പ്രവാസികള്‍ക്കും ഇനി ഓണ്‍ലൈനായി വോട്ടര്‍ പട്ടികയില്‍ പേരു ചേര്‍ക്കാം
വരാനിരിക്കുന്ന പഞ്ചായത്ത് തെരഞ്ഞെടുപ്പിന്റെ വോട്ടര്‍ പട്ടികയില്‍ പേര് ചേര്‍ക്കാന്‍ പ്രവാസികള്‍ക്ക് അവസരംനല്‍കി തെരഞ്ഞെടുപ്പ് കമീഷന്‍ വിജ്ഞാപനം പുറപ്പെടുവിച്ചു. ഓണ്‍ലൈനായി വോട്ടര്‍ ലിസ്റ്റില്‍ പേര് ചേര്‍ക്കാനാണ് ഇപ്പോള്‍ കേരള തെരഞ്ഞെടുപ്പ് കമീഷന്‍ അവസരം നല്‍കുന്നത്. പേരും വിവരങ്ങളുമടക്കമുള്ള വിവരങ്ങളും ഫോട്ടോയും അപ്ലോഡ് ചെയ്യുകയാണ് വേണ്ടത്.ഈ മാസം 25വരെയാണ് പേരു ചേര്‍ക്കാന്‍ അവസരം നല്‍കുന്നത്.
വിവരങ്ങള്‍ ശരിയാണെന്ന് സ്വയം സാക്ഷ്യപ്പെടുത്തിയാല്‍ മതിയാവും. ഓണ്‍ലൈനായി പേരുചേര്‍ക്കാന്‍ പ്രവാസിക്ക് ആദ്യമായാണ് അവസരം ലഭിക്കുന്നത്. കഴിഞ്ഞ ലോക്‌സഭാ തെരഞ്ഞെടുപ്പ് സമയത്ത് പ്രവാസികള്‍ക്ക് വോട്ടര്‍ ലിസ്റ്റില്‍ പേരു ചേര്‍ക്കാന്‍ അവസരമുണ്ടെങ്കിലും അപേക്ഷകള്‍ നാട്ടിലെ താലൂക്ക് ഓഫിസുകളില്‍ സമര്‍പ്പിക്കണമായിരുന്നു.
കേരളത്തിലെ തെരഞ്ഞെടുപ്പ് കമീഷന്റെ വെബ്‌സൈറ്റിലാണ്് പേരുകള്‍ രജിസ്റ്റര്‍ ചെയ്യേണ്ടത്. മൂന്ന് ഘട്ടങ്ങളിലായാണ് പേര് രജിസ്റ്റര്‍ ചെയ്യേണ്ടത്. ജില്ല, ജനന തീയതി, പ്രവാസിയാണോ തുടങ്ങിയ ചോദ്യങ്ങളാണ് ഒന്നാം ഘട്ടത്തിലുള്ളത്. കുടുബത്തിലെ തിരിച്ചറിയല്‍ കാര്‍ഡുടമയുടെ നമ്പറും വിവരങ്ങളുമാണ് രണ്ടാം ഘട്ടത്തില്‍. പേര്, വിലാസം, വീട്ടുനമ്പര്‍, വീട്ടുപേര് തുടങ്ങിയ ഏഴ് കോളങ്ങളാണ് മൂന്നാം ഘട്ടത്തിലുള്ളത്. പിന്നീട് ഫോട്ടോ അപ്ലോഡ് ചെയ്യണം. വെളുത്തതോ ഇളം നിറത്തിലോ ബാക്ക്ഗ്രൗണ്ടുള്ളതാവണം ഫോട്ടോ. കണ്ണുകള്‍ ശരിയായി കാണുന്നതും മുഖം നേരെയുള്ളതുമാകണം.ഫോട്ടോ 180 കെ.ബിയില്‍ താഴെയുള്ളതാകണമെന്നും നിര്‍ദേശമുണ്ട്. നാളുകളായുള്ള പ്രവാസികളുടെ ആവശ്യത്തിനാണ് ഇതോടെ പരിഹാരമായിരിക്കുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
