അപൂര്‍വ ജനനത്തിന് വേദിയൊരുക്കാന്‍ കഴിഞ്ഞതിന്റെ ചാരിതാര്‍ഥ്യത്തില്‍ ആണ് തെള്ളകം കാരിത്താസ് ആശുപത്രി. അത്യപൂര്‍വമായ രക്തഗ്രൂപ്പ് ആയ ബോംബെ ബ്ലഡ് ഗ്രൂപ്പില്‍പ്പെട്ട യുവതിയാണ് കാരിത്താസ് ആശുപത്രിയില്‍ ആണ്‍കുഞ്ഞിനു ജന്മം നല്‍കിയത്. ഇന്ത്യയില്‍ അത്യപൂര്‍വമാണ് ഈ രക്ത ഗ്രൂപ്പ്. ഇതുവരെ 179 പേര്‍ക്ക് മാത്രമാണ് ഈ രക്ത ഗ്രൂപ്പ് ഉള്ളതായി സ്ഥിരീകരിച്ചിട്ടുള്ളത്.

കുമളി പന്തമാക്കല്‍ ഷിജോ തോമസിനും ആഗ്‌നസ് ലൂര്‍ദ് മേരിക്കുമാണ് ആണ്‍കുഞ്ഞ് പിറന്നത്. ആഗ്‌നസ് ചെന്നൈ സ്വദേശിനിയാണ്. ഷിജോ ചെന്നൈയില്‍ ഉദ്യോഗസ്ഥനാണ്. ഇവരുടെ ആദ്യത്തെ കുഞ്ഞാണിത്. ശനിയാഴ്ച രാവിലെ സിസേറിയനിലൂടെയായിരുന്നു ജനനം. കട്ടപ്പനയിലെ ആശുപത്രിയില്‍നിന്നു റഫര്‍ ചെയ്താണ് ഇവര്‍ കാരിത്താസില്‍ എത്തിയത്.

തുടര്‍ന്നുള്ള പരിശോധനയില്‍ ബോംബെ ബ്ലഡ് ഗ്രൂപ്പ് ആണെന്നു തിരിച്ചറിയുകയായിരുന്നു. ഈ ഗ്രൂപ്പില്‍ പെട്ടവര്‍ക്കു ഡോണറെ കണ്ടെത്തുകയെന്നത് ദുഷ്‌കരമാണ്. അതിനാല്‍ പല ആശുപത്രികളും ഇത്തരക്കാരുടെ വിവരങ്ങള്‍ ശേഖരിച്ചു സൂക്ഷിക്കാറുണ്ട്. ഒ പോസിറ്റീവ് ആണെന്ന്് കരുതിയാണ് ദമ്പതികള്‍ എത്തിയത്. അത്യപൂര്‍വ ഗ്രൂപ്പായ ബോംബെ ഗ്രൂപ്പ് ആണെന്നറിഞ്ഞതോടെ അല്‍പ്പം ആശങ്കയിലായി.

എങ്കിലും ആശുപത്രി അധികൃതര്‍ ആത്മവിശ്വാസം പകര്‍ന്നു. ബ്ലഡ് ഡോണേഴ്‌സ് കേരള ദൈവത്തിന്റെ കൈ എന്നതുപോലെ സഹായത്തിനെത്തി. ഇവരാണ് രണ്ടു പേരെ കണ്ടെത്തി രക്തം കൊടുത്തത്. സോഷ്യല്‍ മീഡിയയിലും ഇതു സംബന്ധിച്ച വ്യാപക പ്രചാരണം നടത്തിയിരുന്നു. എറണാകുളത്തുനിന്നുള്ള ജയപ്രകാശ്, മലപ്പുറം സ്വദേശി മുഹമ്മദ് ഷബീബ് എന്നിവരാണു യാതൊരു പ്രതിഫലവും വാങ്ങാതെ രക്തം നല്‍കിയത്.

ബ്ലഡ് ഡോണേഴ്‌സ് കേരള പ്രതിനിധികളായ സമീര്‍ പെരിങ്ങാടി, സെക്രട്ടറി ജോമോന്‍ എന്നിവരാണു ക്രമീകരണങ്ങള്‍ക്കു നേതൃത്വം നല്‍കിയത്. കൂടുതല്‍ രക്തം വേണ്ടിവന്നാല്‍ നല്‍കാന്‍ തയാറായി ആദര്‍ശ് എന്ന ഡോണറും കാത്തുനിന്നിരുന്നു. ഇതിനൊപ്പം ആശുപത്രിയിലെ ഡോക്ടര്‍മാരുടെയും ജീവനക്കാരുടെയും സഹായങ്ങളും തുണയായി. ഇവരോടൊക്കെ എങ്ങനെ നന്ദി പറയണമെന്ന് അറിയില്ലെന്നു ഷിജോ പറയുന്നു. ഈ സംഭവം രക്തദാനത്തിന്റെ മഹത്വം തന്നെ ബോധ്യപ്പെടുത്തിയെന്നും താനും ബ്ലഡ് ഡോണേഴ്‌സ് കേരളയില്‍ ചേരുമെന്നും ഷിജോ ദീപികയോടു പറഞ്ഞു.

സാധാരണയുള്ള എ, ബി, ഒ ഗ്രൂപ്പ് സങ്കേതത്തിന്റെ അടിസ്ഥാന ഘടകങ്ങളില്‍ ഒന്നാണ് എച്ച് എന്ന ആന്റിജന്‍. ഈ ആന്റിജന്‍ ഇല്ലാത്തവരാണ് ബോംബെ ഗ്രൂപ്പുകാര്‍. ഒരു എന്‍സൈമിന്റെ അഭാവമാണ് ഈ അവസ്ഥയ്ക്കു കാരണം. ഗ്രൂപ്പ് നിര്‍ണയിക്കാനുള്ള രക്തപരിശോധനകളില്‍ ഇത്തരക്കാരുടേത് ഒ ഗ്രൂപ്പായി കാണിക്കും. ഇതുകൊണ്ട് ആഗ്‌നസിന്റേതും ഒ ഗ്രൂപ്പ് എന്നായിരുന്നു അവര്‍ ധരിച്ചിരുന്നത്. എന്നാല്‍, കൂടുതല്‍ പരിശോധനയില്‍ ഇതു കൃത്യമായി കണക്കാക്കാനാകും. ഒഎച്ച് എന്നാണ് ഈ ഗ്രൂപ്പുകാരെ രേഖപ്പെടുത്തുന്നത്.

1952-ല്‍ മുംബൈയില്‍ ഡോ.ഭെന്‍ഡേയാണ് ഈ ഗ്രൂപ്പ് തിരിച്ചറിഞ്ഞത്. മഹാരാഷ്ട്രയിലും കര്‍ണാടകയുടെ ചില പ്രദേശങ്ങളിലുമാണ് ഈ ഗ്രൂപ്പ് ഉള്ളവരെ കൂടുതല്‍ തിരിച്ചറിഞ്ഞിട്ടുള്ളത്. അതിനാലാണ് ഈ രക്തഗ്രൂപ്പിനു ബോംബെ ഗ്രൂപ്പ് എന്ന പേരു വീണത്.