പീഡനക്കേസില്‍ ഗുര്‍മീത് റാം റഹിം സിംഗിനെ കുറ്റക്കാരനാണെന്ന് കണ്ടെത്തിയ കോടതി വിധിയെ തുടര്‍ന്നുണ്ടായ സംഘര്‍ഷങ്ങളുടെ പശ്ചാത്തലത്തില്‍ പഞ്ച്കുള ഡിസിപി അശോക് കുമാറിനെ സസ്‌പെന്‍ഡ് ചെയ്തു.

കഴിഞ്ഞ ദിവസം പഞ്ച്കുളയില്‍ ഡിസിപി 144 പ്രഖ്യാപിച്ചിരുന്നു. എന്നാല്‍ 144 പ്രഖ്യാപിച്ചതിലുണ്ടായ അപാകത വലിയ വിവാദങ്ങള്‍ സൃഷ്ടിച്ചിരുന്നു. ഡിസിപിയുടെ ഉത്തരവില്‍ ആളുകള്‍ കൂട്ടംകൂടുന്നത് തടയണോ എന്ന കാര്യം പരാമര്‍ശിച്ചില്ലായിരുന്നു. സാധാരണ 144 പ്രഖ്യാപിക്കുന്‌പോള്‍ നാലോ അതില്‍ കൂടുതലോ ആളുകള്‍ കൂട്ടം കൂടുന്നത് നിരോധിക്കും. കോടതി പരിസരത്ത് ഒന്നരലക്ഷത്തോളം പേര്‍ സംഘടിച്ച് എത്തിയ സംഭവം പോലീസിന്റെ ഭാഗത്തുനിന്നുണ്ടായ വലിയ വീഴ്ചയായാണ് കണക്കാക്കുന്നത്.

വെള്ളിയാഴ്ച പഞ്ച്കുളയിലുണ്ടായ ആക്രമണങ്ങളില്‍ മാത്രം 20 പേര്‍ കൊല്ലപ്പെട്ടന്നാണ് വിവരം. ഇവിടെ പോലീസ് സ്‌റ്റേഷനു നേരെയും റെയില്‍വേ സ്‌റ്റേഷനു നേരെയും ആക്രമണം നടന്നിരുന്നു.