അമ്പലപ്പുഴ കരുമാടി സരസ്വതിയില്‍ മധുകുമാറിന്റെ വീട്ടുകാര്‍ വ്യാഴാഴ്ച രാവിലെ എഴുന്നേറ്റപ്പോള്‍ ഒരു അത്ഭുതം അവരെ കാത്തിരിക്കുന്നുണ്ടായിരുന്നു. മധുകുമാറും കുടുംബാംഗങ്ങളും ഇക്കഴിഞ്ഞ ചൊവ്വാഴ്ച വൈകിട്ടു ഒരു ബന്ധുവിന്റെ വിവാഹത്തിനായി പോയിരുന്നു.

രാത്രി വൈകി കുടുംബം തിരിച്ചു വന്നപ്പോഴാണ് അടുക്കളവാതില്‍ കുത്തിത്തുറന്ന് അകത്തു കയറിയ മോഷ്ടാവ് കിടപ്പുമുറിയിലെ അലമാരയുടെ പൂട്ടു പൊളിച്ച് ആറു ജോടി കമ്മലും രണ്ടു മോതിരവും മോഷ്ടിച്ചതായി കണ്ടത്. എല്ലാം കൂടി ഒന്നരപ്പവന്‍ വരും. ബുധനാഴ്ച പൊലീസില്‍ പരാതി നല്‍കി.

എന്നാല്‍ ഇന്നലെ രാവിലെ ഉണര്‍ന്നപ്പോള്‍ കള്ളന്‍ കൊണ്ടുപോയ മുതല്‍ വീടിനു മുന്നില്‍ ഇരിക്കുന്നു. അതു മാത്രമല്ല, കളവ് നടത്തിയതിനു മാപ്പപേക്ഷയും എഴുതിവച്ചിരുന്നു.

തൊണ്ടിമുതലും കത്തും കണ്ടപ്പോള്‍ ഉണ്ടായ അദ്ഭുതം പിന്നീട് ആശ്വാസത്തിനു വഴിമാറി. വീട്ടുടമ രണ്ടും പൊലീസിനു കൈമാറി. 'എനിക്കു മാപ്പു നല്‍കുക, എന്റെ നിവൃത്തികേടു കൊണ്ടു സംഭവിച്ചതാണ്, ഇനി ഞാന്‍ ഇങ്ങനെ ഒരു കാര്യം ചെയ്യില്ല. മാപ്പ്, മാപ്പ്, മാപ്പ്. എന്നെ പൊലീസില്‍ പിടിപ്പിക്കരുത്, ഞാന്‍ എടുത്ത സാധനങ്ങള്‍ ഇവിടെ വച്ചു കൊള്ളുന്നു' എന്നായിരുന്നു അക്ഷരത്തെറ്റോടെയുള്ള കത്തിലെ വാചകങ്ങള്‍.

തൊണ്ടി മുതല്‍ കിട്ടിയെങ്കിലും അന്വേഷണം തുടരുമെന്ന് അമ്പലപ്പുഴ എസ്‌ഐ: എം.പ്രതീഷ്‌കുമാര്‍ അറിയിച്ചു.