കലയുടെയും സാംസ്‌കാരിക സൗന്ദര്യത്തിന്റെയും ഭംഗി പുറത്ത് പ്രകടമാക്കി ഷാര്‍ജ ബിനാലെയ്ക്ക് വെള്ളിയാഴ്ച കൊടിയിറങ്ങും. റോളയിലെ മ്യൂസിയത്തില്‍ ഷാര്‍ജ ആര്‍ട് ഫൗണ്ടേഷന്‍(സാഫ്) ആണ് മൂന്ന് മാസം നീണ്ടുനിന്ന കലാ മാമാങ്കം സംഘടിപ്പിച്ചത്.
ഷാര്‍ജ ബിനാലെ 12: ദ് പാസ്റ്റ്, ദ് പ്രസന്റ്, ദ് പോസിബിള്‍ എന്ന പ്രമേയത്തില്‍ നടന്ന 12ാമത് ബിനാലെയില്‍ ഇന്ത്യയില്‍ നിന്നടക്കം 25 രാജ്യങ്ങളില്‍ നിന്ന് അമ്പതിലേറെ പ്രമുഖ കലാകാരന്മാരും സാംസ്‌കാരിക പ്രവര്‍ത്തകരും പങ്കെടുത്തു.

ചിത്രശില്പ പ്രദര്‍ശനത്തോടൊപ്പം ശില്പശാല, സെമിനാര്‍, സംവാദം, ചര്‍ച്ച, തത്സമയ ചിത്ര രചനയും ശില്പനിര്‍മാണവും, കലാപരിപാടികള്‍ എന്നിവയും അരങ്ങേറി. മലയാളി യുവ ചിത്രകാരന്‍ ഉണ്ണികൃഷ്ണന്‍, നിഖില്‍ ചോപ്ര എന്നിവരും ബേസല്‍ അബ്ബാസ്, റുവാന്‍ അബു റഹ്മ, ഇതെല്‍ അദ്‌നാന്‍, ബാബക് അഫ്രാസിയാബി, അബ്ദുല്ല സഅദി തുടങ്ങി നൂറോളം പേര്‍ തങ്ങളുടെ ഏറ്റവും പുതിയ സൃഷ്ടികള്‍ പ്രദര്‍ശിപ്പിച്ചു.

ഇഷ്ടികയില്‍ തീര്‍ത്ത ഉണ്ണികൃഷ്ണന്റെ ഇന്‍സ്റ്റലേഷന്‍ വിദേശികളുടെയും സ്വദേശികളുടെയും ശ്രദ്ധ ഒരുപോലെ പിടിച്ചുപറ്റി. കലാകാരന്മാരുടെ പരീക്ഷണ ശാലയും ആസ്വാദകര്‍ക്ക് നവ്യാനുഭൂതിയുമാണ് ബിനാലെ പകര്‍ന്നത്. നൃത്തം, നാടകം, സംഗീതസന്ധ്യ എന്നിവയും ഇതോടൊപ്പം അരങ്ങേറി. യുഎഇയുടെ വിവിധ ഭാഗങ്ങളില്‍ നിന്ന് ഒട്ടേറെ പേര്‍ ബിനാലെ കാണാനെത്തിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha