'ഉദാഹരണം ഉഷാകുമാരി', ചുവരെഴുത്ത് ആണുങ്ങളുടെ കുത്തകയല്ല!
പൊന്‍കുന്നത്ത് ചുവരെഴുത്തിനായി രാഷ്ട്രീയ പാര്‍ട്ടികള്‍ സമീപിക്കുന്നത് ആണുങ്ങളെയല്ല, മുന്നണി ഭേദമില്ലാതെ എല്‍.ഡി.എഫിന്റെയും എന്‍.ഡി.എ.യുടെയും ചുവരെഴുത്തുകള്‍ ഏറ്റെടുക്കുന്ന ഇളങ്ങുളം തേക്കനാല്‍ ടി.പി. ഉഷാകുമാരിയേയാണ്.
അങ്ങനെ ചുവരെഴുത്തിലൂടെ താരമാകുകയാണ് ഇളങ്ങുളം തേക്കനാല്‍ ടി.പി. ഉഷാകുമാരി. എലിക്കുളം പഞ്ചായത്തിലെ ഇളങ്ങുളം രണ്ടാംമൈലില്‍ കോട്ടയം മണ്ഡലത്തിലെ യു.ഡി.എഫ്. സ്ഥാനാര്‍ഥിക്കായി ചുവരെഴുതുകയാണിപ്പോള്‍ ഇരുപത്തഞ്ചുവര്‍ഷമായി ഈ രംഗത്ത് പ്രവര്‍ത്തിക്കുന്ന കലാകാരി.
ബാനര്‍, ബോര്‍ഡുകള്‍, ചുവരെഴുത്ത് എന്നിവയുടെ സുവര്‍ണകാലത്ത് ഉഷാകുമാരി ഈ രംഗത്ത് സജീവമായിരുന്നു. പിന്നീട് പരസ്യകല, ഫ്ളക്സുകള്‍ക്ക് വഴിമാറിയപ്പോള്‍ ജീവനോപാധിക്കായി വാഹനങ്ങളുടെ നമ്പര്‍ പ്ലേറ്റ്, വാഹനങ്ങളിലെ മറ്റ് ഡിസൈന്‍ എഴുത്തുകള്‍ എന്നിവയുടെ രംഗത്തേക്ക് മാറിയിരുന്നു ഉഷാകുമാരി.
ഈരാറ്റുപേട്ടയില്‍ ഇത്തരം ജോലികളുടെ തിരക്കിനിടെയാണ് തിരഞ്ഞെടുപ്പ് പ്രചാരണ ജോലികള്‍ക്കായി നേരം കണ്ടെത്തുന്നത്. ഈരാറ്റുപേട്ടയിലാണ് താമസം. അവിടെ ഭര്‍ത്താവ് ഇടുക്കി കഞ്ഞിക്കുഴി സ്വദേശി പി.ആര്‍. ഹരിദാസ് വര്‍ക്ഷോപ്പ് ജോലി ചെയ്യുന്നുണ്ട്. അദ്ദേഹം തെരഞ്ഞെടുപ്പ് പ്രചാരണത്തിനായി വാഹനങ്ങളുടെ ഓള്‍ട്ടറേഷന്‍ ജോലികള്‍ തിരക്കിട്ട് പൂര്‍ത്തിയാക്കി കൊടുത്തുകൊണ്ടിരിക്കുകയാണ്.
തിരഞ്ഞെടുപ്പ് ചുവരെഴുത്ത്, ബാനറെഴുത്ത് തുടങ്ങിയ ജോലികള്‍, ഇരുപത്തഞ്ചുവര്‍ഷം മുമ്പാണ് ഉഷാകുമാരി വരുമാനത്തിനായി തിരഞ്ഞെടുത്തത്. പഠനകാലത്തുതന്നെ ചിത്രകലയില്‍ താത്പര്യമുണ്ടായിരുന്ന ഉഷാകുമാരി പാലാ കൈരളി ഫൈന്‍ ആര്‍ട്സ് ഇന്‍സ്റ്റിറ്റ്യൂട്ടില്‍ നിന്ന് ചിത്രകലയില്‍ രണ്ടുവര്‍ഷത്തെ ഡിപ്ലോമ നേടിയിട്ടുണ്ട്.
https://www.facebook.com/Malayalivartha
