മഹാരാഷ്ട്രയിലെ യുവതുര്ക്കി, പുതിയ സാമ്രാജ്യം കണ്ടെത്താന് ഏറ്റവും കുറഞ്ഞ സമയത്തിനുള്ളില് കൂടുതല് ദൂരം യാത്ര നടത്തി ഈ കടുവ!
മഹാരാഷ്ട്രയിലെ ചന്ദ്രപുര് സൂപ്പര് തെര്മല് പവര് സ്റ്റേഷന് പരിധിയില്നിന്ന് മധ്യപ്രദേശിലെ ബെതുല് ജില്ലയിലേക്ക് 350 കിലോമീറ്റര് ദൂരമാണ് പുതിയ സാമ്രാജ്യം കണ്ടെത്താന് ഒരു യുവ കടുവ സഞ്ചരിച്ചത്. ഏറ്റവും കുറഞ്ഞ സമയത്തിനുള്ളില് കൂടുതല് ദൂരം യാത്ര നടത്തിയെന്ന റിക്കാര്ഡ് ആണ് ഈ യുവ കടുവയ്ക്ക് കൈവന്നത്.
കടുവ ഇപ്പോഴും സഞ്ചരിച്ചുകൊണ്ടിരിക്കുകയാണെന്നാണ് വിദഗ്ധര് നല്കുന്ന റിപ്പോര്ട്ട്. നിരവധി പ്രതിബന്ധങ്ങള് മറികടന്നാണ് കടുവയുടെ പ്രയാണം. തിരക്കേറിയ അമരാവതി-നാഗ്പുര് നാഷണല് ഹൈവേ കുറുകെ കടന്ന്, കൃഷിസ്ഥലങ്ങളിലൂടെ സഞ്ചരിച്ച്, ഗ്രാമീണ പാതകള് പിന്നിട്ട് കനാലുകള് നീന്തിക്കടന്നാണ് കടുവ മധ്യപ്രദേശിലെ ബെതുല് ജില്ലയിലെത്തിയത്.
ഈ യാത്രയ്ക്കിടെ ഭക്ഷണത്തിനായി നിരവധി വളര്ത്തുമൃഗങ്ങളെ വേട്ടയാടിയ കടുവ രണ്ടു മനുഷ്യരെ കൊല്ലുകയും ചെയ്തിരുന്നു. അതുകൊണ്ടുതന്നെ ഫോറസ്റ്റ് ഉദ്യോഗസ്ഥരുടെ കണ്ണ് കടുവയുടെ പിന്നാലെയുണ്ട്. ചന്ദ്രപുര് സൂപ്പര് തെര്മല് പവര് സ്റ്റേഷനു സമീപമുള്ള വനത്തില് ജനിച്ച നാലു കടുവക്കുഞ്ഞുങ്ങളില് ഒന്നാണിത്. ഓഗസ്റ്റ് 15-20 കാലയളവില് പുതിയ സങ്കേതം തേടി പുറപ്പെട്ട കടുവ 70 ദിവസത്തിനുള്ളിലാണ് 350 കിലോമീറ്റര് ദൂരം പിന്നിട്ടത്. യാത്ര ഇപ്പോഴും തുടരുന്നു. 2011-ല് കര്ണാടകയിലെ ഒരു കടുവ പുതിയ സങ്കേതത്തിനായി 280 കിലോമീറ്റര് ദൂരം സഞ്ചരിച്ചിരുന്നു. 15 മാസംകൊണ്ടായിരുന്നു ആ യാത്ര.
രണ്ടു ഗ്രാമീണരെ വകവരുത്തിയതിനാല് കടുവയെ വെടിവച്ചു പിടിക്കാന് മധ്യപ്രദേശ് വനംവകുപ്പ് മേധാവി ഉത്തരവിട്ടിരുന്നു. മധ്യപ്രദേശില്ത്തന്നെ നില്ക്കാന് കടുവ തീരുമാനിച്ചാല് ഈ മാസം 30 വരെ കാലാവധിയുള്ള ഉത്തരവ് റദ്ദായേക്കും. മുമ്പ് വനംവകുപ്പ് പിടിക്കാന് ശ്രമിച്ചെങ്കിലും ഗ്രാമീണര് ശബ്ദമുണ്ടാക്കിയതിനാല് ശ്രമം പാഴായെന്നാണ് വനംവകുപ്പ് പറയുന്നത്.
https://www.facebook.com/Malayalivartha