തായ്‌കോന്‍ഡാ ക്ലാസില്‍ കണ്ണുമൂടി പഞ്ച് ചെയ്യാന്‍ നില്‍ക്കുന്ന മകന് സര്‍പ്രൈസ് നല്‍കി പ്രത്യക്ഷപ്പെട്ട സൈനികനായ പിതാവിന്റെ ദൃശ്യങ്ങള്‍ വൈറലാകുന്നു
കൂടിചേരലിന്റെ വിഡിയോകളാണ് ഫെയ്‌സ്ബുക്ക് പേജുകളില്‍ ഏറെ ഇഷ്ടവും പങ്കുവയ്ക്കലും സ്വന്തമാക്കാറുള്ളത്. പ്രിയപ്പെട്ടവര്‍ക്ക് അമ്പരപ്പ് സമ്മാനിച്ച് അവര്‍ മുന്നിലെത്തുമ്പോള്‍ മുഖത്ത് വിരിയുന്ന സന്തോഷം ഈ വിഡിയോകളുടെ ആകര്‍ഷണമാണ്.
ഇത്തരത്തില്‍ ഒരു അമേരിക്കന്‍ സൈനികന്‍ തന്റെ തിരിച്ചുവരവില്‍ മകനു നല്‍കിയ സര്‍പ്രൈസ് സോഷ്യല്‍ ലോകത്തിന്റെ കണ്ണും മനസ്സും നിറച്ചിരിക്കുകയാണ്. ടെന്നസീ ആര്‍മീ നാഷനല്‍ ഗാര്‍ഡ് അംഗമായ സെര്‍ജന്റ് റോബ് കാസ്റ്ററോനോ ആണു മകന് ലൂക്കാ കാസ്റ്ററോനോയുടെ തായ്‌കോന്‍ഡാ ക്ലാസില്‍ എത്തി സര്‍പ്രൈസ് നല്‍കിയത്.
പരിശീലനത്തിനു വേണ്ടി കണ്ണ് മൂടികെട്ടിയ ലൂക്കയുടെ എതിരാളിയായി റോബ് നിന്നു. ലൂക്കാ എതിരാളിയെ പഞ്ച് ചെയ്യാന്‍ ശ്രമിക്കുന്നുണ്ട്. ഇതിനിടയില്‍ പ്രോത്സാഹിപ്പിക്കുന്ന റോബിന്റെ ശബ്ദം ലൂക്കയില്‍ സംശയമുണര്‍ത്തി. മൂന്നാംതവണ തന്റെ ചെല്ലപ്പേര് വിളിക്കുന്നതു കേട്ട ലൂക്ക് കണ്ണിലെ കെട്ട് മാറ്റി നോക്കി. അതാ അച്ഛന്‍ മുമ്പില്‍ നില്‍ക്കുന്നു. പിന്നെ അവന്‍ ഒറ്റക്കുതിപ്പായിരുന്നു. നിമിഷനേരം കൊണ്ട് അവന്‍ അച്ഛനരികില്‍ എത്തി. റോബ് അവനെ ചുംബിക്കുകയും ആശ്വസിപ്പിക്കുകയും ചെയ്തു.
ജോര്‍ദാനിലും തെക്കന്‍ സിറിയയിലുമായി സൈനിക സേവനത്തിനു നിയോഗിക്കപ്പെട്ട റോബ് 10 മാസങ്ങള്‍ക്കു ശേഷമാണു മടങ്ങിയെത്തിയത്. റോബിന്റെ കുടുംബം താമസിക്കുന്ന നഗരത്തിലെ ഫെയ്‌സ്ബുക്ക് കൂട്ടായ്മയായ 'ഓപ്പറേഷന്‍ യെല്ലോ റിബണ്‍' ആണ് ഇത്തരമൊരു സര്‍പ്രൈസ് കൊടുക്കാന്‍ സഹായിച്ചത്. വികാരനിര്‍ഭരമായ ഈ കൂടിച്ചേരല്‍ വിഡിയോ സമൂഹമാധ്യമങ്ങളില്‍ വൈറലാണ്.
https://www.facebook.com/Malayalivartha
