ഉറങ്ങാതെ കാത്തിരുന്ന് യു എ ഇ... അറബ് മേഖല പ്രതീക്ഷകളോടെ കാത്തിരിക്കുന്ന യുഎഇ ചൊവ്വാ പേടക വിക്ഷേപണത്തിനു മണിക്കൂറുകള് മാത്രം
അറബ് മേഖല പ്രതീക്ഷകളോടെ കാത്തിരിക്കുന്ന യുഎഇ ചൊവ്വാ പേടക വിക്ഷേപണത്തിനു മണിക്കൂറുകള് മാത്രം. ബഹിരാകാശം എന്ന് കേള്ക്കുമ്പോള് ജപ്പാനെയും ചൈനയേയും അമേരിക്കയേയും റഷ്യയേയും മാത്രം ഓര്മവരുന്ന കാലം കഴിഞ്ഞു. അറബ് ലോകത്തിന് അപ്രാപ്യമെന്ന് പലരും വിധിയെഴുതിയ ദൗത്യത്തിനാണ് ഇന്ന് അര്ധരാത്രി താനിഗാഷിമ ഐലന്റില് തിരികൊളുത്തുന്നത്. എണ്ണ കഴിഞ്ഞാല് ഒന്നുമില്ലെന്ന് എഴുതിത്തള്ളി മാറ്റി നിര്ത്തിയ അറബ് ജനതയുടെ പ്രതീക്ഷയുടെയും ആത്മാഭിമാനത്തിന്റെയും ശുഭാപ്തിവിശ്വാസത്തിന്റെയും പ്രതിനിധിയാണ് ഹോപ്പ് പ്രോബ്.
ജപ്പാനിലെ തനെഗഷിമ സ്പേസ് സെന്ററില് നാളെ പുലര്ച്ചെ 12.51ന് വിക്ഷേപണം കഴിഞ്ഞാലുടന് ദുബായിലെ ഗ്രൗണ്ട് സ്റ്റേഷന് ഉപഗ്രഹത്തിന്റെ നിയന്ത്രണം ഏറ്റെടുക്കും. തുടര്ന്നുള്ള 30 ദിവസം മുഹമ്മദ് ബിന് റാഷിദ് സ്പേസ് സെന്ററിലെ (എംബിആര്എസ്സി) ശാസ്ത്രജ്ഞര് 24 മണിക്കൂറും ഉപഗ്രഹത്തെ നിരീക്ഷിക്കും.
ചൊവ്വയിലേക്കുള്ള ഗതി നിയന്ത്രിക്കുകയും ഭൂമിയുമായുള്ള ബന്ധം നിലനിര്ത്തുകയും ചെയ്യുകയെന്ന സങ്കീര്ണ ഘട്ടമാണിത്. റോക്കറ്റില് നിന്ന് ഉപഗ്രഹം വേര്പെട്ടാലുടന് സിഗ്നലുകള് ലഭിച്ചുതുടങ്ങുമെന്ന് ഗ്രൗണ്ട് കണ്ട്രോള് സ്റ്റേഷന് മേധാവിയും എമിറേറ്റ്സ് മാര്സ് മിഷന് (ഇഎംഎം) ഡപ്യൂട്ടി പ്രൊജക്ട് മാനേജരുമായ സകരിയ അല് ഷംസി പറഞ്ഞു.
പേടകത്തിന്റെ സ്ഥാനം കൃത്യമായി നിര്ണയിക്കാനും ഘടകങ്ങള് പൂര്ണമായും പ്രവര്ത്തനസജ്ജമാണോ എന്നും മനസ്സിലാക്കാനും സാധിക്കും. നക്ഷത്രങ്ങളെക്കുറിച്ച് അറിയാനുള്ള സ്റ്റാര് ട്രാക്കറുകള്, ചൊവ്വയിലെ വെള്ളം, മഞ്ഞുകണങ്ങള്, പൊടിപടലങ്ങള്, അന്തരീക്ഷത്തിലെ മറ്റു പ്രത്യേകതകള് എന്നിവ കണ്ടെത്താനുള്ള എമിറേറ്റ്സ് എക്സ്പ്ലൊറേഷന് ഇമേജര്), 20 ഗീഗാബൈറ്റ് ഡേറ്റ സ്റ്റോറേജ്, അള്ട്രാവയലറ്റ് സ്പെക്ട്രോമീറ്റര് തുടങ്ങിയ സുപ്രധാന ഘടകങ്ങളാണ് ഉപഗ്രഹത്തിലുള്ളത്.
ഇതിന്റെ ഊര്ജസ്രോതസ്സ് , എന്തിനും ഏതിനും ആത്മവിശ്വാസം പകര്ന്ന് ഒപ്പം നിലക്കുന്ന യു.എ.ഇ ഭരണാധികാരികളാണ് . അസാധ്യം എന്നൊരു വാക്ക് നമ്മുടെ ഡിക്ഷ്ണറിയില് ഇല്ല എന്നാണ് ദുബൈ കിരീടാവകാശിയും എക്സിക്യുട്ടീവ് കൗണ്സില് ചെയര്മാനുമായ ശൈഖ് ഹംദാന് ബിന് മുഹമ്മദ് ബിന് റാഷിദ് ആല് മക്തൂമിന്റെ ലൈന്. ഈ വാക്കുകള് മുറുകെപിടിച്ചാണ് ഹോപ്പിനൊപ്പവും യു.എ.ഇ കുതിക്കുന്നത്.
ബഹിരാകാശ ലോകത്തേക്ക് മനുഷ്യനെ അയച്ച് ഒരുവര്ഷം തികയുന്നതിന് മുന്പേ ചൊവ്വയിലും കൈയൊപ്പ് ചാര്ത്തുന്നതോടെ ശാസ്ത്ര ലോകത്തെ ഒഴിവാക്കാനാകാത്ത കണ്ണിയായി യു.എ.ഇ മാറുമെന്നുറപ്പ്.
"
https://www.facebook.com/Malayalivartha
