മൂത്തമകന്‍ ഉമര്‍ മുഖ്താറിന്റെ വിവാഹ ചടങ്ങില്‍ പങ്കെടുക്കാന്‍ അനുവദിക്കണമെന്ന് ആവശ്യപ്പെട്ട് പി.ഡി.പി ചെയര്‍മാന്‍ അബ്ദുന്നാസിര്‍ മഅ്ദനി സമര്‍പ്പിച്ച അപേക്ഷ സുപ്രീംകോടതി തിങ്കളാഴ്ച പരിഗണിക്കും. യാത്രാനുമതി നിഷേധിച്ച ബംഗളൂരു സിറ്റി സിവില്‍ ആന്‍ഡ് സെഷന്‍സ് കോടതി ഉത്തരവിനെതിരെയാണ് മഅ്ദനി സുപ്രീംകോടതിയില്‍ അപേക്ഷ നല്‍കിയത്. ബംഗളൂരുവില്‍ നിന്ന് കേരളത്തിലേക്ക് പൊലീസ് അകമ്പടി വരുന്നതിന്റെ 20 ലക്ഷം രൂപയുടെ ചെലവ് മഅ്ദനി വഹിക്കണമെന്ന വിചാരണ കോടതി ഉത്തരവ് റദ്ദാക്കണമെന്നും ഹരജിയില്‍ ആവശ്യപ്പെട്ടിട്ടുണ്ട്.

വിവാഹവുമായി ബന്ധപ്പെട്ട് ആഗസ്റ്റ് എട്ടിനും 20നുമിടയില്‍ കൊല്ലം, തലശ്ശേരി, എറണാകുളം എന്നിവിടങ്ങളില്‍ നടക്കുന്ന ചടങ്ങുകളില്‍ പങ്കെടുക്കാന്‍ ജാമ്യവ്യവസ്ഥയില്‍ ഇളവ് അനുവദിക്കണം. ആഗസ്റ്റ് ഒന്നു മുതല്‍ ഏഴുവരെ മാതാവിനെ കാണാന്‍ ജാമ്യം അനുവദിച്ച് ജൂലൈ 24ന് ഉത്തരവിട്ട സി.ബി.ഐ കേസുകള്‍ക്കുള്ള കോടതി ഒമ്പതിന് തുടങ്ങുന്ന മകന്റെ വിവാഹചടങ്ങില്‍ പങ്കെടുക്കാനും രോഗിയായ പിതാവിനെ കാണാനും അനുമതി നിഷേധിച്ചിരിക്കുകയാണെന്നും അപേക്ഷയില്‍ പറയുന്നു.

മകന്റെ വിവാഹത്തില്‍ പങ്കെടുക്കാന്‍ പിതാവിനെ അനുവദിക്കാത്തത് വേദനാജനകമാണ്. തന്റെ സാന്നിധ്യം ഒഴിച്ചു കൂടാനാവാത്തതാണ്. നാല് മാസത്തിനകം വിചാരണ നടപടി പൂര്‍ത്തിയാക്കാമെന്ന് 2014 നവംബറില്‍ കര്‍ണാടക സര്‍ക്കാര്‍ സുപ്രീംകോടതിക്ക് നല്‍കിയ ഉറപ്പ് ഇതുവരെ പുര്‍ത്തീകരിച്ചില്ലെന്നും വിചാരണ തുടരുകയാണെന്നും പ്രശാന്ത് ഭൂഷണ്‍, ഹാരിസ് ബീരാന്‍ എന്നിവര്‍ മുഖേന സമര്‍പ്പിച്ച ഹരജിയില്‍ മഅ്ദനി ചൂണ്ടിക്കാട്ടി.
ബംഗളൂരു സ്‌ഫോടനക്കേസില്‍ 31ാം പ്രതിയായ മഅ്ദനിക്ക് നഗരം വിട്ടുപോവരുതെന്ന വ്യവസ്ഥയോടെയാണ് ജാമ്യം ലഭിച്ചത്. ജാമ്യം ലഭിച്ച ശേഷം മൂന്നുതവണ കേരളം സന്ദര്‍ശിച്ചപ്പോഴൊന്നും ജാമ്യവ്യവസ്ഥ ലംഘിക്കുന്ന പ്രവര്‍ത്തനമുണ്ടായിട്ടില്ല. നിലവില്‍ ജാമ്യത്തിലായതിനാല്‍ വ്യവസ്ഥകളില്‍ ഇളവ് മാത്രമാണ് ചോദിക്കുന്നത്. അത് വിചാരണയെ ബാധിക്കില്ല. മുമ്പ് മകളുടെ കല്യാണത്തിന് പങ്കെടുക്കാന്‍ കോടതി അനുവദിച്ചിരുന്നു.