മുണ്ടത്തിക്കോട് വെടിക്കെട്ട് നിര്‍മ്മാണശാലയിലുണ്ടായ അതിശക്തമായ സ്‌ഫോടനത്തില്‍ കാണാതായ നാല് പേര്‍ക്കായി തിരച്ചില്‍ ഊര്‍ജ്ജിതമാക്കി. കാഞ്ഞിരക്കോട് സ്വദേശി സുരേഷ് സി.എ (50), കോട്ടപ്പുറം സ്വദേശി അഭിജിത് (28), മണക്കൂടി സ്വദേശി വിഷ്ണു (38), കോട്ടപ്പുറം സ്വദേശി ഗിരീഷ് (42) എന്നിവരെയാണ് ഇനിയും കണ്ടെത്താനുള്ളതെന്ന് ജില്ലാ കളക്ടര്‍ അറിയിച്ചു. ദുരന്തസ്ഥലത്തുനിന്ന് തിരിച്ചറിയാന്‍ കഴിയാത്ത ഒരു മൃതദേഹവും 29 ശരീരഭാഗങ്ങളും കണ്ടെടുത്തിട്ടുണ്ട്.

ലഭിച്ച ശരീരഭാഗങ്ങള്‍ ആരുടേതാണെന്ന് ഉറപ്പുവരുത്തുന്നതിനായി കാണാതായവരുടെ ബന്ധുക്കളുടെ ഡിഎന്‍എ സാമ്പിളുകള്‍ അധികൃതര്‍ ശേഖരിച്ചു കഴിഞ്ഞു. നിലവില്‍ കണ്ടെടുത്ത 9 മൃതദേഹങ്ങളില്‍ എട്ടെണ്ണവും തിരിച്ചറിഞ്ഞ് ബന്ധുക്കള്‍ക്ക് വിട്ടുനല്‍കി. ശേഷിക്കുന്ന ഒരു മൃതദേഹം തിരിച്ചറിയുന്നതിനായി ഡിഎന്‍എ ഫലം വരുന്നത് വരെ കാത്തിരിക്കേണ്ടി വരും. മൂന്ന് ദിവസത്തിനുള്ളില്‍ പരിശോധനാ ഫലം ലഭ്യമാകുമെന്നും ഇതോടെ അനിശ്ചിതത്വത്തിന് വിരാമമാകുമെന്നും കളക്ടര്‍ വ്യക്തമാക്കി.

സ്‌ഫോടനം നടന്ന സ്ഥലത്തും സമീപത്തെ കുളത്തിലും ശരീരഭാഗങ്ങള്‍ക്കായി നടത്തിയ വിപുലമായ പരിശോധനകള്‍ പൂര്‍ത്തിയായി. കുളത്തില്‍ നടത്തിയ തിരച്ചിലില്‍ മനുഷ്യശരീര ഭാഗങ്ങളൊന്നും കണ്ടെത്താനായില്ലെങ്കിലും സ്‌ഫോടനവുമായി ബന്ധപ്പെട്ട ചില നിര്‍ണ്ണായക വസ്തുക്കള്‍ കണ്ടെടുത്തിട്ടുണ്ട്. ഇവ ഫോറന്‍സിക് പരിശോധനയ്ക്കായി അയച്ചു.\