സ്ത്രീധന ഗാര്ഹിക പീഡന കേസുകളില് ആരോപണ വിധേയരായവരെ ധൃതി പിടിച്ച് അറസ്റ്റ് ചെയ്യരുതെന്ന് സുപ്രീം കോടതി
സ്ത്രീധന ഗാര്ഹിക പീഡന കേസുകളില് ആരോപണ വിധേയരായവരെ ധൃതിപിടിച്ച് അറസ്റ്റ് ചെയ്യരുതെന്ന് സുപ്രീം കോടതിയുടെ വിധി. ഏത് കേസിലും പ്രാഥമിക അന്വേഷണം പൂര്ത്തിയായതിന് ശേഷം മാത്രമേ കുറ്റാരോപിതരെ അറസ്റ്റ് ചെയ്യാവൂ എന്നും സുപ്രീം കോടതി നിര്ദ്ദേശിച്ചു.
1983ല് കൊണ്ട് വന്ന സ്ത്രീധന ഗാര്ഹിക പീഡന നിയമം വ്യാപകമായി ദുരൂപയോഗം ചെയ്യപ്പെടുന്നുവെന്ന പരാതി പരിഗണിക്കുകയായിരുന്നു കോടതി
ജസ്റ്റിസ് എ.കെ.ഗോയല് അദ്ധ്യക്ഷനായ സുപ്രീം കോടതി ബെഞ്ചാണ് സുപ്രധാനമായ നിരീക്ഷണം നടത്തിയത്. ജില്ലാ തലത്തില് രൂപീകരിക്കുന്ന കുടുംബക്ഷേമ സമിതികള് പരിശോധിച്ചതിന് ശേഷം മാത്രമേ ഇത്തരം കേസുകളില് അറസ്റ്റ് നടത്താന് പാടുളളു എന്നും കോടതി ഉത്തരവിട്ടു. ഇത്തരം കമ്മിറ്റികള് ആദ്യം ചെയ്യേണ്ടത് ഇരു വിഭാഗവുമായും നേരിട്ടോ ഫോണ് മുഖേനയോ മറ്റ് സങ്കേതങ്ങളിലൂടെയോ ബന്ധപ്പെട്ട് കാര്യങ്ങള് ചോദിച്ചറിയണം.
തുടര്ന്ന് ഒരു മാസത്തിനുളളില് കമ്മിറ്റി പൊലീസിനോ മജിസ്ട്രേറ്റിനോ റിപ്പോര്ട്ട് സമര്പ്പിക്കണമെന്നും കോടതി നിര്ദേശിക്കുന്നു. കമ്മറ്റിയുടെ റിപ്പോര്ട്ട് ലഭിക്കുന്നത് വരെ ഒരു അറസ്റ്റും ഉണ്ടാവാന് പാടില്ല.
അതാത് സ്ഥലത്തെ അന്വേഷണ ചുമതലയുളള ഉദ്യോഗസ്ഥന് മാത്രമായിരിക്കണം ഇത്തരം കേസുകള് അന്വേഷിക്കേണ്ടത്. അന്വേഷണ ഉദ്യോഗസ്ഥര്ക്ക് കുറഞ്ഞത് ഒരാഴ്ച്ചയെങ്കിലും വിഷയവുമായി ബന്ധപ്പെട്ട പരിശീലനം ഉണ്ടായിരിക്കണമെന്നും കോടതി വ്യക്തമാക്കി. ഇത്തരം കേസുകളിലെ ജാമ്യ നടപടികളെ കുറിച്ചും കോടതി നിര്ദേശം നല്കി.
അലഹബാദ് ഹൈക്കോടതി വിധിക്കെതിരെ രാജേഷ് ശര്മയെന്നയാള് നല്കിയ അപ്പീല് പരിഗണിക്കുകയായിരുന്നു കോടതി. സ്ത്രീധന ഗാര്ഹിക പീഡന നിയമത്തിന്റെ യഥാര്ത്ഥ ലക്ഷ്യം നിറവേറ്റാനും വ്യാജ പരാതികളില് നിരപരാധികള് ഇരയാക്കപ്പെടുന്നത് തടയാനുമാണ് ഇപ്പോഴത്തെ നീക്കമെന്നും കോടതി പറഞ്ഞു. നിയമത്തിന്റെ ദുരുപയോഗം തടയാന് ആവശ്യമെങ്കില് നിയമഭേദഗതി നടത്തുന്ന കാര്യം നിയമ മന്ത്രാലയം ആലോചിക്കണമെന്നും കോടതി നിര്ദ്ദേശിച്ചു.
https://www.facebook.com/Malayalivartha
