കോട്ടയം കുഞ്ഞച്ചന്‍ എന്ന ചിത്രത്തില്‍ ടൈപ്പ് റൈറ്റിങ് സ്ഥാപനത്തിന്‍റെ ഉദ്​ഘാടനത്തിന്​ മോഹന്‍ലാലിനെ കൊണ്ടു വരുമെന്ന്​ ഉറപ്പു നല്‍കി പുറപ്പെടുന്ന മമ്മൂട്ടിയുടെ കുഞ്ഞച്ചന്‍ എന്ന കഥാപാത്രത്തെ സിനിമ കണ്ടവരാരും അത്ര പെട്ടന്ന് മറക്കില്ല. ഒടുവിൽ സംവിധായകന്‍ ജോഷി തന്നെ ചതിച്ചെന്നും മോഹന്‍ലാലിനെ കൊണ്ടുവരാന്‍ സമ്മതിച്ചില്ലെന്നും പറഞ്ഞ്​ 'പച്ചക്കുളം ഭാസി' എന്ന കൃഷ്​ണന്‍കുട്ടി നായരുടെ കഥാപാത്ര​െത്ത കൊണ്ട് ഉദ്​ഘാടനം ചെയ്യിക്കുന്ന രംഗം പ്രേക്ഷകർ കൈയടിയോടെയാണ് സ്വീകരിച്ചത്.

ഇതിനു സമാനമായ രംഗമാണ് മഹാരാഷ്ട്രയിൽ നടന്നിരിക്കുന്നത്. മഹാരാഷ്​ട്രയിലെ ഷിരൂറില്‍ രാമലിംഗ ഗ്രാമപഞ്ചായത്തി​ലാണ്​ സംഭവം. പഞ്ചായത്ത്​ തെരഞ്ഞെടുപ്പില്‍ സര്‍പഞ്ച്​ ആയി മത്സരിക്കുന്ന വിത്തല്‍ ഗണ്‍പത് ഗവാത്തെ എന്നയാള്‍ തെരഞ്ഞെടുപ്പ്​ പ്രചരണാര്‍ഥം മെയ്​ 25ലെ റാലിയില്‍ വിരാട്​ കോഹ്​ലിയെ പങ്കെടുപ്പിക്കുമെന്നാണ് വാഗ്ദാനം നൽകിയത്

സ്​ഥാനാര്‍ഥിയും കോഹ്​ലിയും ഒരുമിച്ചുള്ള ഫ്ലക്​സ്​ ബോര്‍ഡുകള്‍ പഞ്ചായത്തിലെ വിവിധ ഇടങ്ങളില്‍ ഉയര്‍ന്നു. കോഹ്​ലി എത്തുമെന്നു പറഞ്ഞ ദിവസം ഗ്രാമവാസികളും ആരാധകരും പാര്‍ട്ടി പ്രവര്‍ത്തകരും തങ്ങളുടെ താരത്തെ ഒരുനോക്ക് കാണാനായി തടിച്ചുകൂടി.

കറുത്ത കണ്ണട ധരിച്ച്‌​​, വെട്ടി ഒതുക്കിയ താടിയുമായി ടീ ഷര്‍ട്ട്​ ധരിച്ച്‌​ തങ്ങളുടെ മുൻപിലെത്തിയ താരത്തെ കണ്ട ജനങ്ങൾ അമ്പരന്നുപോയി. എത്തിയത്​ കോഹ്​ലിയുടെ അപരനാണെന്ന്​ ആളുകള്‍ക്ക്​ മനസിലായി​.​ വാഗ്ദാനത്തില്‍ നിന്ന്​ രക്ഷ​പ്പെടാന്‍ വിരാട്​ കോഹ്​ലി​യുടെ മുഖഛായയുള്ള ആളെ എത്തിച്ച്‌​ തടിതപ്പുകയായിരുന്നു സ്​ഥാനാര്‍ഥിയും കൂട്ടരും.