യുദ്ധസമാനമായ സാഹചര്യത്തില്‍ നേരിടുന്ന പരിശീലനം ഇതിനകം ചൈനീസ് സൈന്യം തുടങ്ങി കഴിഞ്ഞു.
5100 മീറ്റര്‍ ഉയര്‍ന്ന പ്രദേശത്ത് വച്ച് യുദ്ധ ടാങ്ക് ഉള്‍പ്പെടെയുള്ളവ ഉപയോഗിച്ച് പരിശീലനം നടത്തിയതായി ചൈനീസ് വാര്‍ത്താ മാധ്യമം റിപ്പോര്‍ട്ട് ചെയ്തു. മാത്രമല്ല തല്‍സമയമായി വെടിവയ്പ്പ് ഉള്‍പ്പെടെയുള്ള കാര്യങ്ങള്‍ പരിശീലിക്കുകയും ചെയ്തു. സൈനിക നടപടികള്‍, ആക്രമണം, വെടിവയ്പ്പ് പരിശീലനം ആയുധങ്ങളുടെ സമഗ്ര പരിശീലനം തുടങ്ങിയവ നടന്നുവെന്നാണ് റിപ്പോര്‍ട്ട് വ്യക്തമാക്കുന്നത്.
ആക്രമണവും പ്രതിരോധവും പരിശീലനത്തിന്റെ ഭാഗമായിരുന്നു. ഇതിന്റെ ചിത്രങ്ങള്‍ ചൈനീസ് വാര്‍ത്താ ഏജന്‍സി പുറത്തുവിട്ടിട്ടുണ്ട്. കഴിഞ്ഞ ആഴ്ചയും യുദ്ധ ടാങ്ക് ചൈന പരീക്ഷിച്ചിരുന്നു. സിക്കിം അതിര്‍ത്തിയിലെ ദോക് ലായില്‍ നിന്നും ഇന്ത്യ സൈന്യത്തെ പിന്‍വലിച്ച് തെറ്റു തിരുത്തണമെന്നാണ് ചൈനയുടെ ആവശ്യം. എന്നാല്‍, ചൈനയാണ് അതിര്‍ത്തി ലംഘിക്കുന്നതെന്നാണ് ഇന്ത്യയുടെ ആരോപണം.
അതേസമയം ചൈനീസ് അതിര്‍ത്തിയില്‍ ഇന്ത്യയും സൈനിക ശക്തി വര്‍ധിപ്പിക്കുന്നുണ്ട്. ഈ നടപടികള്‍ക്കെല്ലാം പിന്നാലെയാണ് പുതിയ ഉപകരണങ്ങള്‍ പരീക്ഷിച്ച് ചൈന സൈനിക പരിശീലനം നടത്തിയത്. നിലവിലെ സാഹചര്യത്തില്‍ ഇന്ത്യന്‍ പ്രധാനമന്ത്രിയുമായുള്ള കൂടിക്കാഴ്ച കൂടി ചൈനീസ് പ്രസിഡന്റ് റദ്ദാക്കിയതോടെ ഏത് നിമിഷവും അതിര്‍ത്തിയില്‍ സംഘര്‍ഷം പൊട്ടി പുറപ്പെട്ടേക്കാമെന്ന സാഹചര്യമാണ് നിലവില്‍. ലോക രാഷ്ട്രങ്ങളില്‍ അമേരിക്ക, റഷ്യ, ഫ്രാന്‍സ്, ജപ്പാന്‍, ഇസ്രയേല്‍, ബ്രിട്ടന്‍ തുടങ്ങിയ വന്‍ശക്തികള്‍ ഇന്ത്യക്കെതിരായ ഏതൊരു നീക്കത്തിനെതിരെയും രംഗത്ത് വരുമെന്നതിനാല്‍ 'കൈവിട്ട' കളിക്ക് ചൈന ഇറങ്ങിയാല്‍ ഇത്തവണ അവര്‍ക്ക് വന്‍ തിരിച്ചടി നേരിടേണ്ടി വരുമെന്നാണ് പ്രമുഖ നയതന്ത്ര വിദഗ്ദര്‍ ചൂണ്ടിക്കാട്ടുന്നത്.