അനാവശ്യ സമരങ്ങള്ക്കെതിരെ ഹൈക്കോടതി കര്ശന നടപടിക്കൊരുങ്ങുന്നു
വിദ്യാഭ്യാസ മേഖലയില് തുടര്ച്ചയായി അധ്യയനദിനങ്ങള് നഷ്ടപ്പെടുത്തുന്ന സമരങ്ങള്ക്കും അക്രമങ്ങള്ക്കുമെതിരെ ഹൈക്കോടതി കര്ശന നടപടിക്കൊരുങ്ങുന്നു. വിദ്യാര്ഥി സമരങ്ങളും സംഘടനകള് തമ്മിലെ അക്രമങ്ങളും സ്കൂളുകളുടെയും കോളജുകളുടെയും പ്രവര്ത്തനത്തെ പ്രതികൂലമായി ബാധിക്കുന്നത് ഏറിയ പശ്ചാത്തലത്തിലാണ് കോടതി ഇടപെടലിനൊരുങ്ങുന്നത്.
സമരങ്ങള് നേരിടാന് പൊലീസ് സഹായം തേടി അധ്യാപക രക്ഷാകര്തൃ സംഘടനകളും പ്രധാനാധ്യാപകരും നല്കുന്ന ഹര്ജികളുടെ എണ്ണം ദിനംപ്രതി പെരുകുന്നത് ഗൗരവത്തോടെ കണ്ടാണ് കോടതിയുടെ നീക്കം.
ഈ വര്ഷം ജൂണില് പുതിയ ക്ലാസുകള് ആരംഭിച്ചശേഷം വിദ്യാര്ഥി സംഘടനകളുടെ സമരം മൂലം 12 അധ്യയന ദിവസങ്ങള് നഷ്ടപ്പെട്ടെന്നാണ് ഹര്ജികളില് ചൂണ്ടിക്കാട്ടുന്നത്. ചിലയിടങ്ങളില് സമരത്തെ തുടര്ന്നുണ്ടായ അക്രമസംഭവങ്ങള് അവധി ദിനങ്ങളുടെ എണ്ണം കൂട്ടിയിട്ടുണ്ട്.
തുടര്ച്ചയായ സമരങ്ങള് സ്കൂളുകളുടെ പ്രവര്ത്തനം താളം തെറ്റിക്കുന്നതായി ചൂണ്ടിക്കാട്ടി കൊല്ലം ജില്ലയിലെ രണ്ട് സര്ക്കാര് സ്കൂളുകള് നല്കിയ ഹര്ജി തീര്പ്പാക്കിയ കോടതി സമരത്തിന്റെ പേരില് അധ്യയനം മുടങ്ങുന്ന അവസ്ഥയുണ്ടാകാതിരിക്കാന് പൊലീസും അധികൃതരും നടപടി സ്വീകരിക്കണമെന്ന് വ്യക്തമാക്കിയിരുന്നു. സമാന ആവശ്യങ്ങളുന്നയിച്ച് കൂടുതല് ഹരജികളെത്തിയതോടെയാണ് അനാവശ്യ വിദ്യാര്ഥി സമരങ്ങളെക്കുറിച്ച് കോടതി ഉത്കണ്ഠ രേഖപ്പെടുത്തിയത്. തുടര്ന്ന് സര്ക്കാറിനോട് വിശദീകരണവും തേടി.
വിദ്യാര്ഥി സമരത്തിന്റെ പേരിലുള്ള അക്രമങ്ങള്ക്കെതിരെ കര്ശന നടപടി സ്വീകരിക്കുന്നുണ്ടെന്നാണ് സര്ക്കാര് അഭിഭാഷകന് കോടതിയില് ബോധിപ്പിച്ചത്. സുല്ത്താന് ബത്തേരിയിലെ ഡോണ് ബോസ്കോ കോളജില് വിദ്യാര്ഥി സമരത്തെത്തുടര്ന്നുണ്ടായ അക്രമസംഭവങ്ങളുടെ പേരില് അറസ്റ്റിലായ 14 വിദ്യാര്ഥികളെ റിമാന്ഡ് ചെയ്തതായും അക്രമം തടയാതിരുന്ന സി.ഐക്കും എസ്.ഐക്കുമെതിരെ നടപടിയെടുക്കണമെന്ന ശിപാര്ശ ജില്ല പൊലീസ് മേധാവി ഐ.ജിക്ക് നല്കിയതായും കോടതിയെ അറിയിച്ചു. എന്നാല്, കര്ശന നടപടികളാണ് ആവശ്യമെന്ന് കോടതി ചൂണ്ടിക്കാട്ടി. ഇക്കാര്യത്തില് വിശദമായ നിലപാടറിയിക്കാന് തിങ്കളാഴ്ച അഡ്വക്കറ്റ് ജനറല് കോടതിയില് ഹാജരാകും.
വിദ്യാര്ഥി സമരങ്ങളെ നേരിടാന് നിര്ദേശിക്കുന്ന കോടതിവിധികള് നിലവിലുണ്ടെങ്കിലും കര്ശന നടപടികളുണ്ടാകാത്തതിനാല് വിധികള് ഫലം കാണാത്ത അവസ്ഥയാണുള്ളത്. ഈ പശ്ചാത്തലത്തില് കൂടിയാണ് വിദ്യാര്ഥി സമരങ്ങള്ക്കെതിരെ കോടതി കര്ശന നടപടികള്ക്കൊരുങ്ങുന്നത്.
https://www.facebook.com/Malayalivartha
