കോവിഡ് പ്രതിരോധത്തിനായി സൂക്ഷിച്ചിരുന്ന ഒന്നര ലക്ഷം മാസ്‌കുകള്‍ മോഷ്ടിച്ച ആറംഗ പാകിസ്ഥാനി സംഘത്തിന് തടവും പിഴയും നാടുകടത്തലും ശിക്ഷ വിധിച്ച് ദുബായ് കോര്‍ട്ട് ഓഫ് ഫസ്റ്റ് ഇന്‍സ്റ്റന്‍സ്. ചൈനീസ് വ്യാപാരിയുടെ റാസല്‍ ഖോറിലെ വെയര്‍ഹൗസ് തകര്‍ത്താണ് ഇവര്‍ കവര്‍ച്ച നടത്തിയത്. ആയിരം മാസ്‌കുകളടങ്ങിയ 156 പെട്ടികളാണ് ഇവര്‍ മോഷ്ടിച്ചത്. വാഹനങ്ങളിലെത്തിയ സംഘം വെയര്‍ഹൗസിന്റെ പൂട്ടുകള്‍ ഇരുമ്പ് ദണ്ഡുകള്‍ ഉപയോഗിച്ച് തകര്‍ത്ത ശേഷം അകത്തുകടന്ന് മോഷണം നടത്തുകയായിരുന്നു.

പിറ്റേന്ന് രാവിലെ ഒമ്പതരയോടെ വ്യാപാരി കടയിലെത്തിയപ്പോഴാണ് കവര്‍ച്ച വിവരം അറിയുന്നത്. തുടര്‍ന്ന് പോലീസിനെ വിവരം അറിയിക്കുകയും ഉദ്യോഗസ്ഥര്‍ സ്ഥലത്തെത്തി അന്വേഷണം ആരംഭിക്കുകയും ചെയ്തു. പ്രദേശത്തെ സിസി ടിവി ദൃശ്യങ്ങള്‍ ഉള്‍പ്പെടെയുള്ളവ പരിശോധിച്ചതില്‍ നിന്ന് ലഭിച്ച സൂചനകളുടെ അടിസ്ഥാനത്തിലാണ് പ്രതികളെ പിടികൂടിയത്. പൂട്ട് തകര്‍ക്കാന്‍ ഉപയോഗിച്ച ഇരുമ്പ് ദണ്ഡ് സംഘത്തിലൊരാളുടെ വാഹനത്തില്‍ നിന്ന് പോലീസ് കണ്ടെടുത്തിരുന്നു.

പുലര്‍ച്ചെ രണ്ടു മണിക്കാണ് തങ്ങള്‍ കൃത്യം ചെയ്തതെന്നും മോഷ്ടിച്ച മാസ്‌കുകള്‍ ഒരു ബംഗ്ലാദേശി വ്യാപാരിയ്ക്കാണ് വിറ്റതെന്നും ഇവര്‍ ചോദ്യം ചെയ്യലില്‍ സമ്മതിച്ചു. അല്‍ റാഷിദിയ്യ പോലീസാണ് ഇക്കാര്യം വ്യക്തമാക്കിയത്. മൂന്നു വര്‍ഷം തടവും 1.5 ലക്ഷം ദിര്‍ഹം പിഴയുമാണ് പ്രതികള്‍ക്ക് ശിക്ഷ വിധിച്ചിരിക്കുന്നത്. തടവ് കാലാവധി പൂര്‍ത്തിയാകുമ്പോള്‍ ഇവരെ നാടുകടത്തണമെന്നും ദുബായ് കോര്‍ട്ട് ഓഫ് ഫസ്റ്റ് ഇന്‍സ്റ്റന്‍സ് ഉത്തരവിട്ടു.