ചികിത്സക്ക് നാട്ടില്‍നിന്ന് ഒമാനിലേക്ക് മരുന്നുകള്‍ കൊണ്ടുവരുന്ന പ്രവാസികള്‍ക്കായി ഒമാന്‍ ആരോഗ്യമന്ത്രാലയം മാര്‍ഗനിര്‍ദേശങ്ങള്‍ പുറത്തിറക്കി. ചികിത്സക്കായി കൊണ്ടുവരുന്ന ലഹരിയടങ്ങുന്ന മരുന്നുകളുമായി നിരവധി പ്രവാസികള്‍ വിമാനത്താവളങ്ങളില്‍ പിടിയിലായ സാഹചര്യത്തിലാണ് മന്ത്രാലയം സര്‍ക്കുലര്‍ ഇറക്കിയത്. ലഹരിയടങ്ങുന്ന മരുന്നുകള്‍ (നാര്‍ക്കോട്ടിക്, സൈക്കോട്രോപിക് വിഭാഗങ്ങളില്‍ പെടുന്നവ) കൊണ്ടുവരുന്നതിന് രോഗി ചികിത്സക്ക് വിധേയമാകുന്ന സ്ഥാപനത്തില്‍നിന്നുള്ള മെഡിക്കല്‍ റിപ്പോര്‍ട്ട് നിര്‍ബന്ധമാണെന്ന് സര്‍ക്കുലര്‍ പറയുന്നു.
ആറുമാസത്തിനുള്ളിലുള്ള റിപ്പോര്‍ട്ടുകള്‍ മാത്രമാണ് അംഗീകരിക്കുക. രോഗിയുടെ പേര്, വയസ്സ്, രോഗാവസ്ഥ, മരുന്നിന്റെ പേര്, ശക്തി, രോഗി കഴിക്കുന്ന അളവ് എന്നിവ ശരിയായ രീതിയില്‍ രേഖപ്പെടുത്തണം. മെഡിക്കല്‍ റിപ്പോര്‍ട്ടിന് പകരം ഡോക്ടറുടെ കുറിപ്പടി ഉപയോഗിച്ചും മരുന്നുകള്‍ കൊണ്ടുവരാം.
ഇവയിലും മുകളില്‍ പറഞ്ഞ വിവരങ്ങള്‍ രേഖപ്പെടുത്തണം. ഇതോടൊപ്പം കൊണ്ടുവരുന്ന ഓരോ മരുന്നിന്റെയും അളവ്, ഡോക്ടറുടെ ഒപ്പ്, സീല്‍ എന്നിവയും ഉണ്ടാകണം. വ്യക്തിപരമായ ആവശ്യത്തിന് ഒരു മാസത്തെ മരുന്ന് മാത്രമേ കൊണ്ടുവരാന്‍ അനുവദിക്കൂ. സന്ദര്‍ശക വിസയില്‍ വരുന്നവര്‍ക്ക് ഒരു മാസത്തേക്കോ സന്ദര്‍ശനം ഒരു മാസത്തില്‍ താഴെയാണെങ്കില്‍ അത്രയും കാലത്തേക്കോ മാത്രമേ മരുന്ന് കൊണ്ടുവരാവൂ.
ഒരു മാസമാണോ സന്ദര്‍ശന കാലാവധിയാണോ ഏറ്റവും കുറഞ്ഞതെന്ന് പരിശോധിക്കും. ഒരു മാസത്തിലധികം മരുന്ന് കഴിക്കണമെന്നുള്ളവര്‍ പ്രാദേശിക ഹെല്‍ത്ത് സെന്റര്‍ സന്ദര്‍ശിച്ച് പരിശോധനക്ക് വിധേയമാകണം.
ഇവിടെനിന്ന് ലഭിക്കുന്ന കുറിപ്പടി ഉപയോഗിച്ച് കഴിക്കുന്നതോ അല്ലെങ്കില്‍ അതിന്റെ പകരമുള്ളതോ ആയ മരുന്ന് ഒമാന്‍ വിപണിയില്‍നിന്ന് വാങ്ങാം. തുടര്‍ന്ന് കഴിക്കാനുള്ള മരുന്ന് ഒമാന്‍ വിപണിയില്‍ ലഭ്യമാകാത്തപക്ഷം ആരോഗ്യമന്ത്രാലയം ഡയറക്ടറേറ്റിന്റെ പ്രത്യേക അനുമതി വാങ്ങി നാട്ടില്‍നിന്ന് കൊണ്ടുവരാവുന്നതാണ്.
രോഗി നേരിട്ടാണ് മരുന്ന് കൊണ്ടുവരുന്നതെങ്കില്‍ റെസിഡന്റ് കാര്‍ഡിന്റെ കോപ്പി കൈയില്‍ കരുതേണ്ടതാണ്. കൊണ്ടുവരുന്നത് ബന്ധുവാണെങ്കില്‍ അവരുടെയും രോഗിയുടെയും തിരിച്ചറിയല്‍ കാര്‍ഡിന്റെ പകര്‍പ്പുകളും രോഗിയുടെ സമ്മതപത്രവും ഹാജരാക്കണം.

അനുമതിയില്ലാതെ അധികമായി കൊണ്ടുവരുന്ന മരുന്നുകള്‍ പിടിച്ചെടുത്ത് ഡ്രഗ് കണ്‍ട്രോള്‍ ഡിപ്പാര്‍ട്ട്‌മെന്റിന്റെ നേതൃത്വത്തില്‍ നശിപ്പിക്കുമെന്ന് ആക്ടിങ് ഡയറക്ടര്‍ ജനറല്‍ ഡോക്ടര്‍ അലി ബിന്‍ ഹംദാന്‍ അല്‍ റസിഹി പുറപ്പെടുവിച്ച സര്‍ക്കുലറില്‍ പറയുന്നു. നാര്‍കോട്ടിക്കോ സൈക്കോട്രോപ്പിക്കോ അല്ലാത്ത സാധാരണ മരുന്നുകള്‍ കൊണ്ടുവരാനും ഡോക്ടറുടെ മെഡിക്കല്‍ റിപ്പോര്‍ട്ട് വേണം. മൂന്ന് മാസത്തേക്ക് മാത്രമേ ഇത്തരം മരുന്നുകള്‍ കൊണ്ടുവരാന്‍ അനുവദിക്കൂ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha