തീവ്രവാദത്തിന് പണം കണ്ടെത്തുന്നതിനായി കള്ളപ്പണം വെളുപ്പിച്ചെന്ന കേസില്‍ കശ്മീരി വിഘടനവാദി നേതാവ് ഷാബിര്‍ അഹമ്മദ് ഷായെ എന്‍ഫോഴ്‌സ്മന്റെ് ഡയറക്ടറേറ്റ് അറസ്റ്റ് ചെയ്തു. കഴിഞ്ഞ ദിവസം അര്‍ധരാത്രിയോടുകൂടി ശ്രുനഗറിലെ വീട്ടില്‍ നിന്നാണ് അറസ്റ്റ് ചെയ്തത്.

കഴിഞ്ഞ ദിവസം കശ്മീര്‍ താഴ്‌വരയിലുണ്ടായ അക്രമ സംഭവങ്ങള്‍ക്ക് പാകിസ്താനില്‍ നിന്നുള്ള ഫണ്ട് ഉപയോഗിച്ചിട്ടുണ്ടോ എന്ന് ുേനശീയ അന്വേഷണ ഏജന്‍സി അന്വേഷിച്ചിരുന്നു. അന്വേഷണവുമായി ബന്ധപ്പെട്ട് ഹുറിയത്ത് നേതാവ് സയ്യിദ് അലി ഷാ ഗീലാനിയുടെ മരുമകന്‍ അല്‍താഫ് അഹമ്മദ് ഷാ അടക്കം ഏഴു വിഘടനവാദി നേതാക്കളെ എന്‍.ഐ.എ അറസ്റ്റ് ചെയത്തിനുതൊട്ടു പിറയൊണ് ഷാബിര്‍ അഹമ്മദ് ഷായുടെ അറസ്റ്റ്.

ഒരു ദശാബ്ദം മുമ്പുള്ള കേസിലാണ് ഷാബിര്‍ അഹമ്മദിനെ അറസ്റ്റ് ചെയ്തത്. ഇന്ന് ഡല്‍ഹി കോടതിയില്‍ ഹാജരാക്കും. എന്‍ഫോഴ്‌സ്മന്റെ് ഡയറക്ടറേറ്റ് നിരവധി തവണ സമ്മന്‍സ് അയച്ചിട്ടും മറുപടി നല്‍കാന്‍ ഷാ തയാറായിരുന്നില്ല. തുടര്‍ന്ന് ഡല്‍ഹി കോടതി ജാമ്യമില്ലാ വാറന്റ് പുറപ്പെടുവിക്കുകയായിരുന്നു. എന്നാല്‍ രാഷ്ട്രീയ പ്രേരിതമായ കേസാണിതെന്ന് ഷാബിര്‍ അഹമ്മദ് ഷാ പ്രതികരിച്ചു.

2005 ആഗസ്തിലാണ് കേസ് രജിസ്റ്റര്‍ ചെയ്തത്. 2.25കോടി രൂപ ഹവാല പണമിടപാടു വഴി ഷാബിര്‍ അഹമ്മദ് ഷാക്ക് കൈമാറിയെന്ന് ആരോപിച്ച് മുഹമ്മദ് അസ്‌ലം വാനിയെ അറസ്റ്റു ചെയ്തപ്പോള്‍ തന്നെയാണ് ഷാബിറിനെതിരെയും കേസ് എടുത്തത്. കള്ളപ്പളം വെളുപ്പിക്കല്‍ നിരാധന നിയിമപ്രകാരമാണ് എന്‍ഫോഴ്‌സമെനറ് ഡയറക്ടറേറ്റ് ഷാക്കെതിരെ കേസ് രജിസ്റ്റര്‍ ചെയ്തത്.