കുവൈത്തില്‍ മതിയായ രേഖകളില്ലാതെ 19 മലയാളികള്‍ ഉള്‍പ്പെടെ 30 ഇന്ത്യന്‍ നഴ്‌സുമാര്‍ അറസ്റ്റിലായിട്ട് ആറ് ദിവസം. ഒരു സ്വകാര്യ ക്ലിനിക്കില്‍ നടത്തിയ പരിശോധനയിലാണ് ഇവര്‍ അറസ്റ്റിലായത്. പരിശോധനയില്‍ ഇവരുടെ കൈയില്‍ ആവശ്യമായ രേഖകളില്ലെന്ന് കണ്ടെത്തിയതോടെയാണ് നടപടിയെടുത്തതെന്ന് കുവൈത്ത് ആഭ്യന്തര മന്ത്രാലയം അറിയിച്ചു.

കുവൈത്തില്‍ ജോലി ചെയ്യാനുള്ള ലൈസന്‍സോ യോഗ്യതയോ ഇവര്‍ക്കില്ലെന്നാണ് കണ്ടെത്തല്‍. എന്നാല്‍ ഇവര്‍ ജോലിയ്ക്ക് യോഗ്യരാണെന്നും ശരിയായ തൊഴില്‍ വിസയും സ്‌പോണ്‍സര്‍ഷിപ്പും ഉണ്ടെന്നും മലയാളി നഴ്‌സുമാരുടെ കുടുംബാംഗങ്ങള്‍ അവകാശപ്പെടുന്നു.മാലി മേഖലയില്‍ സ്ഥിതി ചെയ്യുന്ന ആശുപത്രിയില്‍ ഹൃൂമന്‍ റിസോഴ്‌സ് കമ്മിറ്റി നടത്തിയ സുരക്ഷാ പരിശോധനയിലാണ് നഴ്‌സുമാര്‍ കുടുങ്ങിയത്.

അറസ്റ്റിലായ നഴ്‌സുമാരെ നാടുകടത്തല്‍ കേന്ദ്രത്തിലേയ്ക്ക് മാറ്റിയിട്ടുണ്ട്. ഇതില്‍ പലരും മൂന്ന് മുതല്‍ 10വര്‍ഷങ്ങളായി ഇവിടെ ജോലി ചെയ്യുന്നവരാണ്. സുരക്ഷാ പരിശോധനയില്‍ ആകെ 60 പേര്‍ പിടിയിലായി. അറസ്റ്റിലായ മലയാളി നഴ്‌സുമാരില്‍ പിഞ്ചുകുഞ്ഞുങ്ങളുമായി എത്തിയ നിരവധി സ്ത്രീകളുമുണ്ട്. അഞ്ച് മുലയൂട്ടുന്ന അമ്മമാരും പിടിയിലായ നഴ്‌സുമാരുടെ കൂട്ടത്തിലുണ്ട്.

അതേസമയം, അറസ്റ്റിലായ മലയാളികള്‍ ഉള്‍പ്പെട്ട നഴ്‌സുമാരെ മോചിപ്പിക്കാന്‍ നടപടികള്‍ പുരോഗമിക്കുകയാണെന്ന് വിദേശകാര്യ സഹമന്ത്രി വി മുരളീധരന്‍ അറിയിച്ചു. വിദേശകാര്യ മന്ത്രാലയവും ഇന്ത്യന്‍ എംബസിയും അധികാരികളുമായി സംസാരിച്ചുവരുകയാണെന്നും അദ്ദേഹം പറഞ്ഞു. നിലവില്‍ ആശങ്കപ്പെടേണ്ട സാഹചര്യം ഇല്ലെന്നും കൈക്കുഞ്ഞുങ്ങള്‍ ഉള്ളവര്‍ക്ക് അവരെ കാണാനും മുലയൂട്ടാനും ഉള്ള അനുമതി നല്‍കിയിട്ടുണ്ടെന്നും മന്ത്രി അറിയിച്ചിട്ടുണ്ട്.