരിയല്ലെന്ന് ലുവോ
അതിര്‍ത്തിയില്‍ സംഘര്‍ഷം മുറുകുന്നതിനിടെ പ്രശ്‌നപരിഹാരത്തിനുള്ള സാധ്യത തള്ളി ചൈന.അതിര്‍ത്തി പ്രശ്‌നം പരിഹരിക്കണമോയെന്ന് തീരുമാനിക്കേണ്ടത് ഇന്ത്യന്‍ സര്‍ക്കാരാണ്. മുന്‍ നിശ്ചയപ്രകാരം സംഘര്‍ഷ മേഖലയില്‍നിന്ന് സൈന്യത്തെ പിന്‍വലിക്കുക മാത്രമാണ് ചൈനീസ് സര്‍ക്കാര്‍ മുന്നോട്ടുവയ്ക്കുന്ന നിര്‍ദേശം. മേഖലയില്‍ സമാധാനം സ്ഥാപിക്കാന്‍ ആവശ്യമായത് ഇതുമാത്രമാണ്. ഇന്ത്യന്‍ സര്‍ക്കാരാണ് ഇക്കാര്യത്തില്‍ തീരുമാനമെടുക്കേണ്ടതെന്നും ഇന്ത്യയിലെ ചൈനീസ് അംബാസഡര്‍ ലുവോ സഹോഹുയ് പറഞ്ഞു.
ദോക് ലാ മേഖലയിലെ സ്ഥിതി അത്യന്തം ഗുരുതരമാണ്. ചൈനയുടെ അധീനതയിലുള്ള പ്രദേശത്തേക്ക് ആദ്യമായാണ് ഇന്ത്യന്‍ സൈന്യം അതിക്രമിച്ചു കടക്കുന്നത്. ഒരു ഘട്ടത്തില്‍ സംഘര്‍ഷം ഏറ്റുമുട്ടലിന്റെ വക്കോളമെത്തിയതാണ്. 19 ദിവസങ്ങള്‍ കടന്നുപോയി. എന്നിട്ടും ഇവിടുത്തെ സാഹചര്യത്തില്‍ മാത്രം യാതൊരു മാറ്റവുമുണ്ടായിട്ടില്ല. ചൈനയും ഭൂട്ടാനും തമ്മിലുള്ള പ്രശ്‌നത്തില്‍ ഇന്ത്യ ഇടപെടേണ്ടതില്ലെന്ന് ലുവോ പറഞ്ഞു. ഭൂട്ടാന്റെ പേരില്‍ മുതലെടുപ്പിനു ശ്രമിക്കേണ്ടെന്നും അദ്ദേഹം വ്യക്തമാക്കി.
അതേസമയം, സിക്കിം അതിര്‍ത്തിയിലെ നിലവിലെ സ്ഥിതിയില്‍ ഇന്ത്യന്‍ വിദേശകാര്യ മന്ത്രാലയവും ആശങ്ക പ്രകടിപ്പിച്ചു. അതിര്‍ത്തിയിലെ റോഡു നിര്‍മാണം സംബന്ധിച്ച ആശങ്ക ചൈനീസ് സര്‍ക്കാരുമായി പങ്കുവച്ചിട്ടുണ്ടെന്നും മന്ത്രാലയം വ്യക്തമാക്കി. അതേസമയം, സുരക്ഷാ കാരണങ്ങളാല്‍ ആണെങ്കില്‍ പോലും മറ്റൊരു രാജ്യത്തിന്റെ പ്രദേശത്ത് അതിക്രമിച്ചു കയറുന്നത് ശരിയല്ലെന്നും ലുവോ പറഞ്ഞു.
ദോക് ലാ മേഖലയില്‍ ചൈന ചൈനയുടേതെന്നും ഭൂട്ടാന്‍ ഭൂട്ടാന്റേതെന്നും അവകാശപ്പെടുന്ന സ്ഥലത്തു ചൈനീസ് സൈന്യം (പീപ്പിള്‍സ് ലിബറേഷന്‍ ആര്‍മിപിഎല്‍എ) റോഡ് നിര്‍മിച്ചതാണ് പ്രശ്‌നങ്ങള്‍ക്കു തുടക്കം. തര്‍ക്കഭൂമിയിലെ റോഡ് നിര്‍മാണം അന്യായമാണെന്നു ചൂണ്ടിക്കാട്ടി ഭൂട്ടാന്‍ രംഗത്തുവന്നു. ചൈനയുമായി നയതന്ത്ര ബന്ധങ്ങളില്ലാത്ത ഭൂട്ടാന്‍ ന്യൂഡല്‍ഹിയിലെ ചൈനീസ് എംബസിയില്‍ എതിര്‍പ്പ് അറിയിച്ചു.
സൈനികശേഷിയില്‍ കാര്യമായ വീര്യമില്ലാത്ത റോയല്‍ ഭൂട്ടാന്‍ ആര്‍മി വിഷയത്തില്‍ ഇന്ത്യയുടെ സഹായം അഭ്യര്‍ഥിച്ചു. റോഡ് നിര്‍മാണത്തില്‍ നിന്ന് എത്രയും വേഗം പിന്തിരിയണമെന്ന ഇന്ത്യന്‍ ആവശ്യം ചൈനയെ പ്രകോപിപ്പിച്ചു. തങ്ങളുടെ അധികാരപരിധിയിലുള്ള പ്രദേശത്തു റോഡ് നിര്‍മിക്കുന്നതിനെ എതിര്‍ക്കാന്‍ മറ്റു രാജ്യങ്ങള്‍ക്ക് അവകാശമില്ലെന്നു ചൈന തിരിച്ചടിച്ചു. പ്രശ്‌നങ്ങളുണ്ടെങ്കില്‍ തന്നെ അതു തങ്ങളും ഭൂട്ടാനും തമ്മിലാണെന്നും അതില്‍ മൂന്നാം കക്ഷിയായ ഇന്ത്യ ഇടപെടേണ്ടതില്ലെന്നും അവര്‍ വ്യക്തമാക്കി.
https://www.facebook.com/Malayalivartha
