നിതാഖത്തിലെ കാര്‍ക്കശ്യം കുറക്കാനൊരുങ്ങി സൗദി. ആരോപണങ്ങളുമായി വ്യാപാരികള്‍ രംഗത്ത്. സൗദിയില്‍ നിതാഖാത് പദ്ധതിയില്‍ ഭേദഗതി വരുത്താന്‍ സാധ്യത. പല മേഖലകളിലും ജോലി ചെയ്യാന്‍ സൗദികള്‍ തയ്യാറാകാത്തതാണ് കാരണം. ചില മേഖലകളില്‍ സ്വദേശീവല്‍ക്കരണത്തിന്റെ തോത് കുറയ്!ക്കും എന്നാണ് സൂചന.
പല മേഖലകളിലും ജോലി ചെയ്യാന്‍ സ്വദേശികളെ കിട്ടാത്ത സാഹചര്യത്തിലാണ് നിതാഖാത് പദ്ധതി ഭേതഗതി ചെയ്യുന്നതിനെ കുറിച്ച് അധികൃതര്‍ ആലോചിക്കുന്നത്. തൊഴിലുടമകളുടെ നിരന്തരമായ പരാതി പരിഗണിച്ചാണ് തീരുമാനം. അപ്രായോഗികമായ സ്വദേശീവല്‍ക്കരണ പദ്ധതി മൂലം പല കമ്പനികളും പ്രതിസന്ധിയിലാണെന്നും സ്വദേശീവല്‍ക്കരണത്തിന്റെ ക്വാട്ട കുറയ്ക്കണമെന്നും വിവിധ മന്ത്രാലയങ്ങള്‍ സൗദി തൊഴില്‍ മന്ത്രാലയത്തോട് ആവശ്യപ്പെട്ടിരുന്നു. ചില തസ്ഥികകളിലും നഗരത്തിനു പുറത്തുള്ള സ്ഥലങ്ങളിലും ജോലി ചെയ്യാന്‍ സൌദികള്‍ താല്‍പര്യം കാണിക്കുന്നില്ലെന്ന് പരാതിക്കാര്‍ ചൂണ്ടിക്കാട്ടി. ഇതുസംബന്ധമായി കൌണ്‍സില്‍ ഓഫ് സൗദി ചേംബേഴ്‌സ് വിശദമായ പഠന റിപ്പോര്‍ട്ട് തൊഴില്‍ മന്ത്രാലയത്തിനു സമര്‍പ്പിച്ചു. ഈ പഠനത്തിന്റെ അടിസ്ഥാനത്തിലാണ് നിതാഖാത് പദ്ധതിയില്‍ ഭേതഗതി വരുത്താന്‍ ആലോചിക്കുന്നത്. സ്വദേശീവല്‍ക്കരണ തോത് വര്‍ധിപ്പിച്ചു കൊണ്ടുള്ള നിതാഖാത്തിന്റെ മൂന്നാം ഘട്ടം നടപ്പിലാക്കുന്നത് തൊഴിലുടമകളുടെ ആവശ്യപ്രകാരം നീട്ടി വെച്ചിരുന്നു. പുതിയ സാഹചര്യത്തില്‍ ചില മേഖലകളില്‍ സ്വദേശീവല്‍ക്കരണ തോത് കുറയ്ക്കാനാണ് സാധ്യത. ഇത് സ്വകാര്യസ്ഥാപനങ്ങള്‍ക്ക് ആശ്വാസമാവുകയും വിദേശികള്‍ക്കുള്ള തൊഴിലവസരം വര്‍ധിക്കുകയും ചെയ്യുമെന്നാണ് പ്രതീക്ഷ.