സൗദി അറേബ്യയിലെ ആരോഗ്യ പ്രവര്‍ത്തകര്‍ക്ക് പുതിയ ഡ്രസ് കോഡുമായി അധികൃതര്‍. രാജ്യത്തെ ആശുപത്രികള്‍, പ്രാഥമികാരോഗ്യ കേന്ദ്രങ്ങള്‍ തുടങ്ങിയ ആരോഗ്യ കേന്ദ്രങ്ങളിലെ സ്ത്രീ പുരുഷ ഭേദമന്യേ എല്ലാ ജീവനക്കാര്‍ക്കും ബാധകമാണ് പുതിയ ഡ്രസ് കോഡ്. സ്ഥിരം ജീവനക്കാരും താത്കാലിക ജീവനക്കാരും ട്രെയിനി ജീവനക്കാരും ഇതില്‍പെടും.

ശരീര വടിവുകള്‍ എടുത്ത് കാട്ടുന്നതോ ഇറുകിയതോ ആയ വസ്ത്രങ്ങള്‍ പാടില്ല. അതുപോലെ തന്നെ ശരീരഭാഗങ്ങള്‍ പുറത്ത് കാണുന്നതോ അകത്തുള്ളവ പുറത്ത് കാണുന്നതോ ആയ മിനി ഡ്രസ്സുകളും സുതാര്യമായ ഡ്രസ്സുകളും പാടില്ല. ശരീരഭാഗങ്ങള്‍ നല്ലതുപോലെ മറയ്ക്കുന്നതും എന്നാല്‍ ഇറുകിയത് അല്ലാത്തതുമായ വസ്ത്രങ്ങള്‍ ആകണം ധരിക്കേണ്ടത്. ടീ ഷര്‍ട്ടുകളും ടോപ്പുകളും ധരിക്കാന്‍ പാടില്ല. പാര്‍ട്ടിയ്ക്ക് പോകുന്നതു പോലെ വളരെയധികം മേക്കപ്പിട്ടും ജീവനക്കാര്‍ ആശുപത്രികളില്‍ എത്താന്‍ പാടില്ല. ചുണ്ടിലും കവിളിലും കണ്ണിലുമെല്ലാം ശ്രദ്ധിക്കപ്പെടാത്ത പോലെ ചെറിയ രീതിയിലുള്ള മേക്കപ്പുകള്‍ ആകാം. എന്നാല്‍ തലമുടിയില്‍ ഒന്നും വലിയ പരീക്ഷണങ്ങള്‍ പാടില്ല.

സ്വര്‍ണ്ണാഭരണങ്ങള്‍, മറ്റ് ആകര്‍ഷകമായ ആഭരണങ്ങള്‍, തൊപ്പി എന്നിവ ധരിച്ച് ആരോഗ്യകേന്ദ്രങ്ങളില്‍ എത്തുന്നതിനും വിലക്ക് ഏര്‍പ്പെടുത്തിയിട്ടുണ്ട്. ഇസ്ലാം മതത്തിന്റെ നിയമങ്ങള്‍ക്കും വിശ്വാസങ്ങള്‍ക്കും നിരക്കുന്ന തരത്തിലുളള രീതിയിലായിരിക്കണം ആരോഗ്യ കേ്ദ്രങ്ങളില്‍ വരേണ്ടത്. നിയമങ്ങള്‍ക്ക് വിരുദ്ധമായ വാചകങ്ങളോ മുദ്രാവാക്യങ്ങളോ ചിത്രങ്ങളോ ഒന്നും തന്നെ വസ്ത്രങ്ങളില്‍ പാടില്ല. ആശുപത്രിയില്‍ എത്തുന്നവര്‍ ജീവിതത്തിന്റെ വിവിധ മേഖലകളില്‍ നിന്നു എത്തുന്നവരാണ്. വിനോദ സഞ്ചാര കേന്ദ്രങ്ങളിലും ക്ലബ്ബുകളിലും എത്തുന്നവരെ പോലെ ഇഷ്ടപ്രകാരമോ സന്തോഷപ്രകാരമോ ആയിരിക്കില്ല ആശുപത്രികളിലേയ്ക്ക് എത്തുന്നത്. അതുകൊണ്ടു തന്നെ അവര്‍ക്ക് മെഡിക്കല്‍ സേവനങ്ങള്‍ നല്‍കുന്ന ആരോഗ്യ പ്രവര്‍ത്തകര്‍ അവരുടെ വികാരങ്ങളെ മാനിക്കുന്ന തരത്തിലായിരിക്കണം ആശുപത്രികളില്‍ വരേണ്ടതെന്നും ആരോഗ്യ മന്ത്രാലയം വിലയിരുത്തുന്നു. മന്ത്രാലയത്തിലെ മുതിര്‍ന്ന ഉദ്യോഗസ്ഥരെ ഉദ്ധരിച്ച് സൗദി ഗസറ്റ് ആണ് ഈ വിവരം റിപ്പോര്‍ട്ട് ചെയ്തിരിക്കുന്നത്.

ഇതിന്റെ പൂര്‍ണ്ണ ചുമതല ആരോഗ്യ കേന്ദ്രങ്ങളിലെ മേല്‍ ഉദ്ദ്യോഗസ്ഥര്‍ക്കാണ്. തങ്ങളുടെ കീഴില്‍ ജോലി ചെയ്യുന്നവരെല്ലാം പുതിയ ഡ്രസ് കോഡ് ധരിച്ചു മാത്രമാണ് ജോലിയ്ക്ക് എത്തുന്നത് എന്ന് ഉറപ്പ് വരുത്തണമെന്നും അല്ലാത്ത പക്ഷം കടുത്ത നടപടികള്‍ സ്വീകരിക്കണമെന്നുമാണ് ഉത്തരവ്. ഇതുമായി ബന്ധപ്പെട്ട നിര്‍ദ്ദേശങ്ങളും മറ്റ് കാര്യങ്ങളും ഇതിനോടകം തന്നെ ആശുപത്രികളിലെ വിവിധ വകുപ്പ് തലവന്മാര്‍ക്കും ഡയറക്ടര്‍ന്മാര്‍ക്കും ലഭിച്ചു കഴിഞ്ഞതായാണ് റിപ്പോര്‍ട്ടുകള്‍. പുതിയ നിയമങ്ങള്‍ പാലിക്കാതെ എത്തുന്നവര്‍ക്കെതിരെ കടുത്ത ശിക്ഷാ നടപടികള്‍ സ്വീകരിക്കാനാണ് സൗദി ഭരണകൂടത്തിന്റെ തീരുമാനം.