അനധികൃത സ്വത്തുസമ്പാദനക്കേസില്‍ ജയിലില്‍ കഴിയുന്ന അണ്ണാ ഡി.എം.കെ ഇടക്കാല ജനറല്‍ സെക്രട്ടറി വി.കെ. ശശികല സമര്‍പ്പിച്ച പുനഃപരിശോധനാ ഹര്‍ജി സുപ്രീം കോടതി തള്ളി. ജയിലില്‍ കഴിയുന്ന ശശികലയുടെ സഹോദര ഭാര്യ ജെ. ഇളവരശി, സഹോദര പുത്രനും ജയയുടെ വളര്‍ത്തു മകനുമായ വി.എന്‍ സുധാകരന്‍ എന്നിവര്‍ നല്‍കിയ പുനഃപരിശോധനാ ഹര്‍ജികളും കോടതി തള്ളിയിട്ടുണ്ട്.

നേരത്തെ പുറപ്പെടുവിച്ച പൊതു വിധിന്യായത്തില്‍ പിഴവുകള്‍ കണ്ടെത്താനാകാത്തതിനാലാണ് ഹര്‍ജി തള്ളിയതെന്ന് ജസ്റ്റിസ് എസ്.എ. ബോബ്‌ഡെ, അമിതാവ് റോയി എന്നിവരടങ്ങിയ ബെഞ്ച് പറഞ്ഞു. തെളിവുകളിലും പ്രത്യക്ഷമായ തെറ്റ് കണ്ടെത്തിയിട്ടില്ല. ആയതിനാല്‍ വിധി പുനഃപരിശോധിക്കേണ്ട ആവശ്യമില്ലെന്ന് സുപ്രീംകോടതി വ്യക്തമാക്കി.

അനധികൃത സ്വത്തുസമ്പാദനകേസിലെ പ്രധാന പ്രതിയായ തമിഴ്‌നാട് മുന്‍ മുഖ്യമന്ത്രി ജയലളിത ജീവിച്ചിരിപ്പില്ലാത്തതിനാല്‍ തങ്ങള്‍ക്കെതിരായ കേസും ഇല്ലാതാക്കണമെന്നായിരുന്നു മൂന്നുപേരും സുപ്രീംകോടതിയില്‍ സമര്‍പ്പിച്ച ഹര്‍ജിയില്‍ അവകാശപ്പെട്ടത്. അനധികൃത സ്വത്തുസമ്പാദനക്കേസില്‍ ശശികലയ്ക്കും ഇളവരശിക്കും സുധാകരനുമെതിരെ 2017 ഫെബ്രുവരി 14ന് സുപ്രീംകോടതി വിധി പ്രസ്താവിച്ചപ്പോള്‍ ബെഞ്ചിലെ മുതിര്‍ന്ന അഭിഭാഷകനായിരുന്ന പി.സി.ഘോഷ് വിരമിച്ചതിനാല്‍ ഹര്‍ജിയിന്മേല്‍ തുറന്ന കോടതിയില്‍ വാദം കേള്‍ക്കണമെന്ന് മുതിര്‍ന്ന അഭിഭാഷകന്‍ മുകുള്‍ റോഹ്തഗി വാദിച്ചെങ്കിലും ഹര്‍ജി സുപ്രീംകോടതി തള്ളുകയായിരുന്നു.

ജയലളിത ഉള്‍പ്പെട്ട കേസില്‍ ശശികല, ഇളവരശി, വി.എന്‍. സുധാകരന്‍ എന്നിവരായിരുന്നു പ്രതികള്‍. ജയലളിത ആദ്യമായി മുഖ്യമന്ത്രിയായ 1991നും 96നും ഇടയില്‍ അനധികൃതമായി 66.65 കോടിയുടെ സ്വത്തുസമ്പാദിച്ചു എന്നായിരുന്നു കേസ്.