ജി.സി.സിയിലെ മൂന്നാമത്തെ വലിയ വാഹന വിപണിയാണ് ഒമാന്‍. സര്‍ക്കാര്‍-സ്വകാര്യ മേഖലയിലെ ചെലവ് ചുരുക്കല്‍ നടപടികള്‍ ഒമാനില്‍ വാഹനവില്‍പനയെ ബാധിക്കുന്നതായി കണക്കുകള്‍ സൂചിപ്പിക്കുന്നു. 2014ല്‍ എണ്ണവില ഇടിഞ്ഞുതുടങ്ങിയത് മുതല്‍ ഒമാനില്‍ വാഹനങ്ങളുടെ വില്‍പനയില്‍ കുറവ് ദൃശ്യമാണ്. 2016-ല്‍ രജിസ്റ്റര്‍ ചെയ്ത സ്വകാര്യ വാഹനങ്ങളുടെ എണ്ണത്തില്‍ മുന്‍വര്‍ഷത്തെ അപേക്ഷിച്ച് 6.9 ശതമാനത്തിന്റെ കുറവുണ്ടായതായാണ് കണക്കുകള്‍ കാണിക്കുന്നത്.. 2015ല്‍ 74,113 സ്വകാര്യ വാഹനങ്ങള്‍ രജിസ്റ്റര്‍ ചെയ്തപ്പോള്‍ കഴിഞ്ഞവര്‍ഷം അത് 68,991 ആയാണ് കുറഞ്ഞത്. ഒക്ടോബര്‍, നവംബര്‍, ഡിസംബര്‍ മാസങ്ങളില്‍ രജിസ്‌ട്രേഷനിലുണ്ടായ കുറവ് യഥാക്രമം 5400, 4533, 4300 എന്നിങ്ങനെയാണ്. വാണിജ്യ വാഹനങ്ങളുടെ രജിസ്‌ട്രേഷനില്‍ 23.9 ശതമാനത്തിന്റെ ഇടിവാണ് ഉണ്ടായത്. 2015ല്‍ 68991 ആയിരുന്നത് 19,906 ആയാണ് കുറഞ്ഞത്. റെന്റല്‍ വിഭാഗത്തില്‍ 18.7 ശതമാനത്തിന്റെയും ടാക്‌സി വിഭാഗത്തില്‍ 19.3 ശതമാനത്തിന്റെയും മോട്ടോര്‍ ബൈക്കുകളുടെ വിഭാഗത്തില്‍ 29.4 ശതമാനത്തിന്റെയും നയതന്ത്ര കാര്യാലയങ്ങളിലേക്കുള്ള വാഹനങ്ങളുടെ വിഭാഗത്തില്‍ 19.2 ശതമാനത്തിന്റെയും കുറവാണ് ഉണ്ടായത്. 1,366,148 വാഹനങ്ങളാണ് ഒമാന്‍ നിരത്തുകളില്‍ ഉള്ളതെന്നും ദേശീയ സ്ഥിതി വിവര മന്ത്രാലയത്തിന്റെ കണക്കുകള്‍ പറയുന്നു. ബിസിനസ് മോണിറ്റര്‍ ഇന്റര്‍നാഷനലിന്റെ പഠന റിപ്പോര്‍ട്ടില്‍ പറയുന്നത് പാസഞ്ചര്‍ കാര്‍ വിഭാഗത്തില്‍ മാത്രമാണ് ഒമാനില്‍ ചെറിയ വളര്‍ച്ചയ്ക്ക് സാധ്യതയുളളതെന്ന്ാണ്. 2017 മുതല്‍ 2020 വരെ എട്ട് ശതമാനത്തിന്റെ വളര്‍ച്ചയാണ് ഈ മേഖലയില്‍ പ്രതീക്ഷിക്കുന്നത്. 2018 മുതല്‍ 2020 വരെ 1.1 ശതമാനം മുതല്‍ 2.6 ശതമാനം വരെയായിരിക്കും ആകെ വാഹന വില്‍പനയിലെ വര്‍ധനയെന്നും റിപ്പോര്‍ട്ട് പറയുന്നു. ചെലവഴിക്കലിലെ കര്‍ശന നിയന്ത്രണത്തെ തുടര്‍ന്ന് എല്ലാ മേഖലയിലും പുതിയവാഹനങ്ങള്‍ വാങ്ങുന്നത് കുറഞ്ഞിട്ടുണ്ട്. പുതിയ വാഹനം വാങ്ങുന്ന പ്രവാസികളുടെ എണ്ണവും കുറഞ്ഞിട്ടുണ്ട്.