ദേര സച്ച സൗദ എന്ന സംഘടനയുടെ മേധാവിയായ ഗുര്‍മീത് റാം റഹിം എന്ന ആള്‍ ദൈവത്തിനെതിരെ 2002 ല്‍ ആണ് വനിതാ അനുയായി പരാതിയുമായി രംഗത്ത് വന്നത്. തന്നെ ആള്‍ദൈവം മാനഭംഗപ്പെടുത്തിയെന്ന പരാതി അന്നത്തെ പ്രധാനമന്ത്രി അടല്‍ ബിഹാരി വാജ്‌പേയിക്ക് അയച്ചതിലൂടെയാണ് സംഭവം പുറത്തുവന്നത്. കത്തിന്റെ അടിസ്ഥാനത്തില്‍ പഞ്ചാബ്, ഹരിയാന ഹൈക്കോടതി കേസെടുത്ത് അന്വേഷണം സി.ബി.ഐക്ക് വിട്ടു.

ആശ്രമത്തിലെ 18 വനിതകളെ ചോദ്യം ചെയ്തുവെങ്കിലും സ്വാമി മാനഭംഗപ്പെടുത്തിയതിലൂടെ തങ്ങള്‍ വിശുദ്ധരായെന്നാണ് രണ്ടുപേര്‍ മൊഴി നല്‍കിയത്. ആശ്രമത്തിലെ സ്വാമിയുടെ മുറിയില്‍ താന്‍ കയറിയപ്പോള്‍ വാതില്‍ തനിയെ അടഞ്ഞെന്നും വലിയ സ്‌ക്രീനില്‍ ബ്‌ളൂ ഫിലിം തെളിഞ്ഞെന്നും അത് കാണിച്ചതിനുശേഷമാണ് പീഡിപ്പിച്ചതെന്നും ഒരു വനിത സി.ബി.ഐക്ക് മൊഴി നല്‍കിയിരുന്നു.

2008 ല്‍ റാം സിംഗിനെതിരെ വിചാരണ ആരംഭിച്ചു. ഇതിന് പുറമേ രണ്ട് കൊലപാതക കുറ്റത്തിനും സ്വാമി വിചാരണ നേരിടുന്നു. സ്വാമിയുടെ അനുയായി രഞ്ജിത് സിംഗിനെ സന്യാസിനി നല്‍കിയ കത്ത് പ്രചരിപ്പിച്ചു എന്ന സംശയത്താല്‍ കൊലപ്പെടുത്തി എന്നതാണ് ഒരു കേസ്. മാദ്ധ്യമപ്രവര്‍ത്തകന്‍ ഛത്രപതിയെ കൊലപ്പെടുത്തിയതാണ് രണ്ടാമത്തെ കേസ്.

ആശ്രമം ഒരു പട്ടണം

സിര്‍സയിലെ ദേരാ ആശ്രമം ആയിരത്തിലധികം ഏക്കറുകളിലായി പടര്‍ന്നുകിടക്കുന്നു. സ്‌പോര്‍ട്‌സ് ഗ്രാമങ്ങള്‍, സ്‌റ്റേഡിയങ്ങള്‍, സ്‌കൂളുകള്‍, ആശുപത്രികള്‍, സിനിമാശാലകള്‍ തുടങ്ങി നിരവധി സ്ഥാപനങ്ങള്‍ ആശ്രമവളപ്പില്‍ പ്രവര്‍ത്തിക്കുന്നു. 2014 ലെ തിരഞ്ഞെടുപ്പില്‍ സന്യാസി ബി.ജെ.പിയെയാണ് പിന്തുണച്ചത്. 

ആയിരക്കണക്കിന് അനുയായികള്‍ ദിനംപ്രതി റാം റഹിമിന്റെ പ്രഭാഷണം കേള്‍ക്കാന്‍ ആശ്രമത്തില്‍ എത്താറുണ്ട്. സിക്കുകാരുടെ പത്താമത്തെ ഗുരു ഗുരു ഗോബിന്ദ് സിംഗിന്റെ വസ്ത്രധാരണ രീതി അതേപടി റാം റഹിം 2007ല്‍ അനുകരിച്ചതിന്റെ പേരില്‍ പഞ്ചാബില്‍ സംഘര്‍ഷവും ലഹളയും നടന്നു. 

രക്തദാനവും അവയവ ദാനവും പ്രോത്സാഹിപ്പിക്കുന്ന നിരവധി പ്രചാരണ പരിപാടികള്‍ക്കും ആശ്രമം നേതൃത്വം നല്‍കുന്നുണ്ട്. പാവപ്പെട്ട കുടുംബങ്ങളില്‍നിന്നുള്ള നിരവധി കുട്ടികളെ സൗജന്യമായി പഠിപ്പിക്കുകയും ചെയ്തുവരുന്നു.