താജ്മഹല് സന്ദര്ശനം ഇനി മൂന്ന് മണിക്കൂര് മാത്രം... ഏപ്രില് ഒന്ന് മുതല് പുതിയ സംവിധാനം നിലവില് വരും
ലോകാത്ഭുതങ്ങളിലൊന്നായ താജ്മഹല് സന്ദര്ശനം മൂന്ന് മണിക്കൂര് മാത്രമാക്കാന് തീരുമാനമായി. ഏപ്രില് ഒന്ന് മുതല് പുതിയ സംവിധാനം നിലവില് വരുമെന്നും അധികൃതര് വ്യക്തമാക്കി. താജ്മഹല് കാണാനെത്തുന്നവരുടെ എണ്ണം വര്ദ്ധിച്ചതോടെയാണ് സന്ദര്ശന സമയം കുറയ്ക്കാന് അധികൃതര് തീരുമാനിച്ചത്. ഇനി മുതല് ടിക്കറ്റ് എടുത്ത് സന്ദര്ശിക്കുന്നവര്ക്ക് മൂന്ന് മണിക്കൂര് മാത്രമേ ചെലവഴിക്കാന് സാധിക്കുകയുള്ളു. ആര്ക്കിയോളജിക്കല് സര്വേ ഓഫ് ഇന്ത്യ അധികൃതരാണ് ഇത് സംബന്ധിച്ച് തീരുമാനം അറിയിച്ചത്.
താജ്മഹല് പ്രവേശനത്തിനായി എടുക്കുന്ന ഓരോ ടിക്കറ്റിനും മൂന്ന് മണിക്കൂര് കാലാവധി മാത്രമേ ഇനി മുതല് ഉണ്ടായിരിക്കുകയുള്ളു. അധികം സമയം ചെലവഴിക്കാന് ആഗ്രഹമുള്ളവര്ക്ക് പ്രത്യേക ചാര്ജ് നല്കേണ്ടിവരും. ഇത് എല്ലാ സന്ദര്ശകര്ക്കും ബാധകമായിരിക്കും. ഓരോ ടിക്കറ്റിലും പ്രവേശന സമയം രേഖപ്പെടുത്തിയിരിക്കും. ഓണ്ലൈന് ടിക്കറ്റുകളിലും സമയം വ്യക്തമാക്കിയിരിക്കും. ടിക്കറ്റും സന്ദര്ശക സമയവും പരിശോധിക്കുന്നതിന് പ്രത്യേക ജീവനക്കാരെ ഏര്പ്പെടുത്തുമെന്നും അധികൃതര് അറിയിച്ചു.
നിലവില് ഇന്ത്യന് പൗരന് 40 രൂപയും സാര്ക് രാജ്യങ്ങളിലെ പൗരന്മാര്ക്ക് 530 രൂപയും വിദേശികള്ക്ക് 1,000 രൂപയുമാണ് പ്രവേശന ചാര്ജ്. താജ്മഹല് സന്ദര്ശിക്കുന്നതിന് പ്രതിദിനം അമ്പതിനായിരം പേരാണ് ഇപ്പോള് എത്തുന്നത്. സഞ്ചാരികള് ദീര്ഘനേരം താജ്മഹലില് ചെലവഴിക്കുന്നത് മൂലം കൂടുതല് പേരെ അനുവദിക്കുന്നതും ബുദ്ധിമുട്ടാണ്. ഇത് കണക്കിലെടുത്താണ് പുതിയ തീരുമാനം.
https://www.facebook.com/Malayalivartha
