കുവൈത്ത് വിമാനത്താവളത്തിന് നേരെ ഇറാന്റെ ഡ്രോണ് ആക്രമണം
കുവൈത്ത് രാജ്യാന്തര വിമാനത്താവളത്തിലെ ടെര്മിനല്1നെ ലക്ഷ്യമിട്ട് ഇറാന് നടത്തിയ ഡ്രോണ് ആക്രമണത്തില് നിരവധി പേര്ക്ക് പരുക്കേറ്റതായി റിപ്പോര്ട്ട്. ആക്രമണത്തെ തുടര്ന്ന് വിമാനത്താവളത്തിലെ ചില സൗകര്യങ്ങള്ക്ക് നാശനഷ്ടമുണ്ടായതായും അധികൃതര് അറിയിച്ചു. സുരക്ഷാ സാഹചര്യങ്ങള് കണക്കിലെടുത്ത് അടുത്ത അറിയിപ്പ് ഉണ്ടാകുന്നതുവരെ വിമാന സര്വീസുകള് താല്ക്കാലികമായി നിര്ത്തിവെച്ചിരിക്കുകയാണ്. ലാന്ഡ് ചെയ്യാനെത്തിയ വിമാനങ്ങള് മറ്റ് വിമാനത്താവളങ്ങളിലേക്ക് തിരിച്ചുവിട്ടു.
ടെര്മിനല്1 ലക്ഷ്യമാക്കി നിരവധി ഡ്രോണുകള് എത്തിയതായി കുവൈത്ത് പ്രതിരോധ മന്ത്രാലയ വക്താവ് കേണല് സ്റ്റാഫ് സൗദ് അബ്ദുല് അസീസ് അല്അത്വാന് അറിയിച്ചു. പരുക്കേറ്റവര്ക്ക് അടിയന്തര ചികിത്സ ലഭ്യമാക്കിയതായും അദ്ദേഹം വ്യക്തമാക്കി. സ്ഥിതിഗതികള് സായുധസേന നിരീക്ഷിച്ചുവരികയാണെന്നും രാജ്യത്തിന്റെ സുരക്ഷ ഉറപ്പാക്കാന് ആവശ്യമായ എല്ലാ നടപടികളും സ്വീകരിച്ചിട്ടുണ്ടെന്നും അദ്ദേഹം കൂട്ടിച്ചേര്ത്തു.
അതേസമയം, ഗള്ഫ് മേഖലയിലെ അമേരിക്കന് സൈനിക താവളങ്ങള്ക്കുനേരെ ഇറാന് നടത്തിയ മിസൈല്ഡ്രോണ് ആക്രമണങ്ങള് വിജയകരമായി പ്രതിരോധിച്ചതായി യുഎസ് സെന്ട്രല് കമാന്ഡ് അറിയിച്ചു. തുടര്ന്ന് ഇറാനിലെ സൈനിക ലക്ഷ്യങ്ങള്ക്കെതിരെ തിരിച്ചടിനടത്തിയതായും പ്രസ്താവനയില് പറയുന്നു.
ബഹ്റൈനിലെ യുഎസ് നാവികസേനയുടെ അഞ്ചാം കപ്പല്പ്പടയുടെ ആസ്ഥാനവും മറ്റ് സൈനിക കേന്ദ്രങ്ങളും ആക്രമിച്ചതായി ഇറാന് റവല്യൂഷണറി ഗാര്ഡ്സ് അവകാശപ്പെട്ടിരുന്നെങ്കിലും, ഈ വാദം യുഎസ് പൂര്ണമായും തള്ളി. ഗള്ഫ് രാജ്യങ്ങള്ക്കുനേരെ ഇറാന് വിക്ഷേപിച്ച ബാലിസ്റ്റിക് മിസൈലുകളില് ഒന്നും ലക്ഷ്യസ്ഥാനങ്ങളില് എത്തിയില്ലെന്നും യുഎസ് വ്യക്തമാക്കി.
കുവൈത്തിനെ ലക്ഷ്യമിട്ട് വിക്ഷേപിച്ച രണ്ട് മിസൈലുകള് ലക്ഷ്യത്തിലെത്തും മുമ്പ് തകരുകയോ വഴിതെറ്റുകയോ ചെയ്തതായി സെന്ട്രല് കമാന്ഡ് അറിയിച്ചു. ബഹ്റൈനിലേക്ക് വന്ന മൂന്ന് മിസൈലുകള് യുഎസും ബഹ്റൈനും ചേര്ന്നുള്ള വ്യോമപ്രതിരോധ സംവിധാനം വെടിവച്ചിട്ടതായും പ്രസ്താവനയില് പറയുന്നു. രാജ്യത്തെ ലക്ഷ്യമിട്ടുള്ള മിസൈല്ഡ്രോണ് ആക്രമണങ്ങളെ പ്രതിരോധിച്ചതായി കുവൈത്ത് സൈന്യവും സ്ഥിരീകരിച്ചു.
ഇതിനിടെ, രാജ്യാന്തര ജലാതിര്ത്തിയിലൂടെ സഞ്ചരിച്ചിരുന്ന സിവിലിയന് കപ്പലുകള്ക്ക് നേരെ ഇറാന് അയച്ച മൂന്ന് ആക്രമണ ഡ്രോണുകളും യുഎസ് സൈന്യം തകര്ത്തതായി റിപ്പോര്ട്ടുണ്ട്. ഇറാനിലെ സൈനിക ഗ്രൗണ്ട് കണ്ട്രോള് സ്റ്റേഷനുകളെയാണ് അമേരിക്കന് സേന ലക്ഷ്യമിട്ടതെന്നും അധികൃതര് അറിയിച്ചു.
https://www.facebook.com/Malayalivartha
