മാലാഖമാര് എത്തുമ്പോള് വിജയിച്ചത് മോഡി തന്ത്രം
പറഞ്ഞ് പറഞ്ഞ് എല്ലാവരാലും അകറ്റി നിര്ത്തിയ ആ നരേന്ദ്രമോഡി ഫീനിക്സ് പക്ഷിയെപ്പോലെ ഉയര്ത്തെഴുന്നേറ്റ് ഇന്ത്യന് പ്രധാനമന്ത്രിയായി. മോഡിയെ കണ്ടവനേയും പുകഴ്ത്തിയവനേയും വെറുക്കപ്പെട്ടവനാക്കി ചിത്രീകരിച്ച് കേരള നേതാക്കള് ചരിത്രം സൃഷ്ടിച്ചിരുന്നു. അങ്ങനെയാണ് താനും തൊട്ടു കൂടായ്മയുടെ ഇരയാണെന്ന് മോഡി തന്നെ പറഞ്ഞത്. മോഡിയെ അകറ്റിയ കേരള നേതാക്കള് ഉള്പ്പെടെയുള്ളവര് ഇപ്പോള് ഒരേ സ്വരത്തില് മോഡിയെ പ്രകീര്ത്തിക്കുകയാണ്. മോഡിയുടെ രാഷ്ട്ര തന്ത്രജ്ഞത ഒന്നുകൊണ്ടു മാത്രമാണ് നമ്മുടെ ആ 46 മലയാളി സഹോദരിമാരുടെ മോചനം സാധ്യമായത്.
ഇറാഖില് നേഴ്സുമാര് വിമതരുടെ പിടിയിലായെന്ന വാര്ത്ത കേട്ടപ്പോള് തന്നെ കേരളം ഞെട്ടി. കാരണം ഗള്ഫില് ജോലി ചെയ്യുന്ന നേഴ്സുമാരില് ബഹുഭൂരിപക്ഷവും മലയാളി പെണ്കുട്ടികളാണ്.
ഇക്കാര്യത്തില് കേരള സര്ക്കാരിന് ഒന്നും ചെയ്യാന് കഴിയുമായിരുന്നില്ല. ആകെ ചെയ്യാന് പറ്റുന്നത് കേന്ദ്ര സര്ക്കാരിന്റെ കരുണയ്ക്കായി യാചിക്കുക മാത്രമായിരുന്നു.
കേരളത്തിന്റെ വികാരം കേന്ദ്ര സര്ക്കാര് പെട്ടെന്ന് മനസിലാക്കി. ഇന്ത്യന് പ്രധാനമന്ത്രി നരേന്ദ്ര മോഡി തന്നെ പ്രശ്നത്തില് നേരിട്ടിടപെട്ടു. വിദേശകാര്യമന്ത്രി സുഷമ സ്വരാജുമായും വിദേശകാര്യ മന്ത്രാലയവുമായും അടിയന്തിര മോഡി ചര്ച്ച നടത്തി. നേഴ്സുമാര് അകപ്പെട്ടിരിക്കുന്നത് മുസ്ലീം തീവ്രവാദികളുടെ കൈയ്യിലാണ്. ഇന്ത്യ ഭരിക്കുന്നത് അവര് വെറുക്കപ്പെട്ട ബിജെപി സര്ക്കാരും. ഇവിടെയാണ് ശത്രുക്കളുടെ ഇടയില് നിന്നും നേഴ്സുമാരെ മോചിപ്പിക്കുക എന്ന ഭഗീരപ്രയത്നം മോഡി സര്ക്കാര് നടത്തിയത്.
പരമ്പരാഗത സമ്പ്രദായത്തിലൂന്നിയ ഇറാഖുമായുള്ള ചര്ച്ചകള് കാലതാമസവും അപകടവും ഉണ്ടാക്കുമെന്ന് മോഡി തിരിച്ചറിഞ്ഞു. ശത്രുവിനെ ശത്രുവിന്റെ പാളയത്തില് പോയി മയപ്പെടുത്തുക എന്ന തന്ത്രമാണ് മോഡി പരീക്ഷിച്ചത്. ഇതിനായി വ്യക്തമായ രഹസ്യ അജണ്ട ഉണ്ടാക്കുകയും ഉദ്യോഗസ്ഥര്ക്ക് പൂര്ണ പിന്തുണ നല്കുകയും ചെയ്തു.
ഐഎസഐഎല് തീവ്രവാദികളുടെ ഗുരു സ്ഥാനീയരായ നേതാക്കളെ നയതന്ത്ര ഉദ്യോഗസ്ഥര് രഹസ്യമായി സന്ദര്ശിച്ച് ഇന്ത്യയുടെ ആശങ്ക ശക്തമായി അറിയിച്ചു. ഓരോ ഇന്ത്യക്കാരന്റേയും രക്തത്തിന്റെ വില താക്കീതിന്റെ ഭാഷയില് തന്നെ ഇന്ത്യ അറിയിച്ചു. വളരുന്ന ഇന്ത്യയെ പൂര്ണമായും പിണക്കുന്നത് ഭാവി ഇറാഖ് കെട്ടിപ്പടുക്കുന്നതില് തങ്ങള്ക്ക് തടസമാകുമെന്ന് അവര്ക്കുറപ്പായിരുന്നു. മാത്രമല്ല വനിതകളെ ഈ റംസാന് മാസത്തില് കളങ്കപ്പെടുത്തുന്നത് ലോകം തന്നെ പൊറുക്കില്ല. ഇവരെ മോചിപ്പിച്ചാല് ഇന്ത്യയുടെ മാനസികമായ പിന്തുണ തങ്ങള്ക്കൊപ്പം ഉണ്ടാകുമെന്നും ഇവര് ഉറച്ചു വിശ്വസിച്ചു. ഇതിനിടെ ഇന്ത്യ സുഹൃത്തുക്കളായ മറ്റ് ഗള്ഫ് രാജ്യങ്ങളുമായും സഹായമഭ്യര്ത്ഥിച്ചു. അവരും ഇന്ത്യയുടെ ഈ വിജയത്തിന് പിന്നില് നിര്ണായക പങ്ക് വഹിച്ചു. ഇതിനിടെ വിമതരുമായി മാനസിക പിന്തുണയുള്ള ചില ബിസിനസുകാരുടെ സേവനവും സര്ക്കാര് തേടി.
ആ നിലയിലുള്ള ചര്ച്ചകള് സജീവമായി. അങ്ങനെ മോഡിയുടെ തന്ത്രങ്ങള് വിദേശകാര്യമന്ത്രാലയം വിജയത്തിലെത്തിച്ചു. നേഴ്സുമാര് നമ്മുടെ സ്വന്തം നാട്ടിലും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
