ജൂണിലെ ശമ്പളം നല്‍കുന്നതിനായി കെ.എസ്.ആര്‍.ടി.സി ജീവനക്കാര്‍ക്ക് സര്‍ക്കാര്‍ 20 കോടി രൂപ അനുവദിച്ചു. ബാങ്ക് കണ്‍സോര്‍ഷ്യം രൂപീകരിച്ച് പ്രതിമാസ പലിശ കുറച്ച് 80 കോടി രൂപ അധിക വിഭവമായി സമാഹരിക്കുന്നതിന് കെ.എസ്.ആര്‍.ടി.സി. യെ സര്‍ക്കാര്‍ സഹായിച്ചിരുന്നു. എങ്കിലും പ്രതിമാസ ശമ്പളം തനത് വരുമാനത്തില്‍ നിന്ന് കണ്ടെത്തുന്നതിന് കെ.എസ്.ആര്‍.ടി.സിയ്ക്ക് സാധിച്ചില്ല. 

ഇത്തരത്തിലൊരു സാഹചര്യം നിലനില്‍ക്കുന്നതുകൊണ്ടു തന്നെ കെ.എസ്.ആര്‍ടി.സി മാനേജ്‌മെന്റിന്റെ അപേക്ഷ അനുസരിച്ച് ഏപ്രിലില്‍ 50 കോടിയും, മേയില്‍ 20 കോടിയും ഇപ്പോള്‍ 20 കോടി രൂപയും ഉള്‍പ്പെടെ കണ്‍സോര്‍ഷ്യം വന്ന ശേഷം 90 കോടി രൂപ ശമ്പളം നല്‍കുന്നതിന് കെ.എസ്.ആര്‍.ടി.സിയ്ക്ക് സര്‍ക്കാര്‍ നല്‍കി. സ്ഥാപനത്തിന്റെ അവസ്ഥ മനസ്സിലാക്കി സ്വയം പര്യാപ്തതയില്‍ എത്തിക്കാനുള്ള പ്രവര്‍ത്തനങ്ങളുമായി ജീവനക്കാര്‍ മുന്നോട്ട് പോകണമെന്ന് ഗതാഗതവകുപ്പ് മന്ത്രി എ.കെ. ശശീന്ദ്രനും അഭ്യര്‍ത്ഥിച്ചു.