രാജ്യം മുഴുവന്‍ തെരഞ്ഞെടുപ്പ് ചൂടിലാണ്. സര്‍ക്കാര്‍ ഉദ്യോഗസ്ഥര്‍ക്ക് തെരഞ്ഞെടുപ്പില്‍ ഇരട്ടി ചുമതലയാണ്. അതിനിടെയാണ് വിവാഹിതയാവുന്നതിന്റെ, കുളിരുള്ള സ്വപ്‌നങ്ങളുമായി കഴിയുന്ന തന്നെ, തെരഞ്ഞെടുപ്പ് ചൂടിലേയ്ക്ക് തള്ളിവിടരുതെന്നുള്ള ഒരു പ്രതിശ്രുത വധുവിന്റെ അഭ്യര്‍ത്ഥന. ആ അഭ്യര്‍ത്ഥന ഇപ്പോള്‍ വൈറലായിരിക്കുകയാണ്.

തന്റെ വിവാഹത്തിനായി തെരഞ്ഞെടുപ്പ് ഡ്യൂട്ടിയില്‍ നിന്ന് ഒഴിവാക്കി തരണമെന്ന് അഭ്യര്‍ത്ഥിച്ച് രംഗത്തുവന്നിരിക്കുകയാണ് വാഴക്കാല സ്വദേശിയായ അധ്യാപിക. ആവശ്യവുമായി കാക്കനാട് കലക്ട്രേറ്റിനെ സമീപിച്ചിരിക്കുകയാണ് അവര്‍.

ഏപ്രില്‍ 21-നാണ് വിവാഹം. തെരഞ്ഞെടുപ്പ് പ്രഖ്യാപനത്തിന് മുമ്പേ വിവാഹം നിശ്ചയിച്ചതാണ്. തെരഞ്ഞെടുപ്പ് ജോലി ലഭിച്ചാല്‍ വിവാഹപ്പിറ്റേന്ന് രാവിലെ പോളിങ് ഡ്യൂട്ടിക്ക് ഹാജരാകേണ്ടി വരും. വിവാഹക്ഷണക്കത്ത് ഉള്‍പ്പെടെ ഹാജരാക്കിയാണ് അധ്യാപികയുടെ അപേക്ഷ. പോളിങ് ഡ്യൂട്ടിക്ക് നിയമന ഉത്തരവ് ലഭിച്ചാല്‍, അപ്പോള്‍ നോക്കാമെന്നാണ് തെരഞ്ഞെടുപ്പ് വിഭാഗം ഉദ്യോഗസ്ഥര്‍ മറുപടി നല്‍കിയത്.

അതേസമയം നിരവധിപേര്‍ തെരഞ്ഞെടുപ്പ് ഡ്യൂട്ടിയില്‍ നിന്നും ഒഴിവാക്കണമെന്ന് ആവശ്യപ്പെട്ട് രംഗത്തെത്തുന്നുണ്ട്. മകളുടെ പ്രസവത്തിനായി വിദേശയാത്ര പോകാനിരിക്കുകയാണെന്നും യാത്ര മുടക്കരുതെന്നും അപേക്ഷിച്ച് മറ്റൊരു അധ്യാപികയും അഭ്യര്‍ത്ഥന നടത്തിയിട്ടുണ്ട്.

അതേസമയം പോളിങ് ഡ്യൂട്ടി ഇളവ് ലഭിക്കാന്‍ നിയമപരമായി അവകാശമുള്ളവരുടെ വിവരങ്ങള്‍ ഓഫിസുകളില്‍നിന്നു മുന്‍കൂട്ടി ശേഖരിക്കുന്നുണ്ട്. ജീവനക്കാരുടെ പട്ടിക കലക്ടറേറ്റിലേക്കു നല്‍കുമ്പോള്‍ ഇക്കാര്യം പ്രത്യേകം രേഖപ്പെടുത്തണമെന്നാണ് നിര്‍ദേശം.

പൂര്‍ണ ഗര്‍ഭിണികള്‍, മുലയൂട്ടുന്ന കുഞ്ഞുങ്ങളുള്ള അമ്മമാര്‍, കാന്‍സര്‍ പോലുള്ള മാരക രോഗം ബാധിച്ചവര്‍, ഡയാലിസിസിനു വിധേയരാകുന്നവര്‍, സമീപകാലത്ത് ഹൃദയ ശസ്ത്രക്രിയ കഴിഞ്ഞവര്‍, ഭിന്നശേഷിക്കാര്‍ തുടങ്ങിയവര്‍ക്കു പോളിങ് ഡ്യൂട്ടിയില്‍ നിന്ന് ഇളവ് ലഭിച്ചേക്കും.