കാശ്മീരില് മനുഷ്യാവകാശ ലംഘനങ്ങളില്ല: ഐക്യരാഷ്ട്ര സഭയുടെ റിപ്പോര്ട്ട് വ്യാജവും തെറ്റിദ്ധാരണാജനകവുമെന്ന് ഇന്ത്യ
കാശ്മീരിലെ ജനങ്ങള് കടുത്ത മനുഷ്യാവകാശ ലംഘനങ്ങള്ക്ക് ഇരയാകുന്നുവെന്ന ഐക്യരാഷ്ട്ര സഭയുടെ റിപ്പോര്ട്ട് വ്യാജവും തെറ്റിദ്ധാരണാജനകവുമാണെന്ന് ഇന്ത്യ. ജമ്മു കാശ്മീരിലെയും പാക് അധീന കാശ്മീരിലെയും ജനങ്ങളോട് ഇന്ത്യയും പാകിസ്ഥാനും കടുത്ത മനുഷ്യാവകാശ ലംഘനങ്ങള് നടത്തുന്നുണ്ടെന്ന് റിപ്പോര്ട്ടില് ആരോപിച്ചിരുന്നു. മാത്രവുമല്ല കാശ്മീരിലെ ജനങ്ങളുടെ സ്വയം നിര്ണയ അവകാശത്തെ ഇന്ത്യ മാനിക്കണമെന്നും യു.എന് പറഞ്ഞിരുന്നു.
2016മുതല് സംസ്ഥാനത്ത് ഗ്രാമീണര് കൊല്ലപ്പെട്ട എല്ലാ സംഭവങ്ങളും അന്വേഷിക്കാനും താഴ്വരയില് അമിത സൈനിക ശക്തിയും പെല്ലറ്റ് തോക്കുകളും ഉപയോഗിക്കുന്നത് നിറുത്താനും യു.എന് മനുഷ്യാവകാശ വിഭാഗം തലവന് സെയിദ് റാദ് അല് ഹുസൈന് ഉത്തരവിട്ടിരുന്നു. ഇതാദ്യമായാണ് കാശ്മീര് വിഷയത്തില് യു.എന് ഇത്തരമൊരു റിപ്പോര്ട്ട് പുറത്തിറക്കുന്നത്. കാശ്മീരില് നടക്കുന്ന മനുഷ്യാവകാശ ലംഘനങ്ങളെക്കുറിച്ച് പരിശോധിക്കാന് കമ്മിഷന് ഒഫ് എന്ക്വയറിയെ നിയോഗിക്കാന് മനുഷ്യാവകാശ കൗണ്സിലില് ആവശ്യപ്പെടുമെന്നും അദ്ദേഹം പറഞ്ഞു. സിറിയയിലെ ആഭ്യന്തര യുദ്ധം പോലുള്ള സാഹചര്യങ്ങളില് മാത്രം രൂപീകരിക്കുന്ന ഉന്നത സംഘമാണ് കമ്മിഷന് ഒഫ് എന്ക്വയറി.
2016ല് ഹിസ്ബുല് കമാന്ഡറായിരുന്ന ബുര്ഹാന് വാനി കൊല്ലപ്പെട്ടതിന് ശേഷം നടന്ന സംഭവങ്ങളുമായി ബന്ധപ്പെട്ട് ഇരുരാജ്യങ്ങളിലെയും പ്രതിനിധികളുമായി കൂടിക്കാഴ്ച നടത്തിയതായി സെയിദ് റാദ് അല് ഹുസൈന് വ്യക്തമാക്കി. പാക് അധീനതയിലുള്ള പ്രദേശങ്ങളില് വിവിധ തരത്തിലുള്ള മനുഷ്യാവകാശ ലംഘനങ്ങള് നടക്കുന്നതായി സംഘം കണ്ടെത്തിയിട്ടുണ്ട്. എന്നാല് ഇവിടുത്തെ അഭിപ്രായ സ്വാതന്ത്ര്യത്തിനുള്ള വിലക്ക് ശരിയായ വിവരങ്ങള് ലഭിക്കുന്നതിന് തടസം നില്ക്കുന്നുണ്ടെന്നും റിപ്പോര്ട്ടില് ചൂണ്ടിക്കാട്ടി.
https://www.facebook.com/Malayalivartha
